مهارات التسويق: أهم 22 مهارة لازم تتعلمها فى 2023!

في المقال ده هنتكلم عن 22 مهارة أساسية لازم تكون ضمن صندوق مهارات التسويق بتاعك.

اي مهنة في الدنيا عبارة عن حاجتين:

1- معرفة

2- مهارات

وبعد شوية وقت ونتيجة لدراسة المعرفة دى بشكل صحيح واكتساب المهارات اللازمة لتنفيذ المهنة بتتكون الخبرات أو الحس الفني.

اذن عشان تكون محترف في تنفيذ استراتيجيات التسويق المختلفة لازم تكتسب وتتعلم مهارات التسويق الأساسية!

وده اللي هنتكلم عنه النهاردة …

في المقال ده هنتكلم عن 22 مهارة أساسية لازم تكون موجودة في صندوق مهارات التسويق بتاعك.

يلا نبدأ … 

1- الإستماع (Listening)

فيه فرق بين إنك تسمع، وإنك تستمع.

بالانجليزي تسمع يعني Hear إنما تستمتع يعني Listen.

الاولانية Physiological، والتانية Psychological.

المطلوب إنك تستمتع مش تسمع.

كلمة اسمعك، تحسها كده طبيعية مفيهاش جهد!

إنما استمع ليك، ايوة ليك انت، انت بالذات، يعني هاعمل مجهود إضافي عشان اسمعك، وده لانى مهتم بيك.

الـ Listening بيترجم نفسيا عند اللى بيتكلم إن الشخص اللى بيسمعه ده مقدر مشاعره ومتفهم وضعه وقرارته ومهتم بيه.

وده اللي المفروض أي مسوق محترف يعمله …

طب وده اعمله ازاى؟

دّرب نفسك عليه.

أي كومنت، رسالة، ايميل، مكالمة تليفونية، كومنت في جروب، كومنت في موقع، أي كلام يقوله الزبون في أي مكان على الانترنت لازم تسمعه وتكتب ملاحظاتك عنه.

ملحوظة: مهارة الاستماع من أهم مهارات التسويق اللي بتحدد ما إذا كنت هتنفع تبقى مسوق ولا لا، وبتحدد إذا كنت هتكون من المحترفين ولا هتفضل على قد حالك طول العمر.

2- الشرح (Illustrating)

أينشتاين بيقول “إذا لم تستطع شرح فكرتك لطفل عمره 6 أعوام فأنت نفسك لم تفهمها بعد”.

أنت كمسوق وظيفتك استخدام الرسائل التسويقية المختلفة في أشكال مختلفة عشان تشجع العميل المحتمل انه يشتري!

يعني وظيفتك تشرح للجمهور المعلومات اللي هما بيدوروا عليها بطريقة بسيطة سهلة الفهم.

فلو انت مش بتعرف تشرح، هتلاقي مشكلة في مجال التسويق، ولكن ده مش معناه إنك تسيب المجال وتمشي، لا، خلي عندك مثابرة، اتعلم.

هات صحابك واختار موضوع ما وحاول تشرحه بالتفصيل وشوف هل هيفهموا كل كلمة بتقولها ولا لا!

هات اخواتك الصغيرين والكبار وحاول تشرح لهم موضوع معين بس يكون مرة ملوش علاقة باهتماماتهم، ومرة ليه علاقة باهتماماتهم، وشوف هيفهموا اللي هتقولوا ولا لا.

3- ازاى تتعلم (Learning)

أثمن مهارة عندك هي أنك تكون بتعرف تتعلم.

إحنا في عصر المعلومات، والمصادر كتيرة، واللى المفروض تتعلمه أكتر وأكتر، واصلا انت مطلوب منك أنك تعلم الناس، ومش هتعرف تعلم الناس إلا أما تكون بتعرف تتعلم.

لازم تتعلم ازاى تتعلم.

ده كورس مجاني من منصة رواق مهم في الجزئية دى. 

كونك بتعرف تتعلم ازاى، ده بيفتحلك سكك ماكونتش تتصور انها في يوم ممكن تفتتح.

المهارة دى من أهم المهارات اللي لازم تكون موجودة  ضمن مهارات التسويق بتاعتك!

وده لاننا – كمسوقين – بنكتب محتوى تسويقي في مجالات كتير، ولازم نكون فاهمين في المجالات دي، فلو مش بنعرف نتعلم وبسرعة، هنقع بسرعة.

وكمان عشان الشخص اللي بيعرف يتعلم لوحده، ده كنز بالنسبة لأي شركة، لانه دايما هيطور نفسه.

4- التعاطف الفكري (Empathy)

أنا بحب فلان، أنا مرتاح لفلان، أنا بثق في فلان، أنا بحب أتكلم مع فلان، أنا هاروح أشكي لفلان، أنا هاحكي لفلان، فلان ده هو الوحيد اللى هيسمعني.

السبب؟

حاجة إسمها الـ Empathy، وترجمتها الحرفي التقمص العاطفي.

التقمص العاطفي يعني القدرة على فهم مشاعر وظروف الأخر من وجهة نظره هو، يعني فهم وتقدير ظروف الغير لان ممكن في يوم أكون انا مكانه.

فيه ناس كتير بتبص للأمور من منظورها الشخصي بس، وبتهمل متعمدة أو غير متعمدة وجهة النظر الأخرى!

أو بمعنى أدق ما بتعرفش تحط نفسها مكان الناس التانية ودايما بتفكر فى نفسها وبس.

الحل بسيط لكنه مش سهل، حط نفسك مكان الآخر.

اعتبر نفسك مكانه قبل ما تحكم عليه، قبل ما تلومه، قبل ما تتخانق معاه، اخلع نظارتك وألبس نظارة الآخر.

مفيش حاجة إسمها الزبون ده غبي.

الناس دى عندها مشاكل وأنت اللي قررت بمحض إرادتك أنك تتدخل وتحلها، يبقى تصبر وتحاول تتفهم موقفهم ودوافعهم عشان تقدر تبيع لهم.

المهارة دى هتخليك توصل لأكتر من ¾ فعالية المحتوى قبل ما تبدا تعمله أصلا!

ليه؟

انت عارف الزبون بتاعك كويس، عارف هو عايز ايه، ومتفهم هو عايزه ليه، وبالتالي هتقدر تقدم له اللي هو عايزه، وده المطلوب.

5- التبسيط (Simplifying)

انت ممكن تشرح موضوع المحتوى، ولكن تاخد وقت كبير جدا في شرح اللي انت عايزه!

أو تسحب كهربا زيادة من مخ المتلقي، أو تخليه يبذل مجهود كبير عشان يفهم اللي انت عايزه!

صحيح في الاخر انت شرحت اللي عايز تقوله ولكن هل دي احسن طريقة؟

التبسيط هو الإجابة.

البساطة هي أنك تشيل كل الحاجات اللي مش ضرورية، كل حرف وكل كلمة لا تؤدي غرض.

فيه ناس فاكرة إن كل ما تحط معلومات كتيرة عمال على بطال في قطعة المحتوى تبان مبهرة، لكن ده غلط تماما!

الناس دلوقتي مش عايزة تنبهر، الناس عايزة حاجة تنجز، حاجة تقول لهم يعملوا ايه في الوقت المناسب في الظرف المناسب.

ودى تتعلمها ازاى؟

اجبر نفسك انت تعبر عن كل موضوع بتعمله في تويتة واحدة، وإن ماقدرتش يبقى تحاول مرة واتنين وتلاتة.

بس خد بالك الحج اينشتاين بيقولك “ينبغي أن نبسّط كل شيء بقدر الإمكان، ولكن دون أن نفرط في تبسيطه”.

اتفرج على الدحيح وشوف هو ازاى كصانع محتوى بيبسط العلوم والمواضيع اللي بيتكلم عنها.

6- الإبداع (Creativity)

هو الإبداع مهارة؟

اه مهارة، وطالما مهارة يبقى ينفع نتعلمها.

طب هو يعني ايه إبداع أصلا؟

الـ Creativity هي عمل روابط جديدة بين أشياء قديمة، عشان في الأخر تظهر حاجة جديدة تماما، أو يعني زي ما قال ستيف جوبز Connect the dots …

الفكرة مابتجيش من فراغ، بيكون فيه شوية حاجات قديمة، وفيه حد بيشوف اللي محدش عارف يشوفه، بيتكشف روابط بين الأشياء محدش قادر غيره يشوفها، وبناء عليه بيطلع بحاجة مبتكرة جديدة، هي دى الـ Creativity.

7- مهارة الاستقراء

القدرة على رؤية سيناريوهات المستقبل، والقدرة على استنباط وفهم طبيعة الأمور سريعا، والقدرة على التحليل والخروج بنتيجة سريعة أقرب للصواب هي دى مهارة الاستقراء.

المهارة دى من مهارات التسويق اللي محدش بيتكلم عنها وده بسبب ان اللي بيستخدمها غالبا بيكون مدير المشروع أو مدير التسويق لأنه جوهر شغله بييكون معتمد على بناء الاستراتيجيات المستقبلية للشركة.

عشان تتعلم المهارة دى، فأنت لازم تدرس أسواق كتيرة، وصناعات مختلفة، وتحاول تفهم عوامل النجاح والفشل في كل صناعة، ومرة مع مرة هتتطور المهارة دى عندك.

8- الإقناع (Persuading)

الإقناع من مهارات التسويق اللي لازم تكون متمكن فيها بنسبة 99.99%!

وده لان انت كواحد بتاع تسويق مابتعملش حاجة غير انك بتقنع الجماهير بالحجة والمنطق والعاطفة.

وده عشان تخلي البيع سهل أو امر مفروغ منه!

طبعا موضوع الاقناع ده كبير شوية ولكن كبداية انصحك تقرا كتاب Influence للدكتور Robert Cialdini، وموجود مترجم بالعربي.

9- مهارة السؤال الصح

التعليم الكويس مش اللى يعلمك ازاى تجاوب على الأسئلة صح، إنما اللى يعلمك تسأل الأسئلة الصح.

الجملة اللى فاتت دى هي معيار الحكم – من وجهة نظري – على أي تعليم أيا كان فين.

معيار الحكم على جودة أي كتاب بقراه، أى مقال بتعلم منه حاجة أو أي فيديو بتفرج عليه، أو أي كورس باخده.

أصل لو التعليم هيخليك تجاوب على الأسئلة صح، يبقى أنت هتحفظ لا محالة، هتضطر تحفظ مواقف بعينها عشان تعرف تجاوب!

إنما لو التعليم هيخليك تسأل الأسئلة الصح فأنت هتتعلم ازاى تفكر وإزاى تاخد قرار فى موقف ربما ماشوفتش قبل كدة!

المسوق المحترف فاهم مش حافظ، عارف أيا كان الوضع، ايه الاسئلة اللى لما تتسأل، كل حاجة تبان والموقف يتحل.

دوس هنا لو عايز تعرف وتحصل على الكتب اللي هتساعدك تحترف علم التسويق بالمحتوى وتحل أي مشكلة تخص التسويق بالمحتوى من بداية ظهور أول أعراضها بشكل نهائي.

10- مهارة حل المشكلات

اقرأ Case studies على قد ما تقدر، وادخل فى تجارب مختلفة ومتنوعة.

لو عملت كده مع الوقت، هتلاقي نفسك قادر على حل أي مشكلة بتشوفها ولا سيما مشاكل العملاء بتوعك.

11- مهارات التواصل الفعال (Communication Skills)

انت كمسوق مش بس بتتواصل مع الجمهور المستهدف بتاعك، إنما بتتواصل مع فريق عمل مختلف عنك في السمات الشخصية والمهام الوظيفية، وكمان بتتواصل مع المديرين، وده بيتطلب مهارات عالية في التواصل.

حتى لو انت شغال فرى لانسر ومش معاك تيم، فلازم أكيد هتتواصل مع العملاء.

أيا كان وظيفتك أو دورك في الشركة مهارات التواصل السليم مكون أساسي من مكونات صندوق مهارات التسويق بتاعك.

12- كتابة المحتوى (Content Writing) 

الطبيعي عند اي مسوق الكتروني هو كتابة محتوى، فلو انت مش عارف تكتب، يبقى عندك مشكلة كبيرة اوى فى مجال التسويق.

الكتابة أكيد موهبة، ولكنها مهارة برضو، وكمان علم.

طالما هى مهارة يبقي ينفع تتعلمها، وطالما علم يبقي ينفع تدرسه، ونتيجة إتقان المهارة، والمعرفة القوية بالعلم هتتولد عندك الموهبة والحس الفني.

انا عامل كورس عن طريق الإيميل في موضوع كتابة المحتوى، والكورس بالرغم من قيمة العالية اللي تعدي 3000 جنيه، إلا إنه مجاني.

أعتقد إنك اخدته، ولو ماخدتوش مفيش مشكلة …

دوس هنا للتسجيل مجانا فورا.

13- الكلام قدام العامة (Public Speaking)

من أهم أنواع المحتوى هو الفيديو، وأكتر حاجة مانعة المسوقين من الاعتماد على الفيديو هي ضعف مهاراتهم في الكلام قدام العامة.

لو انت عندك Startup والمهارة دى عندك عالية، يبقي ابدأ فورا في سلسلة Video Content عن المشكلة اللي شركتك المؤقتة بتحلها، وابقي ادعيلي أما تحقق الـ Traction اللي نفسك فيه.

ملحوظة: لو مش فاهم الفقرة اللي فاتت دى، ده معناه انك عمرك ما فتحت ستارت اب ولا اشتغلت في واحدة!

تتعلم المهارة دى ازاى؟

بسيطة، تناسي أي مخاوف واطلع للناس، هيجري ايه يعني؟

ما انت دلوقتي خايف أو مش جاهز او متردد و مفيش حاجة حصلت.

اتدرب كتير على المهارة دي، وشوف بداية الدحيح ومعظم الناس بتاعت اليوتيوب كانت ازاى.

14- البحث (Research)

أحد أهم مهارات التسويق على الإطلاق هي مهارة البحث!

وده لان المهارة دى بتسمح لك تبني Credibility!

الـ Credibility يعني أقل نسبة شك في المعلومة المطروحة، وأكبر نسبة ودرجة تصديق و ثقة للمعلومة.

طب أقل نسبة شك، وأكبر نسبة تصديق هتيجى ازاى؟

عليك نور، بإجراء بحث عميق (يا جماعة انا بدخل لحد الصفحة العاشرة في جوجل، وسعات للصفحة العشرين).

مش بس كده، انا بدور في أمازون، وبدور في كتب، و سعات بلجا لورق بحثي، انا مدرك تماما لأهمية المهارة دى، والحمد لله أدعي أنها من أقوى المهارات عندى.

طب ودى تتعلمها ازاى؟

أولا أوعي تستهل، وتقول حرف ملوش مرجعية، عشان لو جالك نقد تعرف تواجهه بكل ثقة وحزم.

ثانيا روح اتعلم ازاى تدور في جوجل، وفي كل المواقع المشابهة.

ثالثا لازم تروح تدور على موضوع واحد كل يوم بغرض تفلية الإنترنت فيه حرفيا، يعني مايكونش فيه حرف اتقال عنه انت مش على علم بيه.

15- توليد الأفكار (Ideation)

التسويق = أفكار.

بغض النظر عن اتفاقك أو اختلافك مع الجملة اللي فاتت دى، ولكن الحقيقة ان التسويق عبارة عن شوية أفكار …

أفكار مناسبة لجمهور مستهدف محدد، وليها علاقة بمنتج أو خدمة بعينها!

أفكار بيتم عرضها بصور مختلفة على قنوات تسويقية مختلفة في أوقات مختلفة!

فهمت حاجة؟

عشان كده مفيش واحد بيشتغل في التسويق وصندوق مهارات التسويق بتاعه مفهوش المهارة دى!

 كمان كام اسبوع هتلاقي مقالات متنوعة تغطى حكاية الافكار دى بالتفصيل.

16- مهارات اللغة السليمة (Language)

كل لغة في الدنيا ليها قواعدها الخاصة، وليها طابع مميز ليها، والأكيد أن ليها روح وثقافة أهلها.

لو بتكتب محتوى عربي أو أنجليزي أو لاوندى، لازم تكون عارف قواعد اللغة، وطريقة الكلام.

لو فصحي يبقى النحو و الهمزات، لو عامي شوف التعبيرات الشائعة اللي بيتم استخدامها.

لو إنجليزي يبقي لازم تبقي شارب اللغة كأنك واحد من أهلها، ده لو عايز توصل لأكبر تأثير بالمحتوى بتاعك.

17- تجربة المستخدم (UX)

انا كنت محظوظ لأن أول كتاب اكتبه في حياتي (450 صفحة) كان عن علم الـ UX، وكان تحديدا عن Process تفصيلية بتشرح الموضوع من الاول للاخر.

واتعلمت بدرى اهمية الـ UX، وقد ايه هو مهم للتسويق عموما والتسويق الالكتروني خصوصا.

ومن ساعتها والمهارة دى فى صندوق مهارات التسويق بتاعي.

طب هل المطلوب أنك تبقى خبير في الـ UX؟

لو تقدر اكيد هتبقي ميزة تنافسية عندك، وهتفتح قدامك Potential وخاصة لو هتشتغل فى Startup.

ولكن كل المطلوب منك انت تعرف الأساسيات وتحاول تطبق قدر الإمكان.

أكاديمية حسوب قامت بإنتاج كتاب محترم جدا، ومترجم عن Crash Course أجنبي، فيه أغلب إن مكانش كل الأساسيات اللي انت محتاج تتعرف عليها.

ده كتاب أكاديمية حسوب، وده الكورس الأصلي.

تعلم المبادئ الأساسية، وابدع في طريقة تطبيقها.

18- حكي القصص (Storytelling) 

يا تري إيه أهم صفة شكلت نجاح ستيف جوبز؟

الإجابة هي الـ Storytelling.

العم جوبز بيقولك إتفضل ألف أغنية في جيبك، بيقولك انت عبقري ومختلف بس لو استخدمت الجهاز بتاعنا.

جوبز خير من يحكي، والناس تسمع وتسقف.

خليك زي جوبز.

19- كتابة الإعلانات (Copywriting)

يعني ايه Copywriting؟

الـ Copywriting هو فن وعلم كتابة Copy.

يعني ايه Copy؟

الـ Copy عبارة عن محتوى الغرض منه إقناع الزبون المحتمل بمنتج أو خدمة معينة و التأثير على قراره الشرائي عشان يشتري المنتج/الخدمة بشكل مباشر.

وصف المنتجات في مواقع الـ E Commerce يعتبر Copy، الايميلات اللي بتيجي لك وغرضها البيع عبارة عن Copy.

الاعلانات اللي بتشوفها على النت دي برضو Copy، المحتوى اللي بيكون فى الـ Landing Pages والـ Sales Pages برضو عبارة عن Copy.

الـ Copywriter بيكتب عنوان أي قطعة محتوى، وبيكتب الـ Call to Actions كمان.

باختصار أي كلام في البيزنس غرضه البيع، بيكتبه الـ Copywriter.

المهارة دي في رأيي الشخصي ضرورية في صندوق مهارات التسويق بتاع أي شخص بيشتغل أي حاجة في المجال..

20- التخطيط (Planning)

التخطيط مهارة مهمة عشان تتسلق أي سلم وظيفي في أي شركة، ومهمة عشان تحقق نجاح في حياتك الشخصية، ومهمة عشان تنجح أي مشروع انت مساهم فيك أو تمتلكه.

التخطيط بسيط جدا يا جماعة، الموضوع بيبدأ بهدف محتاجين نحققه، فنبتدى نخطط عشان ده يحصل، وهنا تكمن خطورة وحساسية المهارة دى!

لازم يكون عند المسوق مهارات وضع الاهداف، ورسم خطط تنفيذية استراتيجية لتحقيق الاهداف دي.

21- التحليل (Analysis)

من احب المهارات لقلبي هي مهارة التحليل، لانى شايف – بعكس ناس كتير – إن المهارة دى مكون مهم  من مكونات مهارة الإبداع!

أصل عشان تكتشف روابط خفية بين أمور ممكن تبان لحد عادى انها مش مرتبطة، لازم مستوى عال من التحليل.

انت أصلا كمسوق مطلوب منك تحلل شغلك، وشغل المنافسين، وشغل القوى المؤثرة على السوق، وتحلل السوق، وكل ده بشكل مستمر وشبه يومي.

وعشان تتعلم المهارة دى، فأنت لازم تبتدى تبص للأمور بنظرة مختلفة …

أولا مفيش حاجة اسمها صدفة في الشغلانة بتاعتنا دى، كل حاجة لسبب، ودورك أنك تعرف السبب ده.

ثانيا مفيش حاجة ليها وش واحد، ومفيش حاجة إتجاه واحد، كل شئ في الكوكب ليها طبقة تانية، وكل حاجة ليها أكتر من إتجاه، لازم تبقى فاهم ده كويس أوى.

خلي عندك فضول إنك تعرف أكتر …

وخد بالك الداتا اه مهمة، بس الأهم هو ازاى تقراها وتحولها لخطة تنقل البيزنس خطوة لقدام.

ازاى من شوية أرقام أو إحصائيات تتوصل لـ Insight يخليك تاخد Educated Decision يطور من الشركة اللي انت مسئول عنها، أو يخليك تعمل استراتيجية تكبر البيزنس.

المهارة دى من أهم مهارات التسويق وأهميتها هتزيد الفترة اللي جاية.

22- مبادئ التصميم

المسوق دائما في اتصال مع مصمم الجرافيك!

ده عنده فكرة عايز التاني ينفذها، وده عايز يبعت له التصميم ومايكونش فيه أي تعديلات!

ده يقول لده انت اللى غلطان، وده يقول لده انت اللي مش شاطر!

انا ماليش دعوة بالمصمم هنا، انا ليا دعوة بالمسوق.

بص يا سيدي، مفيش حد يقدر يقرا دماغك ولا يشوف الفكرة بتاعتك زي ما اهي موجودة في دماغك بالظبط!

يعني ايه؟

يعني لو ماعرفتش توصل فكرتك صح بوضوح للمصمم، لا تلومن إلا نفسك، هو هينفذ اللي هيفهمه منك، الموضوع كله في ايدك انت.

طيب جالك التصميم وانت عايز تشوفه مناسب ولا لأ، تعمل ايه؟

بص على توازن الألوان، الخطوط، الأيقونات والرسومات والشخصيات المستخدمة كرموز للتعبير عن فكرة المحتوى.

وبص على مدى وضوح الفكرة عن طريق الـ Alignment و الـ Hierarchy والـ Contrast الموجود في التصميم.

الخلاصة: لازم تتعلم مبادئ التصميم عشان انت بتشتغل مع مصممين، بس مش لازم تعمل بنفسك التصميم، دي شغلانة منفصلة ملهاش دعوة بكونك مسوق.

وبكده أكون شرحت لك الـ 22 مهارة اللي لازم تطورها وتخليها ضمن صندوق مهارات التسويق بتاعك.

قولى في تعليق، ايه المهارات التانية اللي انت شايف ان كل الناس في مجال التسويق لازم تتعلمها …