مفيش بيزنس مش بيستخدم استراتيجية التسويق على السوشيال ميديا!

ولذلك الطلب على التخصص ده في تزايد كل يوم، والعرض كمان كتير!

عشان كدة سهل تبدأ في المجال بس صعب تبقى متميز ومطلوب!

هدف المقال ده هو تقديم المهارات والخبرات اللي لازم تبنيها في نفسك لو عايز تتخصص في التسويق على السوشيال ميديا وتبقى من المتميزين.

في المقال ده هنتكلم عن 12 حاجة لازم تطور نفسك فيها.

تقدر تعتبر المقال ده هو المدخل الرئيسي لمجال التسويق على السوشيال ميديا.

يلا بينا نبدأ …

التسويق على السوشيال ميديا Vs التسويق الإلكتروني

التسويق على السوشيال ميديا هو أحد تخصصات التسويق الالكتروني الكتيرة!

طب ايه هو التسويق الالكتروني؟

التسويق الإلكتروني هو استخدام الانترنت بكل المنصات والتطبيقات اللي عليه في الوصول للجمهور المستهدف وترويج المنتجات والخدمات اللي البيزنس بيقدمها.

والتسويق على السوشيال ميديا هو استخدام منصات السوشيال ميديا في الترويج عن المنتجات والخدمات المختلفة.

ازاى ده بيحصل؟

ده اللي هنتكلم فيه دلوقتى …

أساسيات التسويق على السوشيال ميديا

تقدر تقول إن علم التسويق على السوشيال ميديا عبارة عن 6 حاجات غير ظاهرة، و6 حاجات تانية ظاهرة وكل الناس عارفها!

الـ 6 حاجات اللي محدش بيركز معاها هى:

1- أساسيات التسويق

2- إدارة الإعلام

3- أساسيات البيزنس

4- آلية عمل التكنولوجيا

5- علم النفس

6- التأثير الإجتماعي

ملحوظة: عشان تتخصص في أي مجال من مجالات التسويق الإلكتروني لازم تكون فاهم كويس اوى في الـ 6 حاجات دول.

أما الـ 6 حاجات التانية واللى تعتبر تخصصات مصغرة جوه مجال التسويق على السوشيال ميديا هي:

1- استراتيجية المحتوى

2- كتابة المحتوى

3- إدارة الجماهير (Moderation)

4- الاعلانات الممولة

5- التصميمات

6- التحليلات

انت ممكن تقول دلوقتي يا عم انت مكبر الموضوع ليه، هو بوست هينزل على صفحة فيسبوك وخلاص كده!

الموضوع مش كده ولا عمره كان ولا هيكون كده!

دلوقتي هنتكلم عن كل عنصر من العناصر الـ 12 …

1- أساسيات التسويق

التسويق هو فن وعلم خلق الطلب على خدمة أو منتج بيقوم بحل مشكلة حقيقية أو إشباع رغبة عند مجموعة محددة من الناس بسعر يقدروا ومستعدين يدفعوه.

يعني دورك كمسئول عن ادارة التسويق أو عضو فيها هو:

• خلق طلب على المنتج أو الخدمة.

• التأكد من أن المنتج أو الخدمة دى فعلا بيحل مشكلة أو بيحقق رغبة.

• تطوير المنتج/الخدمة بالمواصفات اللي يتوقعها الجمهور المستهدف، واللى بناء عليها بيقوم باختيار المنتج.

•  التأكد من أن الجمهور المستهدف يقدر يدفع، وعنده الاستعداد الكامل لدفع السعر اللي انت تقول عليه.

ده اللي انت المفروض تكون فاهمه عن التسويق قبل ما تشتغل في مجال التسويق عبر السوشيال ميديا.

إذن أول حاجة لازم تفهمها انك مسئول عن التسويق مش عن ادارة مواقع التواصل الاجتماعي.

الأصل انت بتاع تسويق، والسوشيال ميديا هي الاداة أو المكان اللي انت بتنفذ فيه الأنشطة التسويقية.

دوس هنا عشان تتعلم أساسيات التسويق بالتفصيل

2- إدارة الإعلام

الجمهور عشان يشتري أي منتج أو خدمة بيعمل حاجتين:

1- يعرف معلومات مبدئية عن المنتج.

2- يقرر ما إذا كان المنتج ده مناسب ولا لا.

اذن عشان تخلق طلب على المنتج أو الخدمة اللي انت بتبيعها (تسويق) لازم الناس تعرف إن عندك المنتج الفلاني بالمواصفات الفلانية.

صح؟

وبناء عليه قامت الشركات دي تدور على أحسن وسيلة ممكن يقولوا بيها للناس أن المنتج الفلاني ممكن ينفعهم، وكانت الوسيلة دي هي الإعلام.

وسائل الإعلام هي الوسائل اللي “بنعلم” (جاية من إعلام) بيها المعلومات اللي احنا عايزين نعرفها.

في سياق التسويق الاكتروني، وسائل الإعلام مقسومة لـ 4 انواع:

• الإعلام المدفوع

• الإعلام المملوك

• الإعلام المكتسب

• الإعلام المجاني

يلا نتكلم عن التفاصيل …

• وسائل الإعلام المدفوعة (Paid Media)

زمان كان فيه Mass Production يعني الشركات كانت بتصنع منتجات استهلاكية بكميات كبيرة جدا.

وبالتالي  كانت الشركات بتتكلم مع Mass Market يعني تتكلم مع الجمهور العام كله على بعضه.

وبالتالي كنا محتاجين Mass Media يعني وسائل اعلام كل الناس دي بتتفرج عليها عشان نقدر نوصل لهم.

وبناء عليه كانت الاستراتيجية التسويقية ساعتها:

الظهور في أكتر مكان الناس بتتفرج عليه لمدة زمنية معينة مقابل شوية فلوس حسب المدة الزمنية.

ده المفهوم الأساسي وراء الإعلانات، شركة بتحجز مساحة – أيا كانت المنصة – للوصول لجمهور عريض.

الاعلانات على مختلف المنصات تندرج تحت الإعلام المدفوع، زي اعلانات الفيسبوك، إعلانات تويتر، اعلانات جوجل، اعلانات تطبيقات الموبايل الخ.

• وسائل الإعلام المملوكة (Owned Media)

وسائل الإعلام المملوكة عبارة عن ان الشركة بدل ما كانت بتروح تحجز أو تؤجر جزء من منصة/قناة تانية عشان تستفيد من الجمهور الموجود فيها، بقت بتبني المنصة الخاصة بيها.

السبب في اتجاه الشركات لبناء المنصات التسويقية الخاصة بيها هي طبعا ظهور الإنترنت، وارتفاع تكلفة الإعلانات.

هو ده باختصار فكرة الإعلام المملوك.

منصة تسويقية انت المتحكم فيها، متحكم في المحتوى اللي بيتم نشره، وعندك القدرة على إطلاق حملات تسويقية وقت ما تحب بالطريقة اللي تحبها …

بدل ما تضطر تدفع كل ما تحب تعلن عن منتجك، وغير سياسات تغيير طريقة عمل المنصات زي تقليل معدل الوصول في الفيسبوك مثلا.

الاعتماد على وسائل الاعلام اللي من النوع ده في التسويق بيساعدك تبني حاجة احنا بنسميها “Marketing Assets”.

يعني ايه؟

Asset يعني مورد له فائدة إقتصادية تملكه أو تتحكم فيه الشركة وتستطيع توليد منه الربح مستقبلا.

إذن أي وسيلة تسويقية انت تملكها أو تتحكم فيها، وتقدر تكسب منها مستقبلا تبقى Asset …

يعني وسيلة تقدر تعتمد عليها سنين من غير تكلفة كبيرة وانت المتحكم في كل حاجة زي الموقع الإلكتروني، المدونات، والتسويق عبر البريد الإلكتروني.

تعلم ازاى الاعتماد على وسائل الإعلام المملوكة ساعدني ازود المبيعات

• وسائل الإعلام المكتسبة (Earned Media)

كلمة Earned يعني يجني أو يكسب، وهنا انت مبتدفعش مليم واحد، ولا بتبني محتوى على منصتك الخاصة، انما بتخلي وسائل الاعلام التانية تتكلم عنك وعن المنتجات اللي عندك.

أحد أهم استراتيجيات التسويق من خلال وسائل إعلام الغير هي التدوين الضيف (Guest Blogging)، والـ Blogger Outreach.

والآن مع آخر أنواع وسائل الإعلام وهو الإعلام المجاني.

• وسائل الإعلام المجانية (Free Media)

الإعلام المجانى متمثل في مواقع السوشيال ميديا ومحركات البحث (الجزء الـ Organic منها).

الفكرة ببساطة انك بتقدر توصل للناس وتقولهم اللي انت عايزه مجانا من خلال مثلا الفيسبوك، أو جوجل.

انت كده فهمت انك تقدر تقوم بالأنشطة التسويقية من خلال السوشيال ميديا بشكل مدفوع أو شكل مكتسب أو شكل مجاني أو تستخدمها لتوجيه الجمهور للمنصة التسويقية الخاصة بيك.

3- أساسيات البيزنس

التسويق على السوشيال ميديا جزء من التسويق، والتسويق جزء من البيزنس …

يعني ايه بيزنس؟

البيزنس هو عملية متكررة لخلق وتوصيل قيمة الناس محتاجها او عايزها …

بسعر مستعدين وقادرين يدفعوه …

وبطريقة تشبع احتياجاتهم وتلبي توقعاتهم …

وذلك حتى يستطيع البيزنس تحقيق الربح اللي يضمن له الاستمرار عشان يكرر العملية باستمرار.

كل كلمة في التعريف اللي فات ليها مدلول، ولو البيزنس فشل لا قدر الله، يبقى بسبب حاجة من الحاجات الموجودة في التعريف.

عشان تتعلم أساسيات البيزنس ارشح لك كتاب The Personal MBA للكاتب جوش كوفمان.

كتاب مهم جدا، وهو متاح مجانا على موقع جوش إنما في شكل فصول، وكل فصل عبارة عن مقالات.

دوس هنا لقراءة كتاب The Personal MBA بشكل مجانى تماما.

4- آلية عمل التكنولوجيا

عشان تنجح في التسويق الالكتروني عموما لازم تكون فاهم تكنولوجيا بشكل عام، وتكون فاهم ازاى مواقع التواصل الاجتماعي بتشتغل.

ازاى الفيسبوك بيشتغل؟ ازاى تويتر بيرتب الأخبار والهاشتاج؟ ايه منهجية انستجرام في عرض الصور؟

وغيرها من الأسئلة اللي عشان تجاوبها لازم تفهم وتدرس التكنولوجيا اللي الشركات دى بنستخدمها.

بالشكل ده هتقدر تروح بالسوشيال ميديا لمستوى تاني أبعد من اللي وصل ليه أي حد.

5- علم النفس

خدها قاعدة عامة كده، أي علم ليه صلة مع الإنسان، لازم تدرس جمبه علم نفس على طول.

طب تدرس العلم ده بشكل أكاديمي؟ طبعا لا.

علم النفس من وجهة نظري مهارة وعلم، مهارة ملاحظة وتحليل سلوكيات البشر، وعلم متمثل فى نظريات بتشرح ليه البشر بيختاروا وبيعملوا اللي بيعملوه.

مهم اولا تقرأ في التسويق وعلاقته بعلم النفس، وفي الاقتصاد وتفسيراته لقرارت الناس.

6- التأثير الإجتماعي

زمان، وسائل الاعلام كانت عبارة عن التليفزيون والراديو والمجلات والجرايد، ومع ظهور كل وسيلة من دول قامت الشركات باستخدامها لزيادة المبيعات والتواصل مع الجماهير بشكل فعال اكتر.

بس كل وسائل الإعلام دى فيها عيب وهو أنها إتجاه واحد.

يعني اللي معاه الميكروفون كان يقدر يقول اللى هو عايزه في أي حتة، وقت ما يحب …

والجمهور مايقدرش يعمل أي حاجة غير إنه يسمع، مايقدرش يشارك ولا يقول رايه.

أما دلوقتي، ومع ظهور الانترنت، طلع شوية ناس قالوا طب ما نخلي الطريق رايح جاي …

فظهر نوع جديد من وسائل الإعلام ذات طابع اجتماعي، وبقى اسمه اعلام اجتماعي أو مجازا يعني مواقع التواصل الاجتماعي.

طب ويعني ايه اجتماعى دى؟

يعني مجتمع، ناس، قبائل …

وده معناه إن اللي ماينفعش يحصل في الحياة الواقعية بين الناس وبعضها، ماينفعش يتعمل في التسويق عبر مواقع التواصل.

مثلا مينفعش أما واحد صاحبك يحكيلك مشكلة ويطلب منك حلها، تتأخر في الرد عليه او تنفض له، وبالمثل على مواقع التواصل ماينفعش تتجاهل مشاكل الجمهور المستهدف.

إذن من قوانين الحياة اللي بنستخدمها يوميا في حياتنا، هنطلع قوانين ايه اللي ينفع وايه اللي ماينفعش في شغلنا في التسويق على السوشيال ميديا.

عشان كده لازم تذاكر علم اجتماع وعلم نفس اجتماعي عشان تعرف ازاى الناس بتتصرف فى وسط الناس، وازاى تؤثر في الجمهور وتخليه يحبك البراند بتاعك.

وبكده أكون خلصت وشرحت لك أول 6 محاور أساسية واللى  تعتبر أساس كل نشاط هتعمله فى التسويق على السوشيال ميديا.

إقرا في الـ 6 حاجات دى باستمرار عشان هى اللي هتؤثر في طريقة شغلك الظاهر.

عد من 1 لـ 3 عشان نكمل!

1 …

2 …

3 …

ركز معايا …

دلوقتى هنتكلم عن الـ 6 تخصصات أو التاسكات اللي اي واحد شغال في التسويق على السوشيال ميديا بيعملها كل يوم شهر!

1- استراتيجية المحتوى

دلوقتي هكلمك بشكل مباشر وعملي ازاى تعمل استراتيجية محتوى لمواقع التواصل الاجتماعي (Social Media Marketing Strategy).

• أهداف التسويق

أول مكون من مكونات استراتيجية المحتوى للسوشيال ميديا هي أهداف التسويق.

وهنا لازم تسأل نفسك سؤال، وهو:

ليه “انت” بتستخدم مواقع السوشيال ميديا في التسويق؟

مثلا تلاقي شركة بتستخدمها عشان تجيب ترافيك للموقع الإلكتروني، وشركة تانية بتستخدمها عشان تزود المبيعات، وهكذا.

طبعا مش محتاج أقولك إن الأهداف دى لازم تبقى SMART.

• مواقع التواصل اللي هتشتغل عليها

تاني مكون من مكونات الاستراتيجية هي اختيار وتحديد المواقع اللي هتركز عليها شغلك.

مواقع التواصل الاجتماعي كتير ولكن اهمها:

• الفيسبوك

• انستجرام

• اليوتيوب

• تويتر

• لينكدإن

• تيك توك

• بينتريست

• سناب شات

مش منطقي انك تشتغل على كل القنوات مرة واحدة، الافضل تركز على قناة أو اتنين أو تلاتة بالكتير.

• جدول محتوى كل موقع (Editorial Calendar)

بعد تحديد أهداف التسويق، والاستقرار على القناة التسويقية اللي ستركز جهودك عليها، ييجى دور التخطيط للمحتوى اللي هيتم نشره على القنوات دى.

الـ Editorial Calendar عبارة عن أداة تنظيمية لتخطيط المحتوى، وفيها 3 نقاط:

• أفكار المحتوى

• يوم وقت النشر

• مكان نشر المحتوى

في بداية الشهر، بتعمل جلسات عصف ذهني مع فريق العمل أو مع نفسك للخروج بأفكار محتوى تحقق أهداف التسويق!

وليكن مثلا خرجت بـ 50 فكرة محتوى جاهزة على التنفيذ، وخدت منها 10 منها لتويتر، و 25 للفيسبوك، و 15 لانستجرام.

فاللى انت بتعمله انت بتكتب اسم الفكرة ووصف قصير عنها في جدول المحتوى، وتكتب جمبه هينزل امتي وهينزل على انهى موقع!

وكمان من المسئول عن التنفيذ لو الفريق فيه اكتر من واحد، واكتب جمب كل فكرة هل هتعملها لها إعلانات ولا لا ، ولو اه يبقي بكام وليه وهتوصل لايه؟

دول أهم 3 أجزاء لازم وحتما ولابد تبقى موجودة في أي استراتيجية.

طبعا تحديد الجمهور المستهدف، وتحليل وفهم المنتج أو الخدمة اللي انت بتقدمها ده امر مفروغ منه، وجزء اصيل لبناء أي استراتيجية تسويقية.

بعد ما بتعمل الاستراتيجية، نيجي بقي للتنفيذ، وهنبدأ اهم حاجة وهي كتابة المحتوى.

2- كتابة المحتوى للسوشيال ميديا

كتابة المحتوى هى اهم حاجة في استراتيجية التسويق على السوشيال ميديا.

المحتوى لازم يكون بيتكلم عن مشاكل الناس، رغباتهم واهدافهم، وعن ازاى انت بالمنتجات والخدمات اللي عندك هتقدر تساعدهم.

المحتوى لازم يكون يبقي تبع وجهة نظر واتجاه معين مش عام، ويبقى منظم وبسيط وفكرته واضحة.

المحتوى ليه أنواع، زي الصورة أو الفيديو أو الإنفوجرافيك أو الكلام النصي أو المقالات القصيرة …

المحتوى بيختلف حسب الموقع اللي هيتم نشره فيها، مثلا الفيسبوك حاليا مكان متميز للفيديو وبالذات القصيرة.

بنتريست مكان الإنفوجرافيك، تويتر مكان الكلام النصي القصير، انستجرام مكان الصور وهكذا …

دوس هنا عشان تتعلم ازاى تكتب محتوى خطوة بخطوة

3- إدارة الجماهير (Moderation)

انت عملت خطة، وكتبت محتوى ونشرته، تعمل ايه بعد كده؟

هنا يجي دور الـ Moderation وهو باختصار انك ترد على استفسارات الجمهور على المحتوى في الكومنتات، والرد على الرسائل وعموما أي استفسار أو شكوى من الجمهور المستهدف.

في الـ Moderation ماينفعش تعمل نفسك مهتم، انت اما مهتم، أما لا، والجمهور هيعرف بسهولة لو بتكدب أو بتنافق.

زى ما بتفرح بالتعليقات الإيجابية، افرح للسلبية وفكر ازاى ترضى صاحبها عشان تخليه من ضمن فريق العمل عندك في الشركة من غير ما يبقى موظف فيها.

وخلي عندك هدف واحد بس وهو: تسمع كويس اوى، وتحل مشاكل الجمهور المستهدف، وترد على كل استفساراتهم بوضوح.

4- الاعلانات الممولة على السوشيال ميديا

الإعلانات بشكل عام أداة مش استراتيجية!

ماينفعش تبص على الاعلانات أنها الاداة السحرية اللي هتخلي البيزنس بتاعك يزدهر!

الإعلانات اداة تساعدك توصل لاكبر عدد ممكن من الناس، توصل بايه بقي؟ هو ده الاصل.

الإعلانات بحر واسع بس لحسن الحظ انه موضوع سخن وفيه ناس كتيرة بتتكلم فيه وبتشرح طرق واستراتيجيات مختلفة …

كل اللي عليك انك تكتب في جوجل مثلا اعلانات الفيسبوك، إعلانات تويتر، اعلانات انستجرام وهكذا.

5- تصميمات السوشيال ميديا

المرئيات في شغل التسويق أمر ضرورى، عشان كدة لازم يكون معاك فريق عمل متكامل للتصميم، ولكن ده سعات مش في إمكانية ناس كتير!

هنا الحل كان في الأدوات اللي تساعدك تعمل تصميم متكامل موزون بصريا، بمساعدة قوالب كتير مجانية.

من افضل الادوات بلا منازع هي Canva.

وكمان مواقع بتديك صور جاهزة مناسبة لموضوع المحتوى اللي بتتكلم عليه زي  Pixapay، و Pexels، و Unsplash، و Flickr، و Tumblr.

طيب عملت التصميم، والمحتوى وكله تمام، ونشرت المحتوى، ايه بعد كده؟

اللي بعد كده انك تـ Moderate، وتحلل.

الـ Moderation وخلصنا منه، دلوقتي هنتكلم عن التحليلات …

6- التحليلات

في التسويق اللى مابيحللش شغله اول بأول بيحكم على نفسه بثبات المستوى وفشل جهوده بعد كده …

الموضوع بسيط، انت حطيت هدف وليكن زيادة الترافيك، في نهاية المدة المقرر انك توصل لهدفك فيها، لو وصلت يبقى تمام، لو ماوصلتش يبقى لا.

“مش مهم الداتا، المهم ازاى هتقراها وتحولها لـ Action تحسن أداء شغلك بيه”

يستحسن تعمل تحليل أداء لكل موقع على حدة شهريا (وكل بوست وكل يوم وكل أسبوع).

وبكدة اكون خلصت …

انا رسمت لك الخطوط العريضة، التوجهات والطرق اللي المفروض تمشي فيها لو عايز تحترف الشغل في المجال.

وبقى معاك خريطة تقولك ازاى تطور نفسك في المجال، ولو هتاخد كورس ايه المحتوى اللي لازم يتقدم فيه!

وبس كده …

التسويق الالكتروني عموما والتسويق على السوشيال ميديا خصوصا مجال كويس، بس محتاج شخص فاهم ومتميز عشان يقدر ينجح وسط زحمة السوق.

لو عندك اي استفسار يخص التسويق عموما، اكتبه في التعليقات وانا هقراه وارد عليه في أقرب وقت ممكن …