أدوات كتابة المحتوى: +31 أداة مجانية هتساعدك تكتب محتوى عالي الجودة – بسرعة!

هل فيه أدوات تساعد فى كتابة المحتوى وبالذات المحتوى العربي؟

اه طبعا فيه.

بتستخدم كام أداة عشان تكتب محتوى؟

1 … 2 … 3 … كام؟

الحقيقية بتقول إن عدد قليل جدا من المسوقين بيستخدموا أدوات تساعدهم في كتابة محتوى عالي الجودة، وده بسبب عائقين:

العائق الاول إن مفيش ادوات مشهورة بالقدر الكافي لكتابة محتوى تدعم اللغة العربية.

ولكن الكلام ده غير صحيح.

في المقال ده هشارك معاك +31 أداة من ادوات كتابة المحتوى اللى بتدعم اللغة العربية.

وهنقول على كام اداة لا تدعم ولكن هاقولك ازاى تستخدمها بطريقة صح لكتابة محتوى بالعربي.

العائق التاني هو ان الادوات بفلوس، بس برضو الكلام ده مش صحيح!

بالرغم من إن أي مسوق محترف لازم يكون عنده ترسانة الأدوات بتاعته المدفوعة والمجانية، إلا إن الموضوع مش محتاج تكلفة خزعبلية!

الفكرة كلها في تحديد التاسكات أو المهام العملية اللي انت المفروض بتعملها بشكل يومي، وتشوف ادوات تساعدك في انهاء المهمات دى بكفاءة.

دلوقتي هشارك معاك +31 اداة هتساعدك في كتابة المحتوى بشكل مجاني.

ملحوظة: انا هنا بتكلم عن أدوات كتابة المحتوى بس مش كل أدوات التسويق بالمحتوى.

الموضوع مهم جدا، مطلوب منك التركيز بس.

يلا بينا …

1- جوجل درايف وتحديدا مستندات جوجل

من الحاجات الصادمة بالنسبة لى اني لما كنت اقول لحد من طلاب كورس كتابة المحتوى خطوة بخطوة، ابعتلى المحتوى في ملف على جوجل درايف، يقولى هو ايه ده؟!

تعالي نبدأ من الاول خالص، عشان تكتب محتوى بتكتب فين؟

في ورقة؟ في كشكول؟ أكيد لا.

بتكتب على ملف وورد، صح؟

اهو جوجل درايف عنده حاجة اسمها Google Docs أو مستندات جوجل زي الورد بالظبط بس انضف شويتين تلاتة.

بص يا سيد، شركة مايكروسوفت عندها منتج اسمه الاوفيس اللي هو عبارة عن الوورد والاكسيل والباور بوينت، تمام؟

اهو في 2012 شركة جوجل عملت منتج زيه بس احسن شوية من وجهة نظري اسمه جوجل درايف، وفيه حاجة اسمها مستندات جوجل (زي الوورد)، وحاجة اسمها Spreadsheet أو جدول بيانات (زي الاكسيل)، وحاجة اسمها Google Slides أو العروض التقديمية اللي هي البرزنتيشن (زي الباور بوينت).

وطبعا لازم تعرف إن جوجل درايف عبارة عن خدمة تخزين سحابي مقدمة من شركة جوجل زيها زي دروبوكس.

المهم جوجل درايف أو بالتحديد مستندات جوجل افضل من ملفات الوورد وده بسبب:

1- تنسيق المحتوى

أكبر مشكلة بتقابل كل الناس اللي بتكتب محتوى على وورد هي تنسيق المحتوى، غير إن التنسيق وحش ومش سهل، إنك لو نقلته للويب سايت هيتطلب منك تظبطه من أول وجديد ودى حاجة مكلفة للوقت جدا.

إنما في جوجل الموضوع بسيط، وسهل على أي حد مش لازم تاخد كورس يعني عشان تكتب محتوى هناك، بالاضافة إلى إن مستحيل التنسيق يبوظ وانت بتنقل المحتوى للويب سايت أو لأي موقع من مواقع التواصل الاجتماعي.

2- كمية الأدوات المساعدة اللي بتسهل عليك حاجات كتير

فيه اضافة مساعدة في جوجل دوكس بتخليني بدوسة واحدة انقل المحتوى للموقع بتاعي، بكل الصور والتنسيق وكل حاجة.

انت متخيل لو كاتب مقال فيه 20 صورة، هاخد وقت قد ايه عشان ارفعهم على الموقع وانسقهم في المقال، كل ده بيخلص بدوسة!

شايف الفرق كبير ازاى؟

3- تقدر تستخدمها اوف لاين، وتقدر تكتب فيها مع اكتر من شخص في وقت واحد، والـ Edit هناك موضوع تاني!

أولا عشان تعمل Edit أو بمعنى ادق ريفيو على محتوى مكتوب على الوورد بيكون صعب جدا تكتب رايك على كل فقرة وجملة وحتى كلمة!

إنما في درايف، عندك القدرة تعمل هاي لايت على كل كلمة وكل حرف وتكتب تعليق أو كومنت عليها.

تقدر تعمل عليها Brainstorming أو تكتب وانت وفريق العمل في وقت واحد، متخيل كلنا نكون فاتحين نفس الملف وشغالين عليه وشايفين كل حرف أي حد فينا بيكتبه في ساعتها.

واخيرا تقدر تشتغل عليها اوف لاين، ومش بس كده!

تقدر تفتحها وتشوفها من أي مكان، موبايل أو لاب توب، ما هي خدمة سحابية فى الاول وفى الاخر.

الموضوع كبير اوى يا اخوانا.

2- أداة Canva للتصميم

محدش يقدر ينكر أهمية الـ Visuals في شغلنا كمسوقين، أصلا انتباه الناس بقي محدود من كتر المؤثرات اللي بيتعرضوا ليها يوميا، عشان كده تصميم جيد وواضح من أهم مكونات أي رسالة تسويقية.

الطريق الافضل في التصميم هو إن يكون معاك فريق عمل متكامل للتصميم سواء التصميم للويب أو التصميم لوسائل التواصل الإجتماعي، ولكن ده سعات مش في إمكانية ناس كتير!

هنا الحل كان في الأدوات اللي تساعدك تعمل تصميم متكامل موزون بصريا، بمساعدة قوالب كتير مجانية.

من افضل الادوات بلا منازع هي Canva.

3- مخزن الصور زي Pixapay، و Pexels، و Unsplash، و Flickr، و Tumblr

الـ 5 أدوات في رأيي كنز ماينفعش حد ميكونش بياخد منه يوميا.

وإحنا بنكتب محتوى على الويب سايت، أو على مواقع التواصل الإجتماعي بنكون محتاجين صورة بجودة عالية تعبر عن اللي احنا عايزين نقوله أو تكسر ملل ورتابة الكلام أحيانا أو تشد انتباه الناس وتخليهم متفاعلين ومبسوطين بالمحتوى.

أفضل 5 أدوات أو مواقع للصور في رأيي هما دول.

باقة متنوعة، عالية الجودة، مسموح باعادة استخدامها.

وطبعا فيه عملاق الصور Shutterstock اللي في رايي لو معاك ميزانية تسمح، فورا اعمل اكونت واشترى باقة شهرية.

من ناحية هيكون معاك صور عالية الجودة جاهزة للاستخدام في أي وقت وفي أي مكان، ومن ناحية تانية هتدلع المصممين اللي معاك.

لو شغلك معتمد و/أو معاك ميزانية اشترك في Shutterstock.

4- الاداة اللي هتخلي عينك على كل جديد لحظة بلحظة “Feedly”

Feedly من الأدوات المحببة جدا لقلبي!

الفكرة ببساطة إن الادوات دى بتجمعك اهم وافضل المواضيع اللي تم نشرها على الانترنت يوميا في مواضيع انت بتختارها.

ودى فايدته ايه؟

أولا مصدر متجدد من أفكار المحتوى، وثانيا هتحسن مستواك في كتابة المحتوى لأنك هتشوف محتوى اكتر ومن مصادر مختلفة، وثالثا هتكون على دراية بكل جديد في المجال.

الأداة مجانية وتستحق وبالذات لو هتعمد على الـ Curation.

للى مش عارف، الـ Content Curation عبارة عن استراتيجية لإنتاج المحتوى معتمدة على كتابة موضوع جديد ولكن باستخدام لينكات لمواضيع قديمة سواء انت اللي عاملها أو لا.

بالظبط زي قطعة المحتوى دى (دوس هنا لو عايز تشوفها)

5- الاداة اللي هتساعدك تكتب محتوى أفضل من أفضل محتوى موجود على الانترنت

أداة BuzzSumo من الأدوات العظيمة جدا في اكتشاف المحتوى.

فكرتها ببساطة إنك بتكتب ويب سايت أو جملة معينة، وهى بتجيب لك اكتر محتوى حصل عليه تفاعل ومشاركة على وسائل التواصل الإجتماعي.

وبتساعدك كمان في اكتشاف ومعرفة مؤثرين مواقع التواصل الإجتماعي في مجال معين انت بتختاره.

6- الكنز اللي محدش واخد باله منه “Quora”

موقع Quora موقع اسئلة واجابات في تقريبا كل المواضيع اللي خلقها ربنا، بس بالانجليزي وعملوا منه نسخة عربي تحت التجريب.

الموقع عبارة عن مصدر متجدد لأفكار المحتوى، بالاضافة إنك ممكن تبني Structure والـ Outline بتاعت أي محتوى باستخدامه.

حقيقي لازم يوميا تبص عليه.

جمع أفكار محتوى من هناك واقلبها بالعربي بما يتناسب مع البيزنس والجمهور بتاعك، واستلهم مواضيع فرعية للمحتوى، واتعلم من اسئلة الناس.

7- اداة Similarweb

من اكتر الادوات اللي بستخدمها في تحليل أي موقع، الأداة فعلا بتديني معلومات قيمة جدا عن أي موقع، وموقعي أكيد.

على مستوى الكلمات المفتاحية اللي انا طالع فيها، الكلمات المفتاحية اللي المنافس طالع فيها، الترافيك جاي منين واهتمامات الجمهور ايه الخ.

الأداة مجانية وفيها جزء مدفوع.

وعندهم Extension لذيذة جدا بتديك نبذة مختصرة عن أي موقع بدوسة واحدة.

ومن خلالها تقدر تعرف ترتيب المواقع المتخصصة في قسم معين في بلدك، ودى ميزة بنت لذينة برضو لو انت شغال على مشروع كبير.

8- أدوات لعمل بحث كلمات مفتاحية (مجانية وبتدعم اللغة العربية)

ازاى تكتب محتوى يتصدر نتائج بحث جوجل؟

فيه حاجات كتيرة المفروض تعملها عشان المحتوى بتاعك يظهر في النتائج الأولي في جوجل، من أهمها بحث الكلمات المفتاحية (Keyword Research).

وعشان تعمل Keyword Research فيه طرق كتيرة، ولكن اتفق الجميع على إنك لازم تستخدم أدوات بحث الكلمات المفتاحية.

وهنا فيه مشكلة كبيرة أوى لينا كمسوقين عرب، وهي: إن قلما تلاقي أدوات بتدعم اللغة العربية بشكل صريح، بالاضافة إلى إن كتير من الادوات بتكون بفلوس.

دلوقتي هشارك معاك 7 أدوات مهمة جدا انا بستخدمها بشكل تبادلي.

الأدوات مجانية، وبتدعم اللغة العربية.

1- Keywords Everywhere

2- Answer The Public

3- KeywordTool.io (الافضل)

4- KWFinder (الافضل)

5- Keyworddit (لا تدعم العربية)

6- Google Trends

7- Google Keyword Planner

لو عايز تتعلم ازاى تستخدم كل اداة من الادوات الـ 7 دي في اكتشاف كلمات مفتاحية مميزة دوس هنا!

يلا بينا على اللي بعده!

9- موقع موضوع يقدم أدوات مهمة جدا لأي حد بيكتب محتوى بالعربي بالفصحي

كتابة المحتوى باللغة العربية الفصحى حاجة مش سهلة بالنسبة لناس كتير، لان كتير مننا بيقع في فخ الملل والرتابة نتيجة إن أفكاره اللي بتيجي في دماغه بالعامية مابيعرفش يترجمها صح للفصحى!

لكن بالممارسة، وقراءة محتوى بالفصحي وسماع ناس بتتكلم فصحى الموضوع بيكون سهل.

فيه ادوات كمان بتساعدك تكتب محتوى خالي من الملل، وبتسهل عليك الموضوع اكتر.

– أداة تشكيل من موقع موضوع

لو عايز تكتب بس مش عارف تشكل الكلام، الاداة دي بتعملك تشكيل على الجاهز.

– أداة التحليل العاطفي للنص من موضوع

باختصار بتدخل أي نص للاداة دي وهي بتقولك المحتوى بتاعك سلبي ولا ايجابي بنسبة كام في المية.

طبعا دى حاجة حلوة جدا، ولكن لو كانت بتديك نصائح أو بتعمل لك Highlight على الجمل الايجابية والسلبية كانت هتكون اكثر روعة.

ولكنها رائعة لان تقريبا الاولي اللي بتعمل تحليل عاطفي (Sentiments Analysis) لمحتوى باللغة العربية سواء عامي أو فصحي.

يلا بينا على اللي بعده …

10- أدوات أفكار المحتوى

عايز افكار محتوى ودماغك واقفة؟

جرب اداة Portent Title Maker  أو Hubspot Blog Topics Generator.

الاداتين دول بالانجليزي، اكتب اسم موضوع المحتوى، وشوف الاقتراحات، وخدها واعملها بالعربي.

11- ويكيبيديا

هي ويكيبيديا أداة لكتابة المحتوى؟

اه، ومن أقوى الأدوات كمان.

ويكيبيديا من المصادر العظيمة لأي صانع محتوى.

وده لأن اي محتوى بتقدمه ويكيبيديا بيكون ليه هيكل واضح، يقدر أي حد ياخده ويطوره ويبني هيكله الشخصي.

مثلا لو دخلت على صفحة التسويق في ويكيبيديا هتلاقي الفهرس ده …

ده هيكل جاهز تقدر تبني عليه أو تطور فيه وتعمل الهيكل المناسب ليك.

ميزة ويكيبيديا إن تقريبا مفيش موضوع محتوى مش هتلاقي عنه معلومات وهيكل عندهم.

نصيحة: في الويب العربي بص على موقع “موضوع دوت كوم ” وكل المواقع المشابهة.

12- مواقع الكورسات الاونلاين زى إدراك ورواق ويودمي وكورسيرا …

مثلا لو دخلت على الكورس بتاع رواق عن التسويق هتلاقي المادة العلمية بالشكل ده …

زي ما انت شايف، أفكار محتوى جاهزة لمواضيع فعلا الناس في المجال عايزة تعرف عنها.

طب انا المجال بتاعى مش موجود فيه كورسات بالعربي على مواقع الكورسات العربية اللي هي مش كتيرة أصلا، اعمل ايه؟

دور في مواقع الكورسات اللي بالإنجليزي، وخد أفكار المحتوى وهيكل المحتوى الإنجليزي واقلبه عربي.

انا مثلا كنت عايز اعمل محتوى عن تجارة الفوركس عبر الإنترنت، وفعلا عملت المقال وطلعت الموقع في أول صفحة في جوجل.

اللي عملته إن رحت داخل على يودمي وجبت كورس من الكورسات الحلوة على الموقع، وشفت المحتوى بتاعها، وعملت هيكلة المحتوى بتاعي بالاعتماد على الهيكل الموجود.

ده الهيكل بتاع الكورس اللي استعنت بيه …

دي الأفكار الرئيسية بس، إنما تحت كل جزئية من دول عشرات الأفكار، وكلها اتعملت في قطعة محتوى واحدة!

صحيح قطعة المحتوى كبرت أوى بس محدش في المجال من المنافسين هيقدر يعمل محتوى وافي بالشكل ده!

وبكده رفعت الموقع في جوجل للصفحة الأولي بعد ما كان في الصفحة الرابعة والخامسة، بالإضافة إني خليت صورة الشركة في السوق أحسن بكتير.

13- كتب أمازون

طب يا عم أسامة هروح اشتري كل الكتب، ولا حتى أقرأ كل الكتب دي؟

لا يا عم انا ماقولتش كده.

انت لا هتشتري الكتب، ولا هتقراها، إلا لو انت عايز طبعا.

كل اللي عليك إنك تكتب في جوجل “موضوع المحتوى” وجمبه كلمة كتب أو طبعا تدور بالإنجليزي عشان تلاقي نتائج عالية الجودة.

وبعدين تمسك أسماء الكتب دي، وتدخل تشوفها في موقع أمازون.

وبعدين تدوس على صورة الكتاب في صفحته في امازون، هيظهر لك أول صفحات الكتاب، وفهرس المحتوى.

خد فهرس المحتوى كهيكل أساسي للمحتوى وطور عليه.

تعالي أوريك الموضوع ده بشكل عملي …

تخيل إنك شغال في شركة عقارات، وعايز تعمل محتوى عن الاستثمار العقاري.

لو كتبت في جوجل كتب في الاستثمار العقاري مش هتوصل لحاجة مفيدة، إنما لو دورت بالإنجليزي وكتبت Real Estate Investment Books هتلاقي نتائج كتيرة مهمة.

ادخل على أمازون و تحديدا صفحة الكتب الأكثر مبيعا في المجال ده.

واختار كتاب منهم، أو امسك كتاب كتاب وشوف محتواه وهيكلته.

انا مثلا دخلت على أول كتاب على الشمال ودوست على صورته ، فظهر لى الكلام ده …

اتفرج على باقي المحتوى، هتلاقي ترتيب منطقي وهيكل محتوى تقدر تبني عليه أفكار لمحتوى فعلا محدش من المنافسين يقدر يعمل أحسن منها.

14- جوجل

جوجل هي اهم اداة لاي حد بيكتب محتوى بلا منازع.

انا بكتب أي موضوع لازم ادخل لحد الصفحة الـ 20، والـ 30!

انا دايما في وضع البحث، دايما فاتح جوجل، دايما بعمل بحث عن المواضيع اللي بكتبها حتى لو هرجع اقرا حاجات اساسيات جدا.

المحتوى اللي في جوجل أغلبه للمبتدئين، وأغلبه سطحي وعام، لو قدرت باستخدام المحتوى ده كله تعمل حاجة عميقة، وخطوة بخطوة، هتكسب كتير.

بلاش تدور على الموضوع من زاوية واحدة، هاته من كذا زاوية، هاته من كذا مصدر، اكتب حاجة تستاهل تطلع في النتيجة رقم #1.

15- تعلم باستمرار وطور نفسك

مفيش أداة هتحسن من مستواك وتطورك في كتابة المحتوى وفى التسويق عموما إلا العلام.

أضمن لك 100% إنك توصل للى انت عايزه لو بتتعلم وبتطور نفسك باستمرار.

وبس كده …

دوس هنا لو عايز تطور نفسك وتتعلم ازاى تعمل تسويق وترويج لاي منتج او خدمة باستخدام المحتوى بحيث تزود المبيعات وتحسن صورة البيزنس فى السوق 

أنت دلوقتي عرفت اكتر من 31 اداة من ادوات كتابة المحتوى اللى هتساعدك تكتب محتوى عالي الجودة ومحتوى حصرى افضل من المنافسين.

قولي فى كومنت، ايه المنطقة اللى عايز تطور نفسك فيها وتنفذها بثقة وتمكن؟