fbpx

دليل التائهين للبداية في مجال التسويق الإلكتروني

المقال ده موجه لكل الناس اللي مش عارفة ازاى تبدأ فى التسويق الإلكتروني أو بمعنى أدق مش عارفة ازاى تختار مجال من مجالات التسويق الإلكتروني عشان تتخصص فيه اكتر!

 

هتتعلم في المقال ده ايه هي تخصصات التسويق الإلكتروني وهقولك على أفضل المصادر اللي تساعدك تبدأ!

 

وكمان هقدملك نصائح ودروس من واقع خبرتي المتواضعة جدا في المجال بحيث تقدر تبدأ بسرعة وتتفادي أخطاء ممكن تكلفك حرفيا سنين تخلف عن كل الناس اللي بدأت معاك.

 

ركز معايا …

 

مدخل إلى التسويق الإلكتروني

 

قبل اي حاجة لازم نعرف ازاى الناس اللي حاليا شغالة في مجال التسويق الإلكتروني بدأت ازاى أو دخلت المجال ازاى؟

 

الناس دول حاجة من 3:

 

1- ناس كانت شغالة في التسويق التقليدي ومع تطور ظهور الإنترنت في مصر، ونبوغ المجال أكتر، راحوا يدرسوا تسويق الكتروني عشان يطبقوه على شركاتهم اللي هما بالفعل شغالين فيها.

 

2- ناس شغالة في مجالات تانية، وسمعت عن المجال، وقالت اجرب حظي، فراحوا أخدوا كورسات وذاكروا واشتغلوا على نفسهم وعملوا Shift Career وكملوا في مجال التسويق الإلكتروني.

 

3- شباب لسه متخرج من الجامعة، وسمع عن المجال وقال انا هشتغل في المجال ده لان فرصه كويسة وفلوسه حلوة!

 

انت!

 

ايوه انت ياللى بتقرأ دلوقتي!

 

انت واحد من الـ 3 دول، ولو انت شخص رابع قولي في الكومنتات …

 

المهم، بغض النظر انت أنهي شخص من دول، عندي ليك 3 دروس لو فهمتها بدري بدري هتوفر على نفسك مجهود ووقت كان ممكن يضيع عقبال ما تكتشف وتتعلم الدروس دى.

 

ركز معايا …

 

1- التسويق هو التسويق، الإختلاف في حاجات تانية!

 

التسويق هو التسويق، الإختلاف في حاجتين:

 

1- سلوك الناس

2- التكنولوجيا

 

بعد مليون سنة هيكون التسويق هو هو!

 

هيفضل هدف التسويق هو خلق طلب على المنتجات والخدمات!

 

اومال ايه المختلف؟

 

الطريقة والأدوات.

 

التسويق الإلكتروني ما هو إلا تسويق بس بيتم تطبيقه من خلال الإنترنت.

 

يعني انت لازم تبقى فاهم في التسويق وفاهم ازاى الانترنت غير سلوك الناس!

 

تمام؟

 

2- مفيش حاجة ببلاش في مجال التسويق الإلكتروني وفي أي مجال!

 

حقيقي مفيش حاجة ببلاش، عايز تنجح؟

 

انجح وماله!

 

بس ادفع.

 

أحد أهم الأفكار المغلوطة عند الناس عن التسويق الإلكتروني إنه ببلاش!

 

التسويق الإلكتروني مش ببلاش، ولكن تكلفته أقل من التسويق التقليدي.

 

التسويق الإلكتروني مش طريقة سريعة لمضاعفة ارباح البيزنس، لا ده موضوع عايز دراسة وفهم صحيح للأساسيات وتطبيق بطريقة مبدعة وذكية.

 

ملحوظة: التسويق الإلكتروني ممكن يساعدك في ضرب المبيعات في 4 و5 أضعاف بس لما يتم تنفيذه صح وبخطة منظمة وبالصبر والتجارب.

 

3- التسويق عبر الفيسبوك مش اهم حاجة في التسويق الإلكتروني

 

معظم أصحاب قرار التسويق في  الشركات في مصر، من غير تفكير ولا تحليل بيشتغلوا على الفيسبوك الأول، وده غلط 100%.

 

الفيسبوك قناة تسويقية، وقرار اختيار القنوات التسويقية ده ليه اصول مش هباء كده!

 

على حسب مكان تواجد الجمهور المستهدف، وهدف الشركة، والموارد المتاحة لتنفيذ الهدف ده هتختار القناة التسويقية المناسبة.

 

يعني الإختيار مابيكونش على أساس أن الناس كلها بتشتغل على القناة الفلانية، أو لانها الاشهر، فيه شركات عادى جدا مش بتشتغل على الفيسبوك!

 

وضحت؟

 

افهم الـ 3 دروس كويس جدا لو ناوى تشتغل في التسويق الإلكتروني.

 

تخصصات ومجالات التسويق الإلكتروني

 

التسويق الإلكتروني مقسوم لـ 4 أجزاء رئيسية:

 

 

  1. التسويق بالمحتوى (Content Marketing)

  2. التسويق عبر البريد الالكتروني (Email Marketing)

  3. التسويق عبر محركات البحث (Search Engine Marketing)

  4. التسويق عبر وسائل التواصل الإجتماعي (Social Media Marketing)

 

يلا بينا نتكلم في التفاصيل …

 

1- التسويق بالمحتوى (Content Marketing)

 

التسويق بالمحتوى أهم جزء فى التسويق الإلكتروني، وده مش عشان انا بحب المجال ده جدا وشغال فيه من زمان، إنما عشان من غيره مفيش حاجة من التلاتة التانيين هتشتغل!

 

بإختصار شديد التسويق بالمحتوى هو استراتيجية تسويقية يتم تنفيذها عن طريق عمل وتقديم محتوى عالي الجودة لجمهور مستهدف ومحدد بهدف كسب ثقته ودفعه لاتخاذ قرار ربحي بالنسبة للشركة.

 

التسويق بالمحتوى بحر كبير، وتعلمه بالكامل ممكن ياخد منك سنين عشان تقدر تجمع كل خيوطه وتفك شفراته، ولكن انا سهلت عليك الطريق ده!

 

ازاى؟

 

عن طريق مجموعة من الكتب هتعلمك التسويق بالمحتوى بشكل متكامل وبشكل بسيط يخليك قادر على التطبيق حتى لو كنت لسه مبتدئ تماما.

 

دوس هنا عشان تعرف اكتر عن مجموعة كتب تعليم التسويق بالمحتوى بالتفصيل

 

2 – التسويق عبر البريد الالكتروني (Email Marketing)

 

الحدوتة باختصار انك بتطلب من الناس – بمحض إرادتها – تديك الايميل الشخصي بتاعهم في مقابل الحصول على شئ قيم منك سواء كان محتوى حصري أو أي حاجة تانية.

 

زي بالظبط ما انا عملت أما قدمت كورس كتابة المحتوى بشكل مجاني، فهمت؟

 

بعد كده انت بتبتدى تبعت لهم محتوى مفيد بصورة مستمرة لحد ما يشتروا اللي انت بتبيعه، وبتفضل مكمل معاهم حتى بعد ما يشتروا.

 

عشان تدخل مجال التسويق عبر البريد الإلكتروني لازم تكون بتعرف تتعامل مع التكنولوجيا، وبتحب وبتعرف تبيع على الانترنت.

 

لو عايز تتعلم التسويق عبر البريد الإلكتروني يبقي ابدا بالكورس البسيط ده التابع لمبادرة مهارات من جوجل.

 

3- التسويق عبر محركات البحث (Search Engine Marketing)

 

التسويق عبر محركات البحث جزء مهم جدا، ومش مهم عشان أنا قولت كده!

 

تعالي نفكر بالعقل كده …

 

دلوقتي أول ما أي حد مننا بيواجه مشكلة معينة أو بيكون عايز يعرف حاجة معينة، بيعمل ايه؟ 

 

بيجري يروح لجوجل أو أي محرك بحث تاني يسأله على حل المشكلة دي، صح؟

 

وبالتالي الجزء ده ماينفعش الشركات تستغني عنه إلا فى أضيق الحدود.

 

الجزء ده بعبع لناس كتيرة بسبب إنهم فاهمين إنه كله حاجات معقدة وتكنولوجيا وإن جانب الفن فيه قليل جدا مقارنة بباقي الأجزاء!

 

بس كل الكلام ده مش حقيقة وأوهام.

 

الجزء ده ممتع جدا.

 

بس محتاج شخص صبور ودقيق وبيحب التفاصيل مهما كانت صغيرة، وعنده تفاني في العمل غير طبيعي لإن الموضوع مرهق ذهنيا وبدنيا زي كل تخصصات التسويق الالكتروني على فكرة.

 

الجانب الـ Organic من التسويق عبر محركات البحث اسمه SEO إختصار لـ  Search Engine Optimization.

 

السيو عبارة عن شوية حاجات بتتعمل في المحتوى بحيث تظهر في ترتيب معين فى نتائج البحث لكلمة معينة.

 

أما الجانب الـ Paid من التسويق عبر محركات البحث فهو متمثل فى الـ Search Ads اللي هي عبارة عن ترويج لنتيجة معينة من النتائج اللى بتظهر فى قائمة نتائج البحث عن كلمة معينة في جوجل.

 

الإسم الأشهر للنوع ده هو PPC Ads اللى هو Pay per Click، ويطلق عليه الإسم ده عليه نظرا عن الـ Pricing Model بتاع نوع الإعلانات دي الدفع مقابل الضغط على الإعلان.

 

من المصادر اللي لازم تقرأها لو كنت عايز تتخصص في المجال الـ SEO، هي 3 أدلة مجانيين في غاية البساطة والجمال، وهما:

 

1- The Beginner’s Guide to SEO من Moz

 

2- The Definitive Guide To SEO In 2021 من Backlinko 

 

3- A Complete Guide to SEO من Search Engine Journal 

 

السيو بيتغير باستمرار، عشان كده لازم ماتكفيش بأنك تقرأ الـ 3 أدلة اللي قولت لك عليهم، ولكن تتابع الـ 3 مواقع بصورة مستمرة عشان تطور نفسك بصفة مستمرة.

 

4- التسويق عبر وسائل التواصل الإجتماعي (Social Media Marketing)

 

للأسف التسويق عبر وسائل التواصل الإجتماعي يبان سهل، ولكن الحقيقة غير كدة خالص!

 

الجانب الـ Organic منها، إن المحتوى يظهر بشكل مجاني وسط الـ Feed بتاع الجمهور المستهدف، وده ليه شوية شروط لو اتعملت صح في ظروف صح هتجيب معاك نتائج كبيرة.

 

الجانب الـ Paid منها يسمى بالـ Social Media Ads أو الـ Feed Ads، وهو عبارة عن إن المحتوى اللي الشركة بتعمله يظهر بشكل طبيعي وسط الـ Feed بتاع الجمهور المستهدف.

 

عشان تشتغل في المجال ده، لازم تكون بتحب تتواصل مع البشر، وبتحب تؤثر فيهم، وبتحب تتعلم وتعلم، وعندك طولة بال، وأهم حاجة أهم حاجة تكون بتعرف تسمع!

 

طب ازاى تبدأ أو المفروض تدرس ايه بالظبط؟

 

انا عملت لك مقال كبير بيشرح لك بالظبط المطلوب منك تدرسه عشان تكون محترف في المجال ده!

 

دوس هنا عشان تشوف المقال ده!

 

وبكده أكون خلصت كلامي عن التسويق الإلكتروني، وأتمنى فهمت مجالات التسويق الإلكتروني الاساسية وفهمت ازاى تبدا في كل مجال منهم.

 

قولي بقي، ايه اصعب جزء في التسويق عبر الإنترنت من وجهة نظرك؟

22 رأي حول “دليل التائهين للبداية في مجال التسويق الإلكتروني”

  1. بجد بجد مقال بسم الله ما شاء الله عليه وعلى صاحبه حلو جدا وانا والله حابب اتواصل معاك واقولك على اللى عندي واتمنى الرد عليا

    رد
  2. محتوى جميل جدا ومفيد الصراحة إستفدت كثيرا منك أستاذ أسامة
    عندي سؤال بسيط هو هل أبدأ تعلم التسويق وأساسياته و بعد ذلك أمر لتعلم الأدوات الرقمية من seo و facebook ads …. للتطبيق
    أم العكس ؟
    وشكرا لك جدا

    رد
  3. ما شاء الله عليك جزاك الله كل خير عن هذا المقال الرائع كنت حابب بس اتواصل معاك بخصوص اازاي ابدء محتااج نصيحتك فلو في اكونت او رقم اقدر اكلمك عليه

    رد
  4. بالنسبة لي أصعب جزء في التسويق عبر الإنترنت هو التسويق بالمحتوى .. مش عشان حضرتك ذكرت إنه أهم شيء ولكن لأنه بالفعل عايز مهارة كتابة غير عادية للخروج بمقالة ذات جودة عالية تجذب بيها القاريء أنه مش بس يكملها للأخر وبتركيز شديد .. لأ ده لدرجة أنه يقتنع بيك ويطلب منك شراء أو إمتلاك السلعة اللي بتقدمها .. وده الحقيقة السبب ف إني وصلت لهنا وفعلاً بإرادتي كملت المقال للأخر وبكامل إرادتي هشتري منك الكتب اللي محتاجها بإذن الله هيتم التواصل مع حضرتك قريباً عسى إني أستفيد من علمك ويكون سبب نجاحي في حياتي العملية.

    رد
    • الحقيقة يا مودي أنا بشكرك جدا على كتابة التعليق ده بالتفصيل ده، فعلا هيساعدني كتير الفترة اللى جاية، اشكرك وفى انتظار إننا نتقابل داخل الكتب.

      رد
  5. شكرا يا اوس على المقاله دى
    يا ريت نتواصل تلفونيا عشان محتاج مساعده منك . انت اللى قولت (ولو لاقيت الدنيا ضلمة كملني ونوصل مع بعض لنتيجة حلوة.)
    اتواصل معاك ازاى ؟

    رد
  6. المعلومات الكتييييرة اوي دي اكيد مبذول فيها مجهود كبير وحقيقي شكرا انك بتشاركنا فيها

    رد
  7. أستاذ / أسامة
    بالنيابة عن نفسى وعن كل من استفاد من المعلومات الغزيرة المنشورة على هذا الموقع .. يشرفنى أن أتوجه إليك بجزيل الشكر و عظيم التقدير .. و زادك الله علما و وفقك دائما لما فيه الخير .. و أود أن أستشيرك فى مشكلتى حيث أننى كنت أعمل صيدلانيا لمدة 15 سنة .. و الآن لدى فكرة مشروع صغير للتسويق فى مجال خدمات الرعاية الطبية و الصحية بإستخدام instant messengers مثل الواتساب أو التيليجرام .. و المشكلة هى أننى أبحث عن شريك لتنفيذ ذلك المشروع .. فما هو رأيك ؟ و هل هذا المجال قابل للتسويق فى مصر ؟

    رد
    • أهلا بيك أستاذ عمرو ^^

      أولا أشكرك جزيلا على الكلام الأكثر من الرائع ^^

      ماقدرش اجاوبك على سؤال هل المشروع قابل للتنفيذ فى مصر ولا لا من غير ما افهم المشروع هيعمل ايه، وساعتها نشوف اذا كانت الناس فعلا عايزة اللى انت هتقدمه ولا لا!

      فى الفترة الحالية صعب اشترك معك كشريك ولكن طبعا يمكن استشارتي فى اي أمر تريد ، وفى إنتظار التفاصيل الخاصة بالفكرة إذا كنت مهتم.

      رد

أضف تعليق