fbpx

7 أدوات مجانية لاكتشاف الكلمات المفتاحية (Keyword Research)

فى المقال ده هاقولك على 7 أدوات مجانية تدعم اللغة العربية لاكتشاف الكلمات المفتاحية اللي من خلالها تقدر تجذب الجمهور اللي مستعد يشتري المنتجات والخدمات اللي انت بتقدمها.

 

ملحوظة: الشرح خطوة بخطوة بالصور.

 

هل الكلمات المفتاحية مهمة؟

 

بدون استهداف واختيار الكلمات المفتاحية الصحيحة، كل جهود السيو الباقية مش هيكون ليها لازمة!

 

الكلمات المفتاحية هي جوهر عملية تهيئة المحتوى للظهور فى النتائج الاولى فى نتائج بحث جوجل.

 

يعني ايه كلمات مفتاحية؟

 

الكلمات المفتاحية أو الجمل المفتاحية عبارة عن الكلمات اللى بيبحث بيها العميل فى محركات البحث زي جوجل.

 

الكلمات المفتاحية ممكن تكون زي أفضل نصائح كتابة المحتوى،أو كلمات مفتاحية لليوتيوب أو دراي فود للكلاب، وهكذا …

 

وضحت؟

 

إذن أول خطوة لكتابة محتوى متوافق مع قواعد السيو بحيث المحتوى يطلع فى النتائج الاولى لجوجل، لازم تقوم باكتشاف واختيار الكلمات المفتاحية المناسبة.

 

ازاى؟

 

عشان تقوم بعمليات اكتشاف الكلمات المفتاحية (Keyword Research) فيه طرق كتيرة، ولكن أكبر جزء يستحوذ على إهتمام كل اللي شغالين فى مجال التسويق بالمحتوى والسيو هو:

 

أدوات بحث الكلمات المفتاحية (Keyword Research Tools).

 

وهنا فيه مشكلة كبيرة أوى لينا كعرب، وهي:

 

إن قلما تلاقي أدوات بتدعم اللغة العربية بشكل صريح، بالاضافة إلى إن كتير من الأدوات بتكون بفلوس.

 

المشكلة دى انتهت.

 

دلوقتي هشارك معاك 7 أدوات مهمة جدا انا بستخدمها بشكل تبادلي لإيجاد كلمات مفتاحية مميزة.

 

الأدوات مجانية، وبتدعم اللغة العربية.

 

في المقال ده، هتتعلم ازاى تستخدم كل أداة من الأدوات اللي هنتكلم عنها، وازاى تجيب منها كلمات مفتاحية تخليك تكتب محتوى يظهر في الصفحة رقم #1 في جوجل.

 

يلا بينا نبدأ …

 

1- Keywords Everywhere

 

الاداة دى عبارة عن اضافة لمتصفح كروم وفايرفوكس، ومن اكتر الأدوات الغير مشهورة رغم مميزاتها الرهيبة.

 

اولا بتشتغل معاك عربي وانجليزي وكل اللغات، وثانيا النتائج بتاعتها بتظهر على الجنب في صفحة نتائج البحث كل ما تعمل عملية بحث جديدة، يعني مش محتاج تفتحها مخصوص.

 

يعني توفر لك الوقت، والمجهود، وكمان بتجيبلك النتائج بسرعة في نفس اللحظة اللي انت بتعمل فيها عملية البحث، ودى حاجة عظيمة جدا!

 

فلنفترض انك بتكتب عن التسويق، وجيت في نص المحتوى حبيت تعمل بحث عن موضوع فرعي، الاداة دى توفر لك أفكار فرعية اكتر وفى نفس الوقت مرتبطة بالموضوع الرئيسي، وده يخلى المحتوى اللي بتقدمها أفضل من أي محتوى موجود.

 

الأداة ليها جزء مجاني، وجزء مدفوع (10$ سنويا).

 

الجزء المجاني بتاعها يفي جدا بالغرض!

 

هنستخدم الأداة في الحصول على الكلمات المفتاحية اللي الناس بتعمل عليها بحث وليها علاقة بالكلمة اللي انت كتبتها في مربع البحث.

 

فلنفترض انك عايز تكتب عن التسويق بالمحتوى …

 

الكلمات المفتاحية

 

انت كدة عرفت ان الناس اللي مهتمة بالتسويق بالمحتوى هتكون مهتمة تعرف اكتر (وتشتري) استراتيجية التسويق بالمحتوى، وأمثلة على التسويق بالمحتوى.

 

المهم، افتح ملف واكتب التسويق بالمحتوى كـ كلمة رئيسية وتحتها اكتب كل الكلمات اللي طلعت لك هنا …

 

ليه؟

 

عشان دى هتبقى قائمة الكلمات المفتاحية اللي لازم المحتوى اللي هتقدمه يحتوي عليها.

 

طب افرض عملت كدة وما وصلتش لنتائج كويسة أو مالقتش نتائج اصلا، اعمل ايه؟

 

دور بالانجليزي، وهات المعادل بالعربي.

 

أو شوف اداة تانية …

 

2- Answer The Public

 

الاداة دى مش مفيدة بس في اكتشاف كلمات مفتاحية مختلفة، إنما مفيدة في مرحلة العصف الذهني، لأنها بتفتح مخك على مواضيع ممكن ما تكونش واخد بالك منها.

 

النتائج بتكون معروضة على شكل خريطة ذهنية، أو قائمة، وطبعا تقدر تنزلها في ملف اكسل.

 

الكلمات المفتاحية

 

اكتب الكلمة المفتاحية الرئيسية في مربع البحث …

 

الكلمات المفتاحية

 

هتلاقي النتائج منظمة في 5 مجموعات، اول مجموعة هي الأسئلة ….

 

الكلمات المفتاحية

 

من النتائج دى، تقدر تطلع أفكار وكلمات مفتاحية جديدة زي مثلا ليه التسويق مهم؟ هل التسويق …؟

 

في القسم التاني بتحط اضافات للكلمات المفتاحية عبارة عن حروف جر زي قريب أو بدون أو لـ …

 

وطبعا تقدر تستخدمها لتطوير الكلمات المفتاحية الأساسية زي التسويق بدون ميزانية كبيرة أو التسويق لـ الشركات الصغيرة …

 

والقسم التالت المقارنات، زي التسويق مقابل الإعلانات، الحاجة الفلانية ولا الحاجة الفلانية.

 

أما القسم الرابع فهو بيشوف الكلمات المفتاحية الأساسية ويبتدى يجيب من محركات البحث الكلمة الأساسية جنبها كلمة حسب الحروف الأبجدية.

 

يعني مثلا التسويق + الكلمات اللي تبدا بحرف الالف، التسويق + الكلمات اللي تبدا بحرف الباء، وهكذا.

 

ودى طريقة كويسة تساعدك تحصل على أفكار محتوى أفضل في العصف الذهني.

 

القسم الخامس في النتائج وهو أهم قسم من وجهة نظري، بتجيب لك فيه الكلمات المفتاحية ذات العلاقة (Related Keywords).

 

الكلمات المفتاحية

 

السحر الحقيقي للاداة دى هي البحث بكلمات مفتاحية إنجليزي، وبالذات في القسم اللي بتجيب لك نتائج بالكلمة الأساسية + كلمات تبدأ بحرف A أو B.

 

شوف مثلا أما كتبت كلمة Marketing …

 

الكلمات المفتاحية

 

شوف كم الأفكار اللي طلعت بيه قد ايه!

 

ممكن تدور بالكلمة بالإنجليزي، وبعد كده تاخد الأفكار وتعملها بالعربي.

 

تمام؟

 

3- KeywordTool.io

 

دى أفضل أداة من أدوات اكتشاف كلمات مفتاحية فعلا مميزة في كل الادوات اللي فاتت واللى جاية، والسبب ببساطة إنها بتقترح كلمات مفتاحية فعلا مميزة وفريدة صعب تلاقي أداة تانية تديها لك.

 

غير أنها تدعم اللغة العربية.

 

كلمات مفتاحية

 

الأداة دي بتسمح لك تدور مش بس في جوجل، إنما في يوتيوب، وامازون وبينج …

 

والأهم والأهم إنه بيسمحلك تجيب كلمات مفتاحية من الآب ستور يعني تقدر تستخدمها مش بس في الـ SEO، إنما كمان الـ ASO اللي هو App Store Optimization.

 

ودي شوية من الكلمات المفتاحية اللي طلعتها الأداة عشان تشوف مدى جودة وتميز الكلمات المفتاحية اللي بتقترحها عليك الأداة دي.

 

كلمات مفتاحية

 

بص على الكلمات المفتاحية المقترحة ومدى جودتها، وشوف كمية أفكار المحتوى اللي ممكن تعملها …

 

كلمات مفتاحية

 

فعلا أداة عظيمة.

 

متنساش تغير المكان اللي بيجي منه الكلمات المفتاحية، جرب كل الأماكن، مرة جوجل ومرة يوتيوب ومرة بينغ ومرة امازون ومرة آب ستور، وممكن كمان تشوف تويتر وانستجرام.

 

4- Kwfinder.com

 

الاداة من الأدوات المفضلة عندي برضو، بالرغم من إنها مجانية بس ليها حد استخدام، يعني مسموحلك تبحث عن 5 كلمات مفتاحية فقط في اليوم الواحد، ولو عايز أكتر ادفع.

 

كالعادة كتبت كلمة التسويق، والنتائج كانت كالاتي …

 

كلمات مفتاحية

 

في المثال ده، الأداة اقترحت عليا كلمات مفتاحية من دماغها …

 

كلمات مفتاحية

 

أما هنا الأداة جابت لى إقتراحات للكلمات المفتاحية من خلال التكملة الذاتية أو الـ Autocomplete في جوجل.

 

يعني مثلا لو كتبت في جوجل كلمة التسويق واستنيت لحظة هتلاقي جوجل اقترح عليك كلمات بحثية، الأداة بتجيبها لك بشكل اتوماتيك.

 

كلمات مفتاحية

 

أخر جزء من الأداة وهي إنها بتجيب لك الاسئلة اللي تحتوي عليها الكلمة المفتاحية زي ما انت شايف.

 

5- Keyworddit

 

الأداة دى من الأدوات اللطيفة جدا ولكن للاسف مش بتدعم العربية!

 

نظرا لأنها بتجيب كلمات مفتاحية من الموقع العالمي Reddit اللي هو بيدخله شهريا مليار شخص على مستوى العالم، و طبعا Reddit مش بيدعم اللغة العربية.

 

اللي بيميز الأداة دى عن غيرها، إن النتائج كلها مواضيع مهمة جدا، وخلينا نشوف مثال عملي …

 

كلمات مفتاحية

 

كل اللي عليك انك تستخدم الكلمات المفتاحية دى فى إنك تطلع من دماغك كلمات مفتاحية جديدة.


كلمات مفتاحية

يعني مثلا الوظائف المناسبة للمنضمين الجدد لمجال التسويق، موضوع زي ده غالبا مش هتلاقي حد بيتكلم عنه، فهمت الفكرة؟


كلمات مفتاحية

وطبعا اكتب اي كلمة تانية في أي مجال بالإنجليزي وهيظهرلك نتائج زى دى، ونتائج محدش من المنافسين بتوعك واخد باله منها.

 

6- Google Trends

 

لو كتبت في مربع البحث في الأداة كلمة تسويق، ونزلت لأخر الصفحة، هيظهرلك نتائج زي اللي في الصورة دى …

 

الكلمات المفتاحية

 

زي ما انت شايف، الاداة بتجيب لك الكلمات البحثية المتعلقة، وكمان بتجيبلك المواضيع المتعلقة.

 

ماتنساش تبقى تدوس على السهم اللي في اخر الصورة عشان تشوف كل النتائج اللي الأداة بتقترحها.

 

انت ممكن تكون شايف إن النتائج مش قوية بشكل كافي، ولكن اتعامل مع الكلمات دي على أساس إنها بذرة، وطورها.

 

7- Google Keyword Planner

 

الكلمات المفتاحية

 

ادخل على اللينك ده، ودوس على كلمة Start now …

 

سجل باكونت جوجل بتاعك …

 

ادخل على Tools >>>

 

ثم

 

 PLANNING >>>

 

ثم

 

 Keyword Planner >>>

 

الكلمات المفتاحية

 

بعد كده هتلاقي نفسك قدام اختيارين:

 

الكلمات المفتاحية

 

1- اكتشاف كلمات مفتاحية

2- تقييم الكلمات المفتاحية

 

طريقة استخدام الأداة دى في اكتشاف الكلمات المفتاحية زيها زي كل الادوات اللي شرحناها.

 

الكلمات المفتاحية

 

اول حاجة بص على الإعدادات، اختار الدولة اللي انت عايزها، مثلا مصر، اللغة عربي، محرك البحث اما جوجل أو جوجل وشركاه، وحدد الفترة الى عايز تكشف فيها الكلمات الرائجة.

 

المنافسة على الكلمات المفتاحية بتكون اما قليل، متوسط، عالي.

 

كل الناس في المجال بتنصح إنك تحتار الكلمات المفتاحية اللي المنافسة عليها قليلة وتشتغل عليها، وانا كمان بنصح بده في حالة لو انت مش هتقدر ولا هتعرف تعمل محتوى قوي!

 

إنما لو هتعمل محتوى قوي يكسب كل المحتوى بتاع المنافسين، أنصحك تختار الكلمات اللي المنافسة عليها عالية أو متوسطة.

 

في الصورة اللي فوق هتلاقي حاجة بعنوان “Avg. Monthly Searches” …

 

ودى بتقولك عدد المحاولات اللي بتبحث عن الكلمة شهريا، ودى حاجة مهمة في تحديد قيمة الكلمة المفتاحية اللي هشتتغل عليها.

 

وطبعا كل ما العدد كان كبير كل ما كان افضل.

 

وبس كده يا صديقي …

 

دول كانوا 7 أدوات من أفضل أدوات اكتشاف الكلمات المفتاحية مع طريقة استخدامها بالصور خطوة بخطوة.

 

لو عندك اي استفسار يخص كتابة المحتوى والسيو اكتبه في التعليقات وانا هرد عليك …

 

ملحوظة: المقال ده جزء من كتاب First Page Content اللي هيعلمك خطوة بخطوة من البداية للنهاية ازاى تكتب محتوى يظهر في الصفحة رقم #1 في جوجل.

 

الكتاب كامل بشكل منفصل غير متاح لوحده!

الكتاب ضمن مجموعة كتب فيها الخطوات والاستراتيجيات والافكار اللي انت لازم تكون عارفها عشان تطبق التسويق بالمحتوى في الظهور في الصفحة رقم #1 في جوجل، الحصول على Leads بشكل مستمر، وكتابة محتوى يبيع!

24 رأي حول “7 أدوات مجانية لاكتشاف الكلمات المفتاحية (Keyword Research)”

  1. مقالة مفيدة جدا استاذ أسامة ربنا يجعل مساعدة الغير في ميزان حسناتك
    كنت عايزة اسال حضرتك لما اختار كلمة مفتاحية اختار الكلمة الي عليها ٣٠ ولا ١٠٠
    ولاكام علشان اقدر أظهر
    ازاي اعرف ترتيب مقالي في صفحة جوجل الصفحة الاولي ولا التانية وشكرا

    رد
    • أولا أشكرك جدا.

      ثانيا اختاري الكلمة المفتاحية اللى عليها بحث اكتر ومنافسة مقبولة بشرط تقدري تقدمي محتوى افضل أو اشمل.

      ثالثا من خلال اداة Google Search Cansole هتقدري تعرفي ترتيب اي مقال على الويب سايت وكمان ايه الكلمات المفتاحية اللى الناس بتوصل بيها للمقال ده.

      رد
  2. انت عسل اقسم بالله شكرا يا عم الناس انا اول مرة ازور موقعك روعة والموقع دا والله فادني جدا بدون تسجيل ولا تعطيل وبيجيب من الأخر
    wordstream.com
    المنافسة صعبة ولا سهلة والكلمة سعرها كام زي الفل شكرا شكرا شكرا مرة تانية وزودلنا بقي مواضيع اكتر زي دي

    رد
  3. شكراً جزيلا على المعلومات الحلوة والمهمة يلي بتقدمها وأحلى شي إنها باللهجة المصرية اللطيفة أنا بقرأ وبسمع صوتك :) … فعلا مجهود رائع تستحق الثناء عليه وفعلا هذا ما يغني المحتوى العربي بالنسبة لمجال التسويقفغالبا هذه المعلومات نجدها في المحتوى الإنكليزي فقط أما باللغة العربية قلما أجد محتوى غني كهذا … أتمنالك مزيداً من النجاح

    رد
  4. بجد شكرا على كل التوضيح ده
    انت نورت ليا حاجة كانت مضلمة قصادى من فترة كبيرة
    ربنا يزيدك كل خير :)

    رد
  5. المدونه دي بسيطه وسهله ومعلوماتها مفيده جدا بالنسبالي كل مقال بياخد مني وقت لفهمه وخصوصا المقال دي فادتني جدا لان كنت بحتاج مواقع لل keywords حتي لو هدفع ليها فلوس بس الاهم انها تكون بتدعم اللغه العربيه فا بجد ربنا يوفقك ودايما تكون عايز تفيد الناس لان مش كل الناس بتكتب اللي جربته واللي فهمته ودايما بطر اعمل سيرش بالانجلش عن اللي محتجاه لان مش كله حاجه متوفره بالعربي
    بس سوالي هنا لما بفكر في مدونه معينه اعملها والبحث عن ال keyword اللي هتكون خاصه بالمدونه دي البحث في الشهر عليها من 1 ل الف فقط ومفيش اي مجال منافسه اطلاقا ..هل ابداء فيها فعلا بس قولت ان اول 6 شهور وهو ههتم فقط بكتابه محتوي خصوصا ان بحب المجال اللي هتكلم فيه دا وفي نفس الوقت متوفر منتجات علي سوق كوم ان اشترك في نظام الافليت بروجرم الخاص بيهم بس بعد 6 شهور مثلا وانزل منتجات علي المدونه واتكلم عنها غير ممكن انزل اعلانات علي المدونه نفسها هل كدا تفكيري صح ؟
    وان اخصص بس اول 6 شهور كل يومين انزل مقال بمعاير السيو وان كل محتوي يكون حصري فعلا
    ولو ع افتراض هتدخلي فلوس بعد كدا تقريبا هتكون حوالي كام تقريبا من خبرتك الشخصيه ؟

    رد
    • أشكرك جدا جدا يا عزة على الفيدباك ده ^^

      رايي ماتبديش الا لو كنت قادرة على جذب ترافيك كافي إنه يدخلك ربح، وعشان نتكلم بتفاصيل وبشكل عملي، احكي لى المدونة عن ايه الخ؟

      رد
  6. بعد التحية
    احب اشكرك علي المجهود اللي انت بتبذله ومن الواضح كده اني بعد ما قرات بعض المواضيع ان الحمد لله في ناس كتيره بتستفاد من مواضيعك ما شاء الله عليك
    ثانيا احب اسالك عن شئ انا دخلت قسم التسويق في شركة مقاولات في احدي الدول بس للاسف انا مشتغلتش في التسويق قبل كده وعليه انا مش عارف ايه اللي المفروض اعمله
    ولازم اجتهد عشان بجد مش هينفع اضيع الوظيفة دي وانا حابب اني ادخل في المجال ده ممكن تساعدني لو تقدر تعرفني ازاي ممكن ابدا
    وشكرا ليك مره تانيه

    رد
    • أهلا يا استاذ محمود، بص يا سيدي، نفذ اللى هاقولك عليه ده خطوة خطوة:

      هات و ورقة وقلم، و 1- حدد الزبون المحتمل ليهم اللى ممكن يشتري اللى هما بيقدموه 2- حدد ميزات ونقاط تميز الشركة عن المنافسين 3- حدد القنوات التسويقية اللى هتشتغل من خلالها (فيسبوك، تويتر، ويب سايت إلخ) 4- طلع افكار تسويقية تربط ما بين اللى عايزه الزبون المحتمل، واللى بتقدمه فى الشركة، نفذها وانشرها على الفنوات دي بشكل مستمر.

      اللى قولت لك عليه دى الخلاصة، ولكن الموضوع فيه تفاضيل أكتر بكتير، بس ابدا وتابع معايا بعد كده …

      ودى حاجات هتساعدك:

      https://osamasalah.com/online-marketing/
      https://osamasalah.com/content-writing/
      https://osamasalah.com/sales-content/
      https://osamasalah.com/strategy/

      تحياتي ^^

      رد
  7. طيب أنا عندي مشكلة مع مقالاتك بشكل عام .. خصوصاً اني من النوع اللي بيحتار كتير ..
    المشكلة انك بتعرض معلومات قيمة كتير و انا بقف محتار
    يعني ٧ ادوات مجانية اكيد كل واحدة فيهم فيها ميزة عن التانية
    انا بقى إحترت و قلت طب استخدم مين فيهم
    فياريت في كل مقالة بتعرض فيها معلومات كتير تحط جزء فيه الخلاصة .. لو عايز كذا إختار كذا .. و لو انت مثلا مبتدئ ابتدي بكذا
    هتسهل علينا القراءة و نقرا الجزء اللي يهمنا بس بدل ما نقعد نقرا معلومات كتير مش محتاجينها دلوقتي
    فاهم قصدي

    رد
    • فاهم قصدك طبعا يا باهي، بس عايز افهمك حاجة، شغلنا معقد بعض الشئ، اساسيته سهلة، ولكن مشاكله كتير، عشان كده لازم يكون عندك حلول كتيرة، تطلع منها حسب الحاجة، لان اولا بنشتغل على مشاريع كتير واسواق كتير وكلها ممختلفة وكل حاجة وليها التحديات بتاعتها، ثانيا انا شخصيا بستخدم السبعة مش واحدة منهم وبس، بعتمد على الـ 7 فعلا، بالاضافة ان من وصف كل واحدة فيه تميز لاداة عن التانية، زى ما انت اكيد لاحظت.

      تحياتي ^^

      رد
  8. شكرا للمقالة… اتوقع اهم عامل للكلمة المفتاحيك هو نسبة المنافسة فمثلا يمكن ان تعجبك كلمة ولكن لايمكنك ابدا المنافسة عليها
    وللاسف المواقع الي ذكرتها بتطلب مبلغ ضخم للاشتراك فيها

    رد

أضف تعليق