دليل المتخصصين لتصميم استراتيجية التسويق بالمحتوى!

ما هو هدف التسويق؟

 

لو اجابتك كانت أن هدف التسويق هو زيادة المبيعات

 

انت غلطان.

 

هدف التسويق هو جعل البيع أمر مفروغ منه وغير ضروري.

 

يعني المفروض من خلال التسويق تخلي العميل يشتري كنتيجة طبيعية، بتعبير تاني بتسهل شغلانة المبيعات.

 

طب ازاى ده يحصل؟

 

عن طريق المحتوى.

 

طب ازاى ده يحصل عن طريق المحتوى؟

 

هو ده موضوعنا انهاردة.

 

ركز معايا …

 

ما هو التسويق بالمحتوى (Content Marketing)؟

 

التسويق بالمحتوى هو استراتيجية تسويقية تعتمد على نشر محتوى مفيد بالنسبة للعميل وبيساعده في حل مشاكله بهدف كسب الثقة وجعل عملية البيع أمر مفروغ منه.

 

يعني التسويق بالمحتوى معتمد على صناعة/إنتاج المحتوى!

 

بس مش أي محتوى!

 

محتوى بيحل مشاكل العميل المحتمل.

 

يعني لو انا دلوقتي لو رحت شفت مشكلة عند العميل وكتبت مقال أو عملت فيديو واتكلمت عن المشكلة وأسبابها وقدمت حلول، العميل هيشتري منى انا؟

 

لا.

 

لو رحت عملت كده غالبا مش هتقدر تستمر اكتر من شهرين بالكتير!

 

وده مش الهدف!

 

الهدف انك تبني منظومة تسويق متكاملة تساعدك في جعل البيع أمر غير ضروري زي ما وضحنا.

 

عشان كده لازم يكون فيه تخطيط مُحكم للموضوع.

 

وده اللي هنتكلم فيه انهاردة …

 

انهاردة هنتكلم عن التسويق استراتيجية التسويق بالمحتوى (Content Marketing Strategy).

 

مقدمة لمفهوم استراتيجية التسويق بالمحتوى

 

قبل أي حاجة لازم نفهم بالظبط الفرق بين 3 حاجات:

 

  1. استراتيجية التسويق بالمحتوى

  2. استراتيجية المحتوى

  3. خطة المحتوى

 

استراتيجية التسويق بالمحتوى هو عبارة عن ملف مكتوب بيقولك ليه تكتب محتوى، والمحتوى يساعد مين بالظبط، وايه المواضيع اللي هتساعد العميل فيها احسن من اي حد تاني في السوق؟

 

استراتيجية المحتوى بتحدد بالظبط ازاى هتكتب المحتوى ده، وهتنشره امتي وفين، وبانهي شكل.

 

خطة المحتوى هي الخريطة اللي هتقولك في اليوم الفلاني المفروض تكتب كذا، ومين المسئول عن الكتابة والنشر والتصميم وخلافه.

 

طب انت محتاج ايه الاول؟

 

أول حاجة محتاج تطورها هي بدون نقاش استراتيجية التسويق بالمحتوى، وده لان دي البوصلة اللي هتقولك تعمل ايه بالظبط.

 

واستراتيجية وخطة المحتوى هتقولك تنفذ ازاى خطوة بخطوة.

 

وضحت؟

 

طب يا عم ما اروح اعمل محتوى عن اللي يجي في دماغي وخلاص؟

 

اتفضل، وهتنجح، بس لمدة قصيرة جدا.

 

هتطلع من المقال ده ومعاك استراتيجية التسويق بالمحتوى الخاصة بالبيزنس بتاعك او اللي انت شغال حاليا فيه (وهتكون قادر على تطوير استراتيجية لكل بيزنس تشتغل فيه).

 

يعنى هتخرج من المقال ده عارف بالظبط المفروض تكتب محتوى عن ايه، وتساعد بالمحتوى ده مين، وليه اصلا المفروض تعمل محتوى وكمان هقولك ازاى تنفذ الاستراتيجية دي.

 

جاهز؟

 

مكونات استراتيجية التسويق بالمحتوى

 

  1. العميل المحتمل

  2. رحلة الشراء الخاصة بالعميل المحتمل

  3. أهداف التسويق بالمحتوى (وهدف كل محتوى)

  4. الـ Content Marketing Mission Statement

  5. تحليل المنافسة في إطار التسويق بالمحتوى

 

1- العميل المحتمل

 

أهم ركن في استراتيجية التسويق بالمحتوى هو العميل المحتمل.

 

العميل المحتمل هو المدير الحقيقي للشركة، لو ماشتراش، المبيعات هتقل، والبيزنس هيكون هيقفل.

 

انت أصلا فاتح البيزنس عشان تخدم العميل.

 

يبقى بالعقل والمنطق، لازم تعرف العميل عايز ايه وتعمله.

 

طب ازاى افهم العميل المحتمل؟

 

دول 5 طرق مختلفة – مش بالضرورة تعتمد عليهم كلهم – ممكن تعتمد على طريقة أو اكتر عشان تعمل بحث سوقي (Market Research) لمعرفة وفهم العميل المحتمل.

 

1- اعمل بحث في المواقع اللي ممكن تلاقي فيها العميل بتاعك

 

زي موقع أمازون وموقع سوق دوت كوم وجوميا وكافة مواقع التسوق وأي موقع ليه وزن في المجال بتاعك.

 

وكمان جروبات الفيسبوك المتعلقة بالمجال واللى الزبون بتاعك متواجد ونشط فيها.

 

طب هتروح الاماكن دي تعمل ايه؟

 

هتلاحظ المشاكل اللي الناس دي بتتكلم فيها، وهتكتب الحلول اللي بيتناقشوا فيها مع بعض.

 

وهتفهم دوافعهم ومخاوفهم وآمالهم وأحلامهم في المنتج اللي نفسهم يكون موجود.

 

كل اللي عليك تبقى جزء من المجتمع بتاعهم، وتكتب الملاحظات اللي بتشوفها، لان الملاحظات دى هي اللي هتخليك أولا تعدل من المنتج/الخدمة بتاعتك، وكمان تستخدم اللغة اللي هما بيستخدموها في وصف مشاكلهم ورغباتهم.

 

2- اعمل بحث على المنافسين (Competitors Research)

 

الهدف من الخطوة دى مش زي ما كل الناس في المجال بيقولوا لك:

 

” اعرف المنافسين، اعرف نقاط قوتهم ونقاط ضعفهم”.

 

دى نصيحة حلوة مش وحشة، لكن غامضة ومش بتخليك تعمل أي حاجة غير إنك ترددها مرة تانية.

 

الهدف من الخطوة دى حاجة واحدة بس وهي:

 

معرفة الـ Positioning بتاع المنافسين، وإكتشاف أو تصحيح الـ Positioning بتاع شركتك.

 

معلومة عامة: الـ Positioning هو السبب اللي بيخلي الناس تتعامل مع شركة وتسيب شركة تانية بتقدم نفس الحاجة.

 

طب تعرف Positioning المنافسين منين؟

 

أولا تحدد المنافسين بأسمائهم، ثم ترتب المنافسين حسب القوة أو الأكثر تهديدا بالنسبة لك.

 

ثانيا تكتب جنب كل منافس الرسالة التسويقية اللي دايما بيكرروها لان هي دي الـ Positioning Statement بتاعتهم.

 

ثالثا تسأل الزباين بتوعهم، ودول تلاقيهم في نفس الأماكن اللي قولنا عليها في الطريقة اللي فاتت.

 

رابعا تسأل الموظفين بتوعهم لو تعرف.

 

خامسا تكون انت شخصيا زبون/عميل عندهم عشان تكتشف كل حاجة بيعملوها.

 

بمعرفتك للمعلومات دي، السوق بتاعك هيكون أوضح، لانك هتكون عرفت الزبون عايز ايه؟ وبيحصل عليه ازاى!

 

وبالتالي هتعرف تقدم حاجة مختلفة أو تقدم نفس الحاجة بس تعرضها بشكل مختلف أو تقدم حاجة أحسن من اللى موجودة بالفعل.

 

3- اعمل Surveys بطريقة صح

 

الـ Surveys من أهم وأقوى أدوات عمل بحوث السوق، ولكن بيتم استخدامها بطريقة غلط أو بطريقة مش بتوصل اللي بيعملها لحاجة واضحة.

 

السبب في الموضوع ده هو عدم تحديد وصياغة الأسئلة المطروحة بدقة.

 

وقت العميل فعلا غالي، ومش هيضيعه في حاجة مش مثيرة للإهتمام بالنسبة له.

 

يعني مثلا بدل ما تحط سؤال وتقول “ايه المشاكل اللي بتقابلها أو إيه أكبر مشكلة بتقابلها ….”

 

ده سؤال ملوش أي معنى، بدلا منه قول:

 

“المشكلة (الفلانية) اللي عندك هل هي كذا ولا كذا ولا كذا”.

 

4- اعمل مكالمات 1:1 مع الزبائن الحالية

 

جمع العملاء، وابدا اتكلم معاهم بشكل شخصي وحاول تعرف ليه هما اشتروا المنتج/الخدمة بتاعتك ورأيهم فيه والمشاكل اللي ساعدهم يحلوها.

 

5- بيع المنتج أو الخدمة قبل إطلاقها بشكل رسمي

 

دى من أهم الطرق اللي محدش بيتكلم عليها، وهي طريقة حلوة جدا في عمل بحث تسويقي قوي.

 

باختصار عبارة عن إنك تعرض المنتج بتاعك بصورة غير رسمية للبيع قبل ميعاده لعدد محدود من العملاء المحتملة بهدف دراسة ومعرفة آراء العملاء في المنتج أو الخدمة.

 

وبعدين تقوم بعملية التعديل أو الإطلاق مباشرة لو مفيش مشاكل ظهرت خلال المرحلة الأولى.

 

دول كانوا 5 طرق انا شايف ان مفيش غنى عنهم في عمل بحوث سوق وفهم الزباين المحتملة، بالإضافة لأنهم يعتبروا مصادر متجددة لأفكار المحتوى.

 

ملحوظة: لازم تختار العميل المحتمل اللي انت عايز تشتغل معاه قبل ما تروح تعمل بحث عنه (هاشتاج بديهيات).

 

2- رحلة الشراء الخاصة بالعميل المحتمل

 

العنصر ده من أهم العناصر في استراتيجية التسويق بالمحتوى نظرا لإنه يعتبر أساس تحقيق المبيعات عبر الإنترنت.

 

باختصار، رحلة الشراء عبارة عن عدة مراحل بيمر بيها العميل المحتمل بداية من كونه غير مهتم لحد ما يكون عميل بالفعل.

 

فيه نظريات كتير وأمثلة كتير على الموضوع ده، وبيتحط تحت مسميات كتير زي مثلا قمع المبيعات (Sales Funnel)، ورحلة المشتري (Buyer Journey).

 

في رأيي، كل النظريات دي مبنية على فكرة واحدة بس!

 

الفكرة دي هي مدى وعي العميل بالمشكلة/الحل/المنتج.

 

يعني قبل ما تكتب حرف واحد في المحتوى، لازم تحدد العميل اللي هتستهدفه يعرف ايه عن المحتوى اللي انت بتقوله، حدود معلوماته ايه؟ وهل المعلومات دي صح اصلا ولا مغلوطة؟

 

العميل المحتمل (أي زبون) بيمر بـ 5 مراحل مختلفة عشان يشتري المنتج أو الخدمة اللي الشركة بتقدمها، وهما:

 

1- غير واع بالمرة (Completely Unaware) 

2- واعي بالمشكلة (Problem-Aware) 

3- واعي بالحل (Solution-Aware) 

4- واعي بالمنتج (Product-Aware) 

5- الأكثر وعيا (The Most Aware) 

 

استراتيجية التسويق بالمحتوى

 

بين كل مرحلة من المراحل الخمسة دى، حائظ نفسي مطلوب منك تكسره بالمحتوى.

 

فيه عميل مايعرفش أي حاجة عن مشكلته ولا حلولها ولا المنتجات اللي بتحلها ولا أي حاجة خالص.

 

وعميل عارف انه عنده مشكلة، وبيحاول يفهم أصولها وأسبابها.

 

وعميل عارف المشكلة بتاعته ومحدد أسبابها، وبيدور على حلول مناسبة ليها.

 

وعميل عارف الحلول بس بيدور على منتج/خدمة يكون بيقدم له الحلول دي.

 

وعميل عارف المنتج/الخدمة وعارف هياخده من انهي شركة ونفسه فعلا يشتريه ولكن الموضوع واقف معاه على تفاصيل صغيرة مادية بحت.

 

في استراتيجية التسويق بالمحتوى لازم تكون محدد ايه المعلومات اللي هتقولها عن المنتج/الخدمة وازاى هتنقل العميل من مرحلة لمرحلة.

 

ملحوظة في غاية الاهمية: 

 

مش شرط كل المراحل تحصل في نفس القناة، ممكن اول مرحلة تعملها على الفيسبوك أو تويتر، وتاني عن طريق الويب سايت، وتالت مرحلة تكون على الويب سايت وتنقل الزبون ليها عن طريق Call to Action، ورابع مرحلة في الايميل، وخامس مرحلة في التليفون.

 

ملحوظة تانية:

 

مش شرط في كل مرحلة تعمل قطعة محتوى واحدة، ممكن 2 أو 3 أو 4 … 

 

على حسب كمية وعمق المعلومات اللي لازم الزبون يعرفها عشان يشتري أو ياخد خطوة لقدام في عملية الشراء.

 

ملحوظة تالتة:

 

مش شرط تبدأ من أول مرحلة، ممكن تاخد قرار استراتيجي بإنك تتجاهل استهداف الشريحة الغير واعية باي حاجة، وممكن تتجاهل شريحة الواعية بالمشكلة، وتستهدف الشريحة اللي بتدور على حل عامة.

 

لو عرفت مين هو العميل المحتمل وهو في أنهي مرحلة من المراحل الخمسة، ويعرف ايه من معلومات في المرحلة اللي هو فيها، هتقدر بكل سهولة تعمل له محتوى فعلا يخليه يشتري.

 

اهم حاجة انك بتعمل حساب لكتابة محتوى في كل مرحلة من المراحل الخمسة، ومتكتبش أي محتوى من غير ما تكون محدد مين العمل المستهدف وفي انهي مرحلة من المراحل الخمسة.

 

تمام؟

 

3- أهداف التسويق بالمحتوى (وهدف كل محتوى)

 

العادة التانية من كتاب العادات السبع للناس الأكثر فعالية للكاتب ستيفن كوفي بتقول:

 

Begin with the End in Mind يعني ابدأ والنهاية في رأسك.

 

لو انت مش عارف انت عايز توصل لإيه أو توصل فين، مش هتعرف توصل وهتفضل تايه! 

 

بديهية صح؟! 

 

طب ايه رايك بقى إن أغلب الناس عارفة الجملة دي، وبرضو ما بتعملش بيها.

 

من أكبر المشاكل اللي ممكن توقفك وتكرهك في كتابة المحتوى وأي حاجة الحقيقة، هي أنك تكون بتعملها من غير أي هدف.

 

معنديش افكار … لا انت معندكش هدف. 

 

معنديش صبر للكتابة … لا انت مش شايف هدف للكتابة. 

 

المجال الفلاني رخم … لا انت بس اللي مش عارف تحط هدف وتنفذ وفقا ليه.

 

وضع أهداف المحتوى بتكون كالآتي:

 

هدف البيزنس ← هدف التسويق ← هدف المحتوى

 

هدف البيزنس زيادة الإيرادات، التسويق يقول نزود المبيعات، التسويق بالمحتوى يقول نزود عدد الـ Leads.

 

هدف البيزنس زيادة الإيرادات، التسويق يقول تقلل تكلفة الإعلانات، التسويق بالمحتوى يقول نعمل محتوى بهدف Brand Awareness أو نعمل Viral Content.

 

طبعا دى مش أهداف ينفع حد يحطها، الهدف لازم يكون SMART.

 

ولكن انا بحاول اوصل لك الفكرة ببساطة.

 

أهداف التسويق بالمحتوى كتيرة، وأنا مش عايزك تحفظ أو تختار من مجموعة ثابتة من الأهداف! 

 

الصح انك تشوف عايز توصل لإيه، ثم تخطط للوصول ليه.

 

4- الـ Content Marketing Mission Statement

 

احنا متفقين ان التسويق بالمحتوى عبارة عن إنتاج محتوى، صح؟

 

السؤال بقي أي محتوى وخلاص؟

 

لازم يكون محتوى مفيد من وجهة نظر العميل وليه علاقة بمشكلات وتحديات العميل المحتمل.

 

طب ازاى تضمن أن يكون ليه علاقة وازاى تضمن انك تفضل مستمر إلى ما لا نهاية في إنتاج محتوى ليه علاقة ومتسق؟

 

عن طريق الـ Content Marketing Mission Statement اللي هي يعني ليه انت بتعمل المحتوى اللي بتعمله كل يوم؟

 

ليه انهاردة اتكلمت في الموضوع ده، وليه بكرة هتتكلم في الموضوع ده، وايه المواضيع اللي ممكن تتكلم فيها بعد سنة من دلوقتي!

 

الـ Content Marketing Mission Statement عبارة عن إقرار مكتوب مكون من 3 أجزاء، وهما:

 

  1. مين الناس اللي المحتوى ده هيساعدهم؟

  2. ايه بالظبط المحتوى اللي هما مهتمين بيه؟

  3. ايه بالظبط اللي المفروض يوصلوا ليه بعد استهلاك المحتوى؟

 

المفروض الـ Statement دي تبقى متسقة من الحاجة اللي انت بتقدمها، وتقولك تكتب الموضوع ده ولا لا.

 

طب تكتبها فين أو تستخدمها ازاى؟

 

اكتبها في البيو بتاعك في أي من وسائل التواصل الاجتماعي أو الموقع الإلكتروني أو اليوتيوب، وده لانها بمثابة إقرار باللى انت بتقدمه وبتقدمه لمين وبتقدمه ليه.

 

وضحت؟

 

عايز تشوف أمثلة؟

 

يلا بينا …

 

موقع شوبيفاي الغني عن التعريف في مجال التجارة الإلكترونية …

 

استراتيجية التسويق بالمحتوى

 

بيقولك احنا هنا هنقدملك تعليم، نصائح، الهام مجانا عشان نساعدك تبدأ وتكبر بيزنس ناجح.

 

وبالتالي أي موضوع بيتكلموا فيه على موقعهم والمدونة بتكون في الاتجاه ده.

 

مثال كمان …

 

استراتيجية التسويق بالمحتوى

شركة Moz هي أشهر شركة في مجال الـ SEO في العالم وبتقدم حلول وأدوات مهمة جدا في المجال.

 

المهم ان هما بيقولوا ان Moz هو المكان اللي هتلاقي فيه خبراء أو زي ما بنقول فى مصر عتاولة المجال بيقدموا أفضل النصائح، الأبحاث، الطرق، والمعرفة عشان نساعدك تطور مستواك في مهارات الـ SEO والتسويق الالكتروني.

 

 

مثال كمان من شركة ريد بول الشهيرة في مجال مشروبات الطاقة …

 

بيقولوا جرب عالم ريد بول كما لم تراه من قبل، مع أفضل مقاطع الرياضة والأحداث الأصلية على اليوتيوب.

 

ولو دخلت على اليويتوب بتاعهم مش هتلاقي أي محتوى خارج إطار النقطة دى.

 

وضحت؟

 

العنصر ده من أهم عناصر استراتيجية التسويق بالمحتوى لانه بيحدد لك هتقول ايه ومش هتقول ايه.

 

وكمان عمرك ما هتتكلم مع جمهور غير جمهورك، وده معناه إن اللي هتقوله هيتم التفاعل معاه.

 

5- تحليل المنافسة في إطار التسويق بالمحتوى

 

احنا عايشين في عالم تنافسي من الدرجة الاولي، وده لان عدد الشركات وعدد الاعلانات كتير اوى!

 

عشان كده لازم تعمل محتوى يكسب محتوى المنافسين.

 

تخيل مثلا إن منافس ليك مسيطر على كلمة مفتاحية معينة وطالع في النتيجة رقم #1 في جوجل، تعمل ايه؟

 

تعمل محتوى احسن من المحتوى بتاعه، وبكدة هتطلع مكانه وعدد الناس اللي كانت بتدخل موقعه، هتيجي عندك انت، وبكده نسبة المبيعات عندك هتزيد.

 

الهدف من وجود العنصر ده داخل استراتيجية التسويق بالمحتوى هو إيجاد نقاط إختلاف في المحتوى اللي انت هتقدمه عشان المحتوى بتاعك يغرد خارج السرب وحيدا منفردا.

 

طب ركز بقي عشان اللي جاي صعب تلاقيه فى اى مصدر تاني.

 

3 أمور لازم تعرفها عن المنافسين في إطار التسويق بالمحتوى:

 

1- الفلسفة أو المنظور (Core Philosophy)

 

المطلوب بعد ما بتحدد المنافسين بتوعك، امسك منافس منافس وشوف مواضيع المحتوى اللي دايما بيتكلم عنها، وبيتكلم عنها من انهي منظور أو زاوية رؤية؟

 

مثلا لو انت في مجال التسويق والاعلانات، فيه منافس بيتكلم عن ان الاعلانات هتدفع كذا وهتاخد كذا، ومنافس تاني بيقول إن المظهر والـ Branding اهم شئ.

 

انت ممكن تتكلم عن تحقيق المبيعات باستخدام الإعلانات المكتوبة بذكاء.

 

مساحة محدش غيرك بيتكلم فيها او على الاقل مساحه تبرز فيها اختلافك.

 

مثلا لو انت في مجال العقارات، فيه منافس بيتكلم عن إن البيت خصوصية ورفاهية، وحد تاني بيتكلم عن الامان والخدمات، وحد تالت بيتكلم عن المساحات والهدوء، وحد رابع بيتكلم عن الفلوس والاستثمار.

 

دورك تكتشف المواضيع أو الفلسفة اللي كل منافس مؤمن بيها وبيقولها على طول، عشان تقدر تعمل محتوى مختلف عنه.

 

2- أسلوب الكتابة (Writing Style)

 

احنا متفقين اننا كمسوقين بالمحتوى أصلا كُتاب، ولكل كاتب أسلوب خاص بيه نابع من اختلاف منظوره على فكرة.

 

انا مثلا منظوري الشخصي إن أي حد بيتعلم أي حاجة لازم تتقدم له المعلومات متسلسلة وخطوة بخطوة عشان يقدر يستوعبها ويطبقها بسهولة.

 

عشان كده تلاقي أي محتوى بقدمه بيكون تقدمي يعني بيظهر بالتدريج، يعني بيتكشف سطر بسطر، وكل سطر مربوط باللي قبله، وخطوة بخطوة.

 

انا اخترت الاسلوب ده بعد ما شفت أساليب الناس التانية اللي في المجال، وقررت إني أعمل كده.

 

لازم تحدد أسلوب الكتابة بتاع المنافس يعني النبرة اللي بيتكلم بيها في المحتوى (بود، ولا بتريقة، ولا بحماس، ولا بهزار، ولا بأسلوب علمي …).

 

الألفاظ والكلمات المستخدمة ومدى سلاسة وسهولة اللغة (ألفاظ غامضة، ولا بسيط، ولا فلسفي، ولا ألفاظ قديمة ولا بيحشر كلمات بالانجليزي ينفع تتقال بالعربي …).

 

المحتوى بتاعه طويل ولا قصير ولا متوسط.

 

3- القنوات التسويقية

 

لازم تعرف القنوات التسويقية اللي بينشر عليها المنافس بشكل مستمر، هل عنده قائمة بريدية نشطة ولا عنده ويب سايت قوي ولا ايه بالظبط؟

 

اعرف كل المعلومات دي عشان تستخدمها في معرفة وتحديد شكل المحتوى اللي هتقدمه واللي لازم يكون مختلف، لأنه بالضرورة هيعمل لك سمعة إنك كشركة أو كمنتج مختلف وهو المطلوب.

 

تمام؟

 

دراستك لمحتوى المنافس هو نقطة أساسية في تطوير استراتيجية التسويق بالمحتوى اللي هتساعدك في إنتاج محتوى بشكل مستمر ومتسق مع الجمهور المستهدف والمنتج أو الخدمة اللي انت بتقدمها.

 

دلوقتي انت معاك استراتيجية التسويق بالمحتوى يعني عارف هتعمل ايه، بس لسه مش عارف هتعمل ده ازاى؟

 

وده اللي هنتكلم فيه دلوقتي …

 

مكونات استراتيجية المحتوى

 

  1. قائمة المواضيع الرئيسية والفرعية

  2. قنوات النشر الأساسية وقنوات التوزيع

  3. أنواع واتجاهات المحتوى التسويقي

 

1- قائمة المواضيع الرئيسية والفرعية

 

دلوقتي هات ورقة وقلم، واكتب قائمة بكل المواضيع اللي تخدم الـ Content Marketing Mission Statement، واللى هي المواضيع اللي انت هتكتب أو هتصور عنها محتوى.

 

المواضيع دى اللى انت تعتبر متخصص وخبير فيها.

 

المواضيع اللي الناس هتعرفك بسببها.

 

ومن المواضيع دى طلع مواضيع فرعية.

 

وبس كده …

 

 

عشان تفهم قصدى دى عينة من المواضيع الرئيسية اللي موقع شوبيفاي بيتكلم فيها، واللى بيتكلم فيها بناء على الهدف اللي هو وعد الجمهور المستهدف بتاعه انه هيساعدهم في تحقيقه.

 

وضحت؟

 

2- قنوات النشر الأساسية وقنوات التوزيع

 

لازم في استراتيجية المحتوى تكون محدد من الاول قنوات النشر الأساسية للمحتوى اللي هتعمله يعني مثلا الموقع الالكتروني، اليوتيوب، الفيسبوك …

 

ومحدد كمان المحتوى ده هتعمله توزيع وترويج فين؟ يعني ايميل، فيسبوك، تويتر …

 

دى نقطة بسيطة ولكن لازم تاخد فيها قرار من بدري، وده لانها هتنعكس على طبيعة ونوع المحتوى اللي انت هتعمله بعد كده.

 

3- أنواع واتجاهات المحتوى التسويقي

 

على أي أساس يتم تقسيم وتصنيف المحتوى؟

 

من وجهة نظري على 5 محاور، وهما:

 

1- على حسب القنوات التسويقية اللي هيتم نشر المحتوى فيها

 

عندك المحتوى الإجتماعي اللي هو الـ Social Content، وهو محتوى بيتم نشره على وسائل التواصل الإجتماعي المختلفة من فيسبوك وتويتر ولينكد إن وانستجرام وسناب شات إلخ.

 

المحتوى ده بيختلف عن أي محتوى إنه بيكون إجتماعي، يعني قصة أو فكرة أو حكاية الناس ممكن تتكلم وتتلم حواليها.

 

عندك محتوى الإيميل اللي هو الـ Email Content، وهو عبارة عن محتوى بيتم نشره عبر الإيميل من أجل المبيعات غالبا، وطبعا توطيد العلاقة مع العملاء سواء المحتملين أو السابقين.

 

إذن يوجد لكل قناة تسويقية نوع محتوى خاص بها يختلف حسب طبيعة القناة التي يٌنشر فيها.

 

2- على حسب هدف المحتوى

 

عندك الـ PR Content وهو المحتوى اللي بيتعمل بغرض جذب انتباه وسائل الإعلام و العامة.

 

وعندك الـ Lead Generation Content وهو المحتوى اللي بيتعمل عشان إكتساب Leads جداد كخطوة أولية لتحقيق مبيعات.

 

وعندك الـ SEO Content اللي بيتعمل عشان الظهور في جوجل في مرتبة متقدمة في نتائج البحث الخاصة بكلمات مفتاحية معينة.

 

وعندك الـ Sales Content اللي بيتعمل بغرض تحقيق مبيعات بشكل مباشر.

 

و عندك الـ Evergrean Content وده بيتعمل بغرض – غالبا – الـ Brand Awareness والـ Branding.

 

إذن حسب كل هدف، المحتوى بياخد طبيعة مختلفة.

 

3- على حسب إستراتيجية كتابة المحتوى

 

الـ Curation والـ Recycling والـ Repurposing تعتبر استراتيجيات بيتم استخدامها لتحقيق أهداف معينة ضمن استراتيجية التسويق بالمحتوى.

 

الفرق بين الـ Recycling والـ Repurposing وقولت إن الأولي عبارة عن إعادة استخدام المحتوى لخلق محتوى جديد تماما، إنما الأخري هي مجرد عملية تحويل المحتوى من شكل لآخر.

 

أما الـ Curation عبارة عن إحدى إستراتيجيات المحتوى اللى بيتم فيها الاستعانة أو إحياء المحتوى القديم اللي انت عملته قبل كده، وربطه كله ببعض في موضوع معين.

 

زي مثلا أما تعمل محتوى عن ازاى تتعلم اون لاين، وتجمع فيه لينكات كل المحتوى اللي عملته وليه علاقة بالموضوع ده.

 

4- على حسب مراحل السليز فانل

 

عندك الـ Attractive Content اللي هو المحتوى اللي كل مهتمه إن يجذب الجمهور المستهدف للموقع الإلكتروني.

 

وعندك الـ Conversion Content اللى مسئوليته تحويل الزبون من زبون محتمل لـ زبون بالفعل، وغيرهم وغيرهم.

 

إذن على حسب مراحل أو مسار التسويق، فيه محتوى لكل مرحلة.

 

5- على حسب طبيعة وشكل المحتوى نفسه

 

أنواع المحتوى بشكل أساسي تندرج تحت 3 أقسام رئيسية: 

 

المكتوب، المسموع، والمرئي.

 

وبيحصل عملية تطويع (Formatting) لكل محتوى عشان يتحول لشكل مختلف.

 

دوس هنا لو عايز تتعلم كتابة وإنتاج كل المحتويات دي

 

وبكدة عملت استراتيجية التسويق بالمحتوى، وكمان استراتيجية المحتوى، ودلوقتي ناقص مرحلة التنفيذ الفعلي بقي …

 

مرحلة خطة المحتوى التنفيذية …

 

واللى بعد ما تحضرها هتنطلق في كتابة أو تسجيل أو تصوير المحتوى والنشر بشكل مستمر.

 

خطة المحتوى التنفيذية

 

خطة المحتوى دورها انك تقول ان في شهر 10 المفروض تنفذ افكار المحتوى دي، على القنوات دي، في الميعاد ده، واللى هيقوم بالتنفيذ وإنتاج المحتوى هو فلان وفلان!

 

اخر اسبوع من الشهر الحالي، يعني قبل اسبوع من الشهر اللي جاي، اقعد مع نفسك أو مع الفريق بتاعك وفكروا هتتكلموا عن ايه كأفكار محتوى، وبعدين خدوا الافكار دي ونظموها في خطة المحتوى.

 

وبس كده …

 

تعالي الاول نتكلم عن أفكار المحتوى …

 

أفكار المحتوى

 

العمود الفقري للتسويق بالمحتوى في رأيي الشخصي هو أفكار المحتوى.

 

نظرا لأن أفكار المحتوى تعتبر أفكار إعلانات، وفكرة محتوى واحدة تقدر تكسب البيزنس كتير أو تخسره كتير زي ما كانت الاعلانات بتعمل زمان.

 

لازم أفكار محتوى كل شهر تكون جاهزة قبل ما الشهر ما يبدأ على الأقل بأسبوع.

 

ملحوظة في غاية الاهمية في أفكار المحتوى:

 

تعامل مع أفكار المحتوى وكأنها أفكار لحملات تسويقية/إعلانية، يعني أفكار الشهر اعتبرها حملة تسويقية واحدة ليها شكل ومضمون واحد ورسائل كتير ولكن بترمي لنفس الحاجة.

 

ولو انت بتقدم خدمة وواخد اتجاه تعليم الزبون (Customer Education) يبقى كل شهر بتتكلم في موضوع واحد ومن جوانب كتيرة.

 

طب تجيب الافكار منين؟

 

من كل حتة.

 

  • خلي دايما معاك ورقة وقلم في كل مكان ، وأكتب أي فكرة تيجي في دماغك.

 

  • شغل Pocket أو Feedly واي حاجة تعجبك على الانترنت احفظها. 

 

  • اعمل جروب على الفيسبوك وجمع فيه كل فكرة تعجبك أو وجهة نظر ممكن يطلع منها أفكار وأفكار.

 

  • اعمل Retweet لأي فكرة أو حاجة ممكن تلهمك بفكرة في تويتر وابقي بص على الاكونت بتاعك من فترة للتانية. 

 

  • اسال كتير، واسال الأسئلة الصح والمهمة، السؤال أحسن طريقة لإكتشاف العالم.

 

  • خدلك لفة في المواقع اللي بتحبها ايا كان المجال، وأرشف الفكرة اللي تعجبك أو الحاجة اللي تحس انها ممكن تلهمك بأفكار تانية.

 

  • اوعي تغفل الـ Trends وأحداث البلد والعجايب اللي بتحصل في كل مكان في العالم.

 

  • اقرأ واتعلم حاجات مش في المجال اللي هتشتغل فيه، دى من احسن الإستراتيجيات – عن تجربة – اللي ممكن تجيبلك افكار فعلا عظيمة.

 

طب جبت الأفكار اللي هتنفذها، تعمل ايه؟

 

حطها في Editorial Calendar …

 

الـ Editorial Calendar

 

الـ Editorial Calendar عبارة عن أداة تنظيمية وإدارية، الهدف منها معرفة المحتوى الفلاني هيتم نشره في الحتة الفلانية في اليوم الفلاني في الساعة الفلانية والشخص المسئول عن كل ده هو مين؟

 

وفيه على الإنترنت أمثلة كتيرة، زي:

 

 

الـ Editorial Calendar لازم يكون فيها كل العناصر اللي تخليك بمجرد ما تبص فيها تعرف في اليوم الفلاني المفروض يحصل ايه!

 

ممكن تعمل واحدة كبيرة لكل القنوات التسويقية مع بعض، او لو لكل قناة استراتيجية منفصلة عن غيرها، يبقي اعمل واحدة لكل قناة على حدة.

 

أهم 7 عناصر لازم تكون موجودة في أي Editorial Calendar:

 

1- فكرة المحتوى

2- عنوان المحتوى

3- القناة اللي هينزل عليها المحتوى

4- قنوات توزيع المحتوى

5- ميعاد نشر المحتوى (اليوم والوقت)

6- المسئول عن عمل المحتوى ونشر المحتوى

7- الحالة (لسه متعملش، اتعمل والتصميم لسه ماخلص، تم النشر، ملغي)

 

وبكدة يكون انت عملت استراتيجية التسويق بالمحتوى، واستراتيجية المحتوى، وخطة المحتوى التنفيذية، ولوقتي اقص ايه؟

 

التنفيذ فعلا.

 

اكتب أو صور أو سجل وبعدين انشر.

 

وكرر العمليات دى كل شهر.


وبكدة تبقى انت عرفت المفروض تتكلم مع مين، وتقوله ايه، وهتفيده ازاى من خلال استراتيجية التسويق بالمحتوى، وعرفت ازاى هتنفذ الكلام ده كله من خل استراتيجية وخطة المحتوى.

28 thoughts on “دليل المتخصصين لتصميم استراتيجية التسويق بالمحتوى!”

  1. مقال مثمر جدًا..
    Moz عتاولة السيو
    مستر اسامة صلاح اكبر عتاولة التسويق بالمحتوى ♥

    Reply
  2. شكرا على المعلومات المفيدة. ربنا يباركلك ويجزيك كل الخير
    انا بقدم خدمات تحرير الفيديو و الموشن جرافيك لاصحاب بيزنس مختلفين
    ازاي اقدم محتوى يناسبهم جميعا؟

    Reply
  3. اولا شكرا لحضرتك انا بشتغل ماركتير فى عقارات وديكور وسياحه كنت بستعين بالمحتوى باشخاص لحد مافى شخص سالنى كتبتى بلان اةكونتينت بلان لاى شخص كان زى حد دلق ميا ساقعه فى البرد عليا قررت وانت ساعدتنى فعلا شكر بس انا حابه اتعلم اكتر لو فى وقت تساعدنى

    Reply
    • أشكرك يا يسرا، اقرا المقال كمان مرة، وبعدين اسالى فى اللى انت عايزاه مفيش اي مشكلة …

      Reply
  4. شكراً جدا جدا لحضرتك على مجهودك الرائع ده وإخلاصك في إنك تقدملنا المعلومة بصورة بسيطة وسلسة
    ربنا يجازي حضرتك كل خير يارب وربنا يوفقك

    Reply
  5. انا تهت جدا ، هو المفروض انى بسوق للبيزنس بتاعى انا ، انا عايزه اسوق لاصحاب البيزنس مش هو ده عمل ال Marketing content

    Reply
  6. معلومات رائعه جدا
    انا جديده على التسويق ومحتاجه ترشدنى ابدأ ازاى تحياتى لك
    وربنا يوفقك ويجعله فى ميزان حسناتك

    Reply
  7. انا حاسة ان حضرتك بتسوق لكتابك فقط انا بقالي ساعه بقرا مش فاهمه ايه التسويق بالمحتوي

    Reply
    • ازيك يا استاذة نفين، أولا بعتذرلك جدا لو حسيتي انى بسوق لكتابي، بس انا ماجبتش سيرة اي كتاب من كتبي غير كتاب SEO Content Playbook وعلى سبيل المثال مش اكتر.

      بالنسبة لجزئية إن حضرتك مش فاهمة ايه هو التسويق بالمحتوى اصلا، فانت فى المقال الغلط للاسف، المقال ده عن الاستراتيجية بتاعت التسويق بالمحتوى، إنما لو حابة تتعلمي عن التسويق بالمحتوى ويعني ايه وكل حاجة، انصحك تبدأ من هنا …

      1- https://osamasalah.com/content-marketing/

      2- https://osamasalah.com/marketing-online/

      طلب بعد اذنك عشان اقدر اساعدك بصورة اكثر فعالية، ممكن تردى عليا وتقولي بتشتغلي ايه بالظبط او عايزة تتشغلي فى انهي مجال وايه الخطوات اللى اخدتيها بالفعل لده؟

      تحياتي ^^

      Reply
  8. انا متلغبطة شوية ومحتاجة اعرف الفرق بين هدف التسويق وهدف المحتوى في الخطة التسويقية ؟
    وايه اهداف المحتوى بشكل عام غير الbrandawareness – leads?
    شكرا جدا :)

    Reply
    • المحتوى اداة من اداوت التسويق، وعلميا او خلينا نقول فى الظروف المثالية بيكون فيه مدير تسويق بيكون غالبا مسئول عن السليز كهدف، بالتالي بيتم وضع هدف لفريق المحتوى انه يجيب عدد معين من الـ Leads، بحيث يتم تحويل عدد منه لزبائن، الغرض من كل ده اصلا هي الوصول للغرض والهدف من كل نشاط تسويقي بيحصل زى المحتوى مصلا، وضحت؟

      الاهداف كتيرة، بس مش مهم تحفظيها، انت عايزة توصلي لايه؟

      Reply

Leave a Comment