fbpx

الـ Content Repurposing: كتابة المحتوى بطريقة سهلة وذكية!

ازاى تعيد استخدام نفس قطعة المحتوى بشكل استراتيجي، وتنتج محتوى جديد يوميا بدون كتابة حرف واحد جديد؟ 

 

فيه واحد مشهور اسمه Gary Vaynerchuk، الراجل ده باستخدام التسويق المحتوى قدر يوصل – في 5 سنين بس – بالبيزنس بتاعه عائلته من 5 مليون دولار في المبيعات لـ 60 مليون دولار.

 

بس مش ده المهم!

 

العم Gary عنده برنامج على اليوتيوب اسمه The #AskGaryVee Show بينشر فيه نصائح وأفكار لشباب الجامعة والمسوقين ورواد الاعمال واصحاب الشركات.

 

البرنامج ناجح جدا، والمحتوى فعلا مفيد.

 

ركز بقي …

 

في 8 مارس 2016، عمك Gary حول حلقات برنامج اليوتيوب لكتاب.

 

الكتاب نزل وكسر الدنيا، وحقق مبيعات كبيرة.

 

اللي عمله Gary في علم التسويق بالمحتوى اسمه Content Repurposing.

 

في الدليل ده، هشرح لك كل حاجة عملها Gary ولازم تكون انت عارفها عن الـ Content Repurposing.

 

قبل ما نبدأ فيه قصة تانية لازم تعرفها …

 

في واحد مشهور برضو اسمه Evan Carmichael عامل برنامج حلو جدا على اليوتيوب اسمه Top 10 Rules for Success.

 

الاستاذ Evan بيسال أكتر ناس ناجحة في العالم في كل المجالات تقريبا وخصوصا مجال البيزنس وريادة الأعمال عن اكتر 10 حاجات خلتهم ينجحوا!

 

بس فيه حاجة!

 

Evan مش بيروح يقابل الناس دي، ده بيجمع من فيديوهاتهم ومقالاتهم اللي عملوها قبل كده.

 

ودى استراتيجية مشهورة في التسويق بالمحتوى اسمها Content Curation هنبقي نشرحها بعدين.

 

المهم إن العم Evan في 1 ديسمبر 2017 أعاد استخدام محتوى البرنامج ده، وعمل كتاب بنفس الاسم.

 

الاستاذ Evan من أكتر الناس الملهمة في صناعة المحتوى نظرا لانه تقريبا مش بيتنج محتوى جديد، إنما باستخدام محتوى الغير قدر يبني إمبراطورية في اليوتيوب وشهرة كبيرة جدا في أوساط البيزنس.

 

سواء Evan أو Gary الاتنين اعتمدوا على التسويق بالمحتوى في بناء البيزنس بتاعهم، وتحديدا على استراتيجية الـ Content Repurposing زي ما شرحنا.

 

يعني ايه Content Repurposing؟

 

الـ Content Repurposing (أو الـ Content Recycling) عبارة عن استراتيجية لكتابة المحتوى بحيث يتم فيها إعادة استخدام كل أو جزء من المحتوى بدون كتابة محتوى جديد.

 

بتعبير تاني الـ Content Repurposing هو تحويل المحتوى من شكل لآخر دون تغيير مضمون المحتوى، ونشره على مختلف القنوات التسويقية.

 

يعني المقال اللي انت بتقرا فيه دلوقتي ده ممكن يتحول بالكامل لفيديو، أو جزء منه لبوست على الفيسبوك وهكذا …

 

وهو ده بالظبط الـ Content Repurposing.

 

وضحت؟

 

طب والاستراتيجية دى مهمة اوى؟

 

فوائد الـ Content Repurposing

 

كتابة قطعة محتوى جديدة مكلفة جدا من حيث الوقت، عايزة Research كبير، كتابة، تنسيق، مراجعة، توزيع وترويج …

 

الاستراتيجية دى بتوفر وقت كبير وبتزود الإنتاجية عن طريق إنها بتسمح لك بنشر محتوى جديد كل يوم – على كل القنوات التسويقية مهما كان عددها – من غير ما تضطر تكتب كل يوم محتوى جديد!

 

لو ماعندكش أفكار محتوى حلوة في الوقت الحالي، ومش قادر تكتب محتوى جديد تتفاعل بيه مع الجمهور المستهدف على مختلف القنوات عشان يحسوا انك موجود معاهم دايما، الاستراتيجية دي هتساعدك.

 

لو انت شغال لوحدك ومفيش موارد كبيرة لإنتاج محتوى بشكل مستمر، الاستراتيجية دي هتقولك ازاى تعمل من المحتوى القديم فعلا محتوى جديد.

 

فضلا طبعا عن إعادة استخدام المحتوى القديم في ثوب جديد بيساعد موقعك الالكتروني في الصعود للنتائج الاولي في جوجل.

 

وبيزود لك عدد زوار الموقع شهريا، وبيحافظ على الاستمرارية اللي هي مفتاح كسب الثقة، اللي هي اهم مفتاح لتحقيق مبيعات اون لاين.

 

تمام؟

 

طب ازاى تعمل Repurposing للـ Content؟

 

3 طرق رئيسية لعمل الـ Content Repurposing

 

انا دلوقتى هشرحلك 3 طرق لعمل الـ Content Repurposing، وهما:

 

1- تحويل المحتوى المرئي لمحتوى مكتوب أو محتوى مسموع أو محتوى مرئي

 

2- تحويل المحتوى المسموع لمحتوى مكتوب أو محتوى مسموع أو محتوى مرئي

 

3-  تحويل المحتوى المكتوب لمحتوى مكتوب أو محتوى مسموع أو محتوى مرئي

 

لو متلغبط ركز …

 

أصل كل محتوى هو إما مكتوب أو مسموع أو مرئي!

 

وجميع أنواع المحتوى المعروفة بتندرج تحت التصنيف ده، وبما إن الـ Content Repurposing عبارة عن عملية تحويل المحتوى من صورة لأخرى …

 

إذن طرق عمل وتطبيق الـ Content Repurposing تتمحور حول تحويل المحتوى المكتوب/المسموع/المرئي للصور الأخرى.

 

يلا بينا ندخل في التفاصيل …

 

1- حول اي فيديو على اليوتيوب بتاعك لمقال على موقعك

 

لو فيه فيديوهات على اليوتيوب أو على الفيسبوك، اسمعها ثم فرغها واكتبها كمقال على الويب سايت بتاعك.

 

2- حول اكتر فيديو جاب مشاهدات وتفاعل على اليوتيوب أو الفيسبوك لـ كتاب الكتروني

 

الكتاب الإلكتروني من أشهر أنواع المحتوى اللي بتساعدك في اكتساب Leads بطريقة مجانية.

 

الفكرة انك بتقدم قيمة عالية جدا لحل مشكلة او اكتر من اللي بيعاني منها الجمهور المستهدف – مجانا.

 

وفى المقابل بتاخد الأذن المتمثل في بعض البيانات الشخصية لتسويق المنتجات أو الخدمات المدفوعة أمام الجمهور ده.

 

3- حول أي ويبينار لسلسلة من المقالات على الموقع

 

الويبنار زي محاضرة اون لاين بيكون مدتها غالبا من 1 لـ 3 ساعات، وبيتم فيها شرح موضوع معين بالتفصيل.

 

امسك الويبنار ده وفصصه وقسمه لـ 3 – 10 مقالات على الويب سايت.

 

وكده بقي معاك محتوى كتير، وعالي الجودة من غير كتابة أو تأليف محتوى جديد.

 

4- حول أي انفوجرافيك لمقال من النوع “القوائم”

 

الانفوجرافيك غالبا ما بيكون عبارة عن معلومات مرقمة في شكل قائمة، صح ولا ايه؟

 

المطلوب منك تاخد الانفوجرافيك ده وتمسك عنصر عنصر من العناصر اللي فيه وتتكلم عليه باستفاضة، وكده بقي معاك مقال تسويقي محترم.

 

5- حول حول الفيديوهات لـ Gifs

 

عايز محتوى تفاعلي على الفيسبوك بس ماعندكش أفكار جديدة؟ حول أي فيديو لمجموعة من الـ Gifs.

 

عايز أفكار تانية؟

 

6- حول أي بودكاست لمقال How-To أو List

7- حول أفضل مقالات الـ How-To على موقعك لفيديو

8- حول أفضل محتوى القوائم عندك لـ إنفوجرافيك

9- حول أي مقال لبوستات على الفيسبوك، وتويتات على تويتر

10- حول مجموعة متصلة من المقالات لكتاب الكتروني

 

الأفكار كتيرة، بس انت نفذ.

 

الخلاصة

 

عايز تبني البيزنس بتاعك زي Gary وEven وغيرهم؟ عايز البيزنس بتاعتك يكون كبير وينجح؟

 

اعتمد على التسويق بالمحتوى اعتماد كلي.

 

الفيسبوك عمال يقلل في نسب الوصول وبقي مستحيل – زى ما ناس كتير بتقول – توصل لأهدافك من غير اعلانات مدفوعة!

 

وهنا السؤال يطرح نفسه: ليه تعتمد على قناة غير مملوكة ليك وتبقى تحت رحمة مارك ولا غيره؟

 

لو قلت لك هعملك برنامج على قناة CBC هيتم إذاعته كل يوم الساعة 8 بالليل، وببلاش.

 

توافق؟

 

اكيد هتوافق.

 

طب ما اليوتيوب موجود وببلاش برضو!

 

طب لو قلت لك هخلي المصرى اليوم، واليوم السابع والجمهورية والوطن ينشروا عن شركتك ومنتجاتك وخدماتك مقال كل يوم بشكل مجاني، توافق؟

 

أكيد طبعا هتوافق.

 

طب ما تعمل الويب سايت بتاعك وتنشر اللي انت عايزه في أي وقت.

 

افضل طريقة للتسويق هي بناء أصول تسويقية (Marketing Assets)، والاصول التسويقية دي متمثلة في إنتاج محتوى عالي الجودة مفيد يهم الجمهور المستهدف بتاعك.

 

ملحوظة: انت لازم تعتمد على الاعلانات المدفوعة وغيرها من استراتيجيات التسويق لو لاقيت انها مناسبة ليك، انما انا اقصد هنا عدم تعتمد على الاعلانات كاستراتيجية رئيسية لو بطلت تدفع في يوم ماتلاقيش ولو صاحب المنصة الإعلانية حب يضيقها عليك يعمل كده.

 

الصح عدم وضع البيض كله في سلة واحدة.

 

وبس كده …

أضف تعليق