fbpx

التسويق بالمحتوى ببساطة

هتخرج من المقال ده فاهم التسويق بالمحتوى بشكل صح اكتر من 99% من الناس اللي شغالة في المجال.

 

وهتعرف بالظبط ليه التسويق بالمحتوى بيجيب نتائج مع ناس اه وناس لا.

 

دلوقتى هقولك على 5 أصناف من الناس فاهمة وبتطبق التسويق بالمحتوى غلط!

 

ركز معايا احسن تكون أنت واحد منهم …

 

1- فيه ناس بتعتبر التسويق بالمحتوى عبارة عن كتابة مقالات على الويب سايت، وده اعتبار خاطئ تماما.

 

كتابة المقالات قطعا جزء من التسويق بالمحتوى إنما مش هى التسويق بالمحتوى.

 

والتعامل مع الموضوع على انه كدة بيقتل أي فرصة في استخدام المحتوى في الحصول على مبيعات أو Leads.

 

2- ناس تانية بتعتبر التسويق بالمحتوى نوع من أنواع الـ Branding!

 

وفى رأيي توصيف “Branding” ده حجة البليد زي ما بيقولوا!

 

يعني أي حاجة انت مش عارف تشرح لى تأثيرها بالأرقام بتقولى اصل ده Branding اصل ده Awareness!

 

الكلام حلو، بس المهم تقولي ترجمة الكلام ده بلغة البيزنس ايه، لغة الأرقام؟

 

3- وفيه ناس تالتة بتعتقد إنها لما تكتب محتوى مفيد على السوشيال ميديا هى كدة بتطبق التسويق بالمحتوى!

 

لكن في الحقيقة هما أبعد ما يكون عن التسويق بالمحتوى.

 

نشر محتوى على السوشيال ميديا من استراتيجيات التسويق على السوشيال الميديا مش من استراتيجيات التسويق بالمحتوى.

 

4- ناس فاهمة ان ماينفعش تبيع أو تتكلم عن المنتج وانت بتطبق التسويق بالمحتوى!

 

وده غلط، لان اصلا من افضل الحاجات اللي بيساعدك فيها التسويق بالمحتوى هو إثبات قيمة المنتج بتاعك قصاد اي منتج تاني!

 

وده مش هيحصل الا لما تتكلم عن المنتج وبشكل مباشر، بس اللعبة كلها هتتكلم تقول ايه بالظبط وهتقوله ازاى وفى انهى سياق!

 

5- أهم حاجة في التسويق بالمحتوى هو المحتوى وده غلط جدا …

 

اهم حاجة في التسويق بالمحتوى هى التسويق، التسويق هو الغاية، والمحتوى هو الوسيلة.

 

انت دلوقتى عرفت الغلط، ركز معايا عشان تعرف الصح …

 

دلوقتى هقولك بالظبط يعني ايه تسويق بالمحتوى بشكل قاطع وبسيط يخليك تفهم الموضوع صح وتشرحه لاى حد كمان!

 

التسويق بالمحتوى

 

التسويق بالمحتوى عبارة عن عملية إنتاج محتوى محدد (بأي شكل: مقالات، فيديوهات، انفوجرافيك، كتب الكترونية، صور، رسومات، صوتيات) على قناة مملوكة بالكامل للبيزنس (Owned Media) وتوصيله إلى جمهور محدد من أجل كسب ثقة الجمهور المستهدف ده وتحريكه خطوة نحو إتمام الشراء.

 

قوة التسويق بالمحتوى فى انه استراتيجية جبارة لبناء اعلانات مجانية وثابتة طول العمر بدون الاضطرار لدفع فلوس كل شوية يعنى Marketing Assets …

 

بمعنى تانى التسويق بالمحتوى عبارة عن اعلانات شغالة 24/7، بتعملها مرة وبتجنى ثمارها طول العمر.

 

تعالى نشرح الكلام ده بالتفصيل …

 

1- قناة مملوكة بالكامل للبيزنس (Owned Media)

 

بص يا سيدى، الأعلام 3 أنواع:

 

  • اعلام مدفوع [Paid Media]

  • اعلام مكتسب [Earned Media]

  • اعلام مملوك [Owned Media]

 

التسويق بالمحتوى

 

1- الـ Paid Media

 

ببساطة هى الدفع مقابل الظهور قدام الجمهور المستهدف وده متمثل في الاعلانات باشكالها وانواعها المختلفة.

 

اعلانات الفيسبوك، اعلانات جوجل، اعلانات المواقع، إعلانات التليفزيون، الراديو وهكذا.

 

2- الـ Earned Media

 

فكرة الـ Earned Media إن الناس تعرف عن منتجاتك وخدماتك من غير ما تضطر تدفع فلوس في حجز مساحة اعلانية عند حد!

 

أحد أهم أشكال الـ Earned Media هي الـ Word of Mouth واللى بتتولد أما اي بيزنس يعمل حاجة تستاهل إن الناس أو المؤثرين أو وسائل الإعلام عموما تتكلم عنها.

 

3- الـ Owned Media

 

فكرة الـ Owned Media إن يكون عندك القناة الإعلامية الخاصة بيك بشرط تكون تمتلكها وتتحكم فيها (وفى المحتوى) بنسبة 100%!

 

عشان تطبق التسويق بالمحتوى صح لازم يكون عندك قناة خاصة بيك …

 

ودى حاجة من اتنين: إما ويب سايت، إما Email List أو ما يعادلها من Messenger Lists وخلافه!

 

طب صفحة الفيسبوك؟ انت مش متحكم فيها بنسبة 100%!

 

وممكن عادى جدا بكرة الصبح تتقفل أو المحتوى يتشال!

 

لازم تكون انت المالك، والمتحكم بنسبة 100%.

 

الموضوع عامل بالظبط زي امتلاك وتأجير شقة …

 

لو انا المالك وانت المؤجر، الشهر الجاى ممكن امشيك أو أفرض عليك زيادة في الإيجار، إنما لو انت المالك فانت حر.

 

خد بالك: اوعى تفهم انى بقولك ماتعتمدش على الاعلانات!

 

أبدا.

 

الإعلانات جزء مهم وأصيل في أي بيزنس، انا اقصد انك عشان تطبق التسويق بالمحتوى لازم بشكل مبدئي يكون عندك قناة مملوكة انت المتحكم فيها 100%.

 

وطبعا لازم تستخدم الـ Paid Media والـ Earned Media إنما مش هما الأساس!

 

ومن النقطة دى ننقل على تانى نقطة مهمة في فهم طبيعة وأساس التسويق بالمحتوى …

 

2- الاصول التسويقية [Marketing Assets]

 

التسويق بالمحتوى

قلنا إن قوة التسويق بالمحتوى في انه استراتيجية جبارة لبناء اعلانات مجانية وثابتة طول العمر بدون الاضطرار لدفع فلوس كل شوية! … اعلانات شغالة 24/7، بتعملها مرة وبتجنى ثمارها طول العمر.

 

وبالرغم من أهمية الإعلانات التقليدية في نشر وتوصيل رسالة المنتج/الخدمة على نطاق كبير، إلا إن بمجرد انتهاء الحملة الإعلانية، التسويق بيقف، وعشان تكمل لازم تدفع تاني وتالت.

 

وهنا عظمة التسويق بالمحتوى … بناء Marketing Assets تعيش العمر كله، مش بس مدة الحملة التسويقية زي الاعلانات، ومن غير ما تضطر تدفع فلوس كل شوية.

 

تعالى نفهم الحكاية من الاول …

 

Marketing Assets يعني أصول تسويقية.

 

طب هو ايه تعريف الـ Asset أصلا؟

 

الـ Asset هو “مورد له فائدة إقتصادية تملكه أو تتحكم فيه الشركة وتستطيع توليد منه الربح مستقبلا”.

 

تخيل معايا إنك عملت مثلا فيديو أو مقال فيه مقارنة بين كل الحلول والمنتجات المنافسة ليك، وحطيته على الموقع بتاعك وروحت نمت، ايه اللي هيحصل؟

 

اللي هيحصل إن الفيديو ده هيفضل يعملك تسويق حتى وإنت نايم، فهمت؟

 

عشان تفهم موضوع الـ Assets ده بشكل أعمق، تقدر تعتبره الاملاك اللي عندك حاليا زي شقتك التمليك أو العربية …

 

حاجات مملوكة ليك وتقدر تتحكم فيها بنسبة 100%.

 

وتقدر كمان تستفيد منها ماديا باشكال مختلفة.

 

وضحت؟

 

انت عايز تقول إن التسويق بالمحتوى بديل الإعلانات؟

 

قطعا لا.

 

الإعلانات وسيلة انتشار سريعة، إنما مش هي الأصل.

 

الأصل في المحتوى اللي هو “الاصول التسويقية الثابتة” ليك، واللى بتستخدم الاعلانات في ترويج الأصول دى.

 

أكبر مثال على كده، الـ Crash Course اللي انا عملته عن كتابة المحتوى، واللى هو بمثابة Marketing Agency شغالة ليا نهار مع ليل من غير ما ادفع ولا مليم.

 

كل يوم بيجيلي Leads مهتمين جدا باللى انا بقدمه!

 

إذن ماينفعش تبص للمحتوى اللي أنت بتعمله على أنه مقال ولا اتنين!

 

كل قطعة محتوى عبارة عن اعلان في حد ذاتها.

 

فكر في المحتوى وكأنه إعلان مدى الحياة، اعلان ثابت وموجود، وما عليك إلا انك كل شوية تخلي ناس جديدة تشوفه.

 

وهنا يجي دور الاعلانات المدفوعة.

 

الوسيلة اللي هتساعدك في اظهار “الاصول التسويقية” لناس جديدة كل يوم، وبالتالي مبيعات جديدة كل يوم.

 

مهم جدا تتعامل مع أي محتوى على أنه اصول تسويقية، وشوف انت بقى المواصفات اللي لازم تتوفر في الحاجة اللي هتفضل تتكلم عنك وعن البيزنس بتاعك طول العمر!

 

يعني فكرة انك تكتب أي حاجة، أو تستسهل هتوديك في داهية، لأن الموضوع زي ما قلت أصل ثابت وشغال يتكلم عنك باستمرار.

 

فهمت؟

 

ومن هنا ننقل على النقطة رقم #3 …

 

3- إنتاج محتوى محدد لجمهور محدد

 

إنتاج أي محتوى والسلام لا يساوى التسويق بالمحتوى، نقطة.

 

المحتوى لازم يكون أولا محدد، وثانيا موجه لجمهور محدد.

 

تجميع المعلومات وإعادة الصياغة والذى منه مستحيل يجيب نتيجة، كان زمان ينفع، إنما دلوقتي في 2022 لا!

 

موضوع المحتوى لازما يكون محدد وواضح، وموجه كمان لجمهور محدد وواضح!

 

وهنتكلم بالتفصيل في النقطتين دول في الاجزاء الجاية من الكورس.

 

إنما دلوقتى عايزك تحط في دماغك حاجة واحدة بس: محتوى محدد + جمهور محدد.

 

4- بأي شكل، وتوصيله لجمهور محدد!

 

التسويق بالمحتوى عبارة عن: 1- تسويق. 2- محتوى.

 

المحتوى ده بقى يطلع في انهي شكل؟

 

مش مهم!

 

مكتوب، مسموع، مرئي … مقالات، فيديوهات، انفوجرافيك، كتب الكترونية، صور، رسومات، صوتيات …

 

مش مهم!

 

يعني لو انت بتقول على نفسك مبعرفش اكتب، مفيش مشكلة … صور، سجل، ارسم!

 

طب عملت المحتوى، كدة تمام؟

 

لا مش تمام، ناقص تعمل تسويق للمحتوى ده، يعني توصل المحتوى ده للجمهور المستهدف!

 

ركز معايا …

 

المحتوى بتاعك موجود على القناة المملوكة ليك، بس ده مش كفاية …

 

مش معنى انك عملت المحتوى ونشرته ان كدة خلاص المهمة خلصت!

 

ترويج المحتوى جزء أصيل من عمليات التسويق بالمحتوى، والترويج ده بيكون طبيعي (Organic) أو مدفوع (Paid).

 

وهنتكلم بالتفصيل عن الموضوع ده في الوحدة رقم #5.

 

أما دلوقتى هنتكلم عن الشرط الخامس من شروط تطبيق التسويق بالمحتوى بشكل متكامل وصحيح …

 

5- تحريك الجمهور المستهدف خطوة نحو إتمام الشراء

 

إنتاج محتوى محدد (أصول تسويقية) بأي شكل.

على قناة مملوكة بالكامل للبيزنس.

وتوصيله إلى جمهور محدد.

 

طب ازاى الكلام ده كله يترجم لمبيعات أو Leads؟

 

الإجابة Sales Funnel.

 

مينفعش تكتب محتوى كدة في الهوا، لازم يكون مرتبط بـ Funnel منظم.

 

انك تصحى الصبح واللى يجي في بالك تكتبه وتنشره، ده غلط جدا، وبعيد كل البعد عن التسويق بالمحتوى!

 

إنتاج المحتوى لازم يكون بشكل استراتيجي، يعني لازم الموضوع يمشى وفقا للـ Funnel بتاعك.

 

دلوقتى هنتكلم بالتفصيل عن الـ Funnels >>>

 

ركز معايا …

 

أولا المسميات، هتلاقي ناس بتقول عليه Content Funnel، أو Sales Funnel، أو Marketing Funnel، أو مسار المبيعات أو قمع المبيعات الخ.

 

بس بغض النظر عن المسمى، احفظها زي ما هي كدة >>> “سيلز فانل”.

 

السيلز فانل عبارة عن الخطوات اللي انت (البيزنس) بيبنيها ويحطها قدام العميل المحتمل وبيشجعه يروح من خطوة لخطوة لحد ما يشترى!

 

والخطوات دى بتكون مبنية في الاساس على الخطوات الفعلية اللي العميل المحتمل بيعملها بشكل طبيعي عشان يشترى.

 

طب ازاى تبنى Funnel بحيث يكون مظبوط على مقاس البيزنس بتاعك من اول خطوة لحد اخر خطوة؟

 

الإجابة: افهم سلوك العميل لما يجي يشترى المنتج أو الخدمة اللي بتقدمها …

 

اعيد تانى؟

 

افهم سلوك العميل لما يجي يشترى المنتج أو الخدمة اللي انت بتقدمها …

 

طب هى الناس بتشترى ازاى؟

 

التسويق بالمحتوى

 

1- الإدراك

 

العملية التسويقية بتحصل فورا أول ما العميل يدرك إن فيه مشكلة، او فيه احتياج، او ان عنده رغبة أو فيه فرصة أفضل متاحة!

 

وأول ما بيدرك حجم “المشكلة او الاحتياج أو الرغبة او الفرصة” بيبتدى يفكر ازاى يحل أو يحصل على الفرصة!

 

مثلا لو كل يوم انت متبهدل في المواصلات، فهتلاقى نفسك بقيت بتقول انا عايز اجيب عربية، وهتبتدي تدخل على المرحلة التانية …

 

أو مثلا لو انت جعت في نص الشغل، هتلاقى نفسك بتقول انا عايز اكل، وهتدخل في المرحلة التانية وهي …

 

2- البحث

 

أنت هنا أدركت حاجتك للعربية، فعلى طول دخلت دورت على الانترنت واليوتيوب على معلومات عن العربيات، أسعارها، مستعمل ولا جديد، مميزات وعيوب وهكذا.

 

أو مثلا جعان، تبتدى تدخل على ابلكيشن المنيوز تقلب فيه، أو تسأل اصحابك ممكن ناكل ايه …  دى مرحلة المعلومات.

 

3- المراجعة والتصنيف

 

في المرحلة اللي فاتت انت عرفت معلومات كتير، بس مش كل المعلومات دى مهمة!

 

في المرحلة دى انت بتصنف المعلومات، وبتستبعد المعلومات المش مهمة، وبتقول لنفسك بس كدة، انا لو هشترى الحاجة الفلانية لازم يكون فيها كذا وكذا، وافضل حد بيقدم الحاجة دى هو فلان وفلان وفلان!

 

4- التقييم

 

بعد ما عرفت المفروض المنتج أو الخدمة يكون فيه ايه من مميزات وخلافه، وعملت قايمة فيها اكتر من شركة بتقدم المنتج أو الخدمة اللي ناوى تشتريها، يجي دور التقييم والاختيار ما بينها!

 

والتقييم بيكون بناء على المعايير اللي انت توصلت ليها في مرحلة البحث ومرحلة المراجعة.

 

5- الشراء

 

في المرحلة دى انت بتبص على اراء وتقييم العملاء السابقين أو تستشير حد من أهل الخبرة في المنتج أو الخدمة مرة أخيرة وبعدين تشتري مباشرة.

 

6- تقييم قرار الشراء

 

بعد اتمام الشراء واستخدام المنتج بيحصل حاجة من اتنين:

 

1- المنتج كان تمام وعلى قدر التوقعات، ساعتها هتتكلم كويس عنه وتشجع الناس تستخدمه!

 

2- المنتج كان أقل من توقعاتك، ساعتها مش هتشترى المنتج ده تانى ومش هتشجع حد انه يشتريه!

 

وبس كده ….

 

هى دى المراحل اللي بيمر بيها الناس عموما عشان تشتري أي منتج أو خدمة.

 

المراحل دى ممكن تبقى قصيرة جدا، يعني في دقائق والموضوع يخلص، وممكن تبقى طويلة جدا تاخد شهور!

 

الناس مش زي بعضها، والمنتجات كمان مش زي بعضها!

 

لو انت بتبيع عقارات، غير لو عربيات، غير لو موبايلات، غير لو اكسسوارات، غير لو خدمة تسويق، غير لو سوفت وير، غير لو أكل!

 

ولو المنتج أو الخدمة بـ 100 غير 1000 غير 20000 غير 100 الف غير مليون غير 10 مليون!

 

والناس اللي مرتبها 10000 في الشهر مش بتشترى بنفس طريقة الناس اللي مرتبها 4000 غير الناس اللي دخلها الشهرى 50 الف!

 

والناس اللي بتقدر الجودة، غير الناس اللي بتقدر السعر، غير الناس اللي بتقدر التوفير، غير الناس اللي بتقدر الوجاهة الاجتماعية!

 

إذن مينفعش تكتب محتوى في الهوا، لازم المحتوى يكون موجه لمرحلة من مراحل الشراء اللي اتكلمنا عليها …

 

واللى هى تمثل الـ Funnel اللي حضرتك المفروض بتبنيه عشان تكون ظاهر قدام العميل في كل مرحلة من المراحل دى.

 

ماتقلقش هنتكلم مرة تانية عن الـ Funnels بس في الوحدة اللي جاية واللى بعدها.

 

مراجعة سريعة للى المفروض تكون اتعلمته لحد دلوقتى …

 

انت دلوقتى عرفت الشكل الخاطئ للتسويق بالمحتوى، واتعلمت الصح المتمثل في أن التسويق بالمحتوى عبارة عن:

 

عملية إنتاج محتوى محدد (بأي شكل: مقالات، فيديوهات، انفوجرافيك، كتب الكترونية، صور، رسومات، صوتيات)

 

على قناة مملوكة بالكامل للبيزنس (Owned Media)

 

وتوصيله إلى جمهور محدد.

 

بهدف تحريك الجمهور المستهدف خطوة نحو إتمام الشراء (Funnel).

 

التعامل مع كل قطعة محتوى على أنها “أصول تسويقية” قيمتها بتزيد مع طول الاستخدام!

 

وبكدة تكون فهمت التسويق بالمحتوى بالشكل الصحيح، وبقيت قادر على تطبيقه بالشكل المناسب.

المقال ده جزء من كتاب Content Marketing Principles (كتاب فيه عمليات التسويق بالمحتوى كاملة من البداية للنهاية، وبالعربي، ومن تاليفى).

 

الكتاب حاليا ومعاه 5 كتب تانية بتكمل صورة التسويق بالمحتوى متاح للبيع، وبخصم 80%.

23 رأي حول “التسويق بالمحتوى ببساطة”

  1. بارك الله فيك و جزاك خير
    المقال تحفه و الكورس غني با فائدة ربي يباركلك انشاءاللع

    رد
  2. مقال جميل جداً، محتواه رائع وشرحه مبسط جدا ، جزاك الله خيرا وننتظر المزيد وأتمنى لك التوفيق 🌹

    رد
  3. شكرًا جزيلًا على الشرح المبسط والمعلومات القيِّمة.
    بارك الله لك، وجزاك خيرًا، وجعل ذلك في ميزان حسناتك.

    رد
  4. جزاك الله كل خير 🤲
    أسلوبك عظيم جدا وبتقدم قيمة ممتازة في كل مقالاتك👌

    رد
  5. تناولك للمواضيع جميل حدآ وصيغة وطريقة كتابتك جاذبة بشكل كبير وبتخلي الواحد يتابع اكثر واكثر، ياريت لو تقدر توفر لينا تاني كورس او تدريب عشان نطبق الاتعلمناه وشكرًا جزيلآ ❤️❤️❤️
    متابعك من السودان ✅

    رد
      • جميل جدا، انا كتبته وذاكرته😊
        بس عندي سؤال، انا بتعلم المجال جديد ولو عاوزه اطبق اعمل ايه؟
        هل ممكن اشتغل في مكان فتره تدريب؟! وممكن اصلا حد يقبلني وانا ماعنديش خبره؟! ياريت نصايحك في الموضوع ده🙏

        رد
        • عظيم يا سارة!

          ممكن تشتغلى فترة تدريب، واه فيه شركات كتير هتقبلك كفترة تدريب، لانه تدريب ومش مطلوب منك اكتر من الإلتزام ومعرفة عامة لمداخل التخصص بتاعك!

          ولو الاوبشن ده مش متوفر قدامك، ممكن تشوفى حد من اقرابك او المعارف وتعرضي عليه خدماتك مجانا فى البداية مع توضيح ان الشغل ده بعد كدة هيكون مدفوع.

          رد

أضف تعليق