fbpx

ازاى تكتب محتوى القوائم “Listicle” خطوة بخطوة؟

أهم ما يميز أول نوع المحتوى “القوائم” هو قابليتها الشديدة للانتشار بشكل فيروسي على وسائل التواصل الإجتماعي.


القوائم ممكن تكون تدوينة على الموقع الإلكتروني زي المقال ده



أو على الفيسبوك زي البوست ده من صفحة ليستيشن – listation اللى متخصصة في محتوى القوائم وكانت ناجحة فيه لحد كبير!



وممكن تكون موجودة على اليوتيوب زي قناة أوديو لأبي – Audiolaby اللى اكتر فيديوهات مشاهدة في تاريخ القناة كانوا عبارة عن قوائم …



زي ما شفت كده، القوائم تنفع لجميع القوات التسويقية … على الويب سايت، وعلى الفيسبوك، وعلى اليوتيوب.


القوائم كمان من أفضل الوصفات لو عايز تظهر في الصفحة الاولى في جوجل.


طب نيجى للمهم بقى، ازاى يا عم أسامة نقوم بالتنفيذ؟


دلوقتي هقولك على 8 خطوات تعملها بالترتيب عشان تقوم بإنتاج وصفة المحتوى “القائمة” …


1- حدد موضوع المحتوى


موضوع المحتوى لازم يكون موضوع ينفع تكتب فيه من 10 لـ 20 عنصر.


والعنصر ده ممكن يكون: نصائح، خطوات، اقتراحات، طرق، استراتيجيات، مهارات، حقائق، أمور، أدوات، أفكار، ترشيحات الخ.


2- اكتب عناصر القائمة


دلوقتي انت معاك موضوع المحتوى، وليكن مثلا “10 نصائح لكتابة محتوى أفضل” …


في الخطوة دى بتكتب الـ 10 نصائح كـ Outline.


ازاى؟


أولا اعمل Brainstorming عشان تجيب أفكار من دماغك وخبرتك عن الموضوع ده، وثانيا استخدم جوجل في البحث والتنقيب على مواضيع تخص موضوع المحتوى الأصلي!


دور بالعربي والانجليزي، واكتب كل اللي تلاقيه مناسب.


بس لازم تاخد بالك ان الافكار اللي تطلع معاك تكون حلول عملية قابلة للتنفيذ ومفيدة بالنسبة للجمهور.


3- رتب عناصر القائمة ترتيب منطقي


في الخطوة اللي فاتت انت جبت أفكار كتيرة جدا واكتر من اللي انت محتاجه فعلا!


في الخطوة دى بقى انت هتعمل 3 حاجات:


1- تفلتر العناصر اللي طلعت معاك

2- تختار العدد اللي انت محتاجه بس

3- ترتب عناصر القائمة دى ترتيب منطقي


فكر في الموضوع وكأنه خريطة ذهنية عشان تقدر ترتب وتنظم عناصر المحتوى في شكل منطقي ومفهوم.


4- اعمل بحث إضافي


في الخطوة دى انت بتتعامل مع كل عنصر من عناصر القائمة على اساس انه قطعة محتوى منفصلة، وبتبتدي تجمع معلومات عنه باستخدام جوجل وتكتبها تحت العنصر اللي انت بتدور عليه!


5- اكتب عنوان المحتوى


انت دلوقتى جاهز إنك تبدأ مرحلة الكتابة، وهتبدأ بكتابة عنوان القائمة اللي بتعملها، وهنا هتمشي على المعادلة دي عشان تريح بالك …


عدد + موضوع المحتوى + فائدة وقيمة المحتوى 


مثال: 5 نصائح لكتابة محتوى يزود لك المبيعات 3 أضعاف


العدد هو 5، وموضوع المحتوى هو نصائح لكتابة المحتوى، وفائدة/قيمة المحتوى هي يزود لك 3 أضعاف المبيعات.


فهمت؟


6- اكتب مقدمة المحتوى (aka: بيع المحتوى)


الهدف من مقدمة المحتوى انك تشجع الجمهور يكمل قراءة للاخر …


يعني المطلوب منك أنك تبيع له أن المحتوى ده مفيد جدا بالنسبة له، ولازم يكمل القراءة للنهاية.


ازاى؟


1- قدم المشكلة اللي بتعالجها في المحتوى.

2- اشرح الحل اللي هو قطعة المحتوى بتاعتك.


كل ده لازم يتم في 2 – 4 سطور بس.


7- اكتب المحتوى


المحتوى بتاعك عبارة عن عناصر، أنت هنا بتكتب تفاصيل كل عنصر.


ازاى؟


هاقولك …


  • عنوان يوضح قيمة العنصر

  • شرح مختصر للعنصر

  • تفاصيل العنصر


كل عنصر بمثابة قطعة محتوى منفصلة بذاتها، عنوان، ومقدمة، والتفاصيل أو الخطوات التنفيذية.


وضحت؟


8- اكتب الـ Call to Action


الـ Call to Action من أهم أجزاء المحتوى لأنه بساطة عبارة عن الفعل المنطقي اللي المفروض القاري يقوم بيه بعد ما خلص قراءة المحتوى بتاعك.


يعني هو الفايدة اللي المفروض تعود عليك بعد ما قرا هو المحتوى …


مثلا ممكن تكون انه يشتري، أو يدوس على لينك معين، أو يقرأ محتوى تاني، أو يعمل شير أو كومنت أو منشن وهكذا.


طب ازاى تكتب الـ Call to Action؟


1- تمهيد

2- طلب


التمهيد بتلخص فيه المحتوى في سطر واحد بالكتير، وبعدين بتاخد طرف كلام وتقولهم الطلب وبتشجهعم ينفذوه.


وبس كدة …


ماتحاولش تتخطى خطوة من الخطوات الـ 8 لتنفيذ وصفة المحتوى دى.


واتفرج على الأمثلة عشان تعرف تطبق أسرع.


القوائم أهم وصفة محتوى لو عايز تكتب محتوى يطلع في الصفحة الاولى في جوجل، أو محتوى الجمهور يتفاعل معاه على وسائل التواصل الاجتماعي.


المقال ده جزء من كتاب Content Recipes اللي فيه 13 نوع محتوى وازاى تكتب كل نوع منها بخطوات واضحة وبالأمثلة.


دى تفاصيل الكتاب (الكتاب بالعربى طبعا)

رأي واحد حول “ازاى تكتب محتوى القوائم “Listicle” خطوة بخطوة؟”

أضف تعليق