4 استراتيجيات لكتابة المحتوى (خطوة واحدة وتبقى من المحترفين)

أنت على بُعد خطوة واحدة وتكون من المحترفين!

المحترفين هما الناس اللي بتقوم بالشغل صح وفى وقت قليل!

في المقال ده هقولك على الخطوة اللي لازم تبدأ بيها لان دى أسرع طريقة لكتابة المحتوى …

وهقولك على 4 طرق عملية انا شخصيا بعتمد عليها لتطبيق الخطوة دى بنجاح وبسهولة!

جاهز؟

إيه هي الخطوة اللى تختصر لك ساعات من وقت كتابة أي محتوى؟

ملحوظة: ساعات دي مش مجرد كلمة وخلاص، فعلا الخطوة دي لو بدأت بيها هتختصر ساعات من وقت كتابة المحتوى.

الخطوة دي انت غالبا عارفها، بس يمكن مش عارف قيمتها بشكل كافي!

الخطوة دي هي الـ Outline.

يعني أنك تخطط لكل فكرة هتكتبها قبل ما تبدأ في الكتابة فعلا.

الموضوع بيمشي كده …

بتقول مثلا انا عايز اكتب محتوى عن “كذا”!

وبعدين بتعمل حاجة من الـ 4 حاجات دول:

1- بتروح تكتب اللى فى دماغك عن الموضوع وخلاص!

2- بتروح تدور على معلومات اكتر في جوجل عن الموضوع!

3- بتكتب أول سطرين وبعدين بتقف وبتفكر تغير الموضوع اصلا!

4- بتشوف محتوى مكتوب قبل كده سواء بالعربي او بالاجنبي وتعيد كتابته!

صح ولا مش صح؟

الحل السحري لكل التحديات دى هى أنك ببساطة أولا وقبل أي حاجة تعمل Outline.

للى مش عارف: Outline يعني فهرس.

يعني تكتب عناصر الموضوع اللى ناوي تكتب فيه قبل ما تكتب حرف واحد.

ازاى تعمل الموضوع ده؟

هقولك دلوقتي 4 استراتيجيات مجربة تقدر تعتمد عليها لعمل Outline لكتابة أي محتوى.

1- استراتيجية يودمي في كتابة المحتوى

2- استراتيجية ويكيبيديا في كتابة المحتوى

3- استراتيجية كتب أمازون في كتابة المحتوى

4- استراتيجية كورا للاسئلة والاجوبة في كتابة المحتوى

جاهز؟

يلا بينا …

1- استراتيجية يودمي في كتابة المحتوى

موقع يودمي هو موقع للكورسات المتنوعة في كل المجالات تقريبا، وفيه زيه كتير اوى بالانجليزي وطبعا فيه بالعربي زي موقع رواق …

مثلا لو دخلت على الكورس بتاع رواق عن التسويق هتلاقي المادة العملية بالشكل ده …

زي ما انت شايف، هيكل محتوى جاهز، لا وكمان افكار محتوى جاهزة لمواضيع فعلا الناس في المجال عايزة تعرف عنها.

طب انا المجال بتاعى مش موجود فيه كورسات بالعربي على مواقع الكورسات العربية اللي هي مش كتيرة أصلا، اعمل ايه؟

دور في مواقع الكورسات اللي بالإنجليزي، وخد أفكار المحتوى وهيكل المحتوى الإنجليزي واقلبه عربي.

انا مثلا كنت عايز اعمل محتوى عن تجارة الفوركس عبر الإنترنت، وفعلا عملت المقال وطلعت الموقع في الصفحة رقم #1 في جوجل.

اللي عملته إن رحت داخل على يودمي وجبت كورس من الكورسات الحلوة على الموقع، وشفت المحتوى بتاعها، وعملت Outline المحتوى بتاعي بالاعتماد على الـ Outline الموجود.

ده Outline الكورس اللي استعنت بيه …

دي الأفكار الرئيسية بس، إنما تحت كل جزئية من دول عشرات الأفكار، وكلها اتعملت في قطعة محتوى واحدة!

صحيح قطعة المحتوى كبرت اوى بس محدش في المجال من المنافسين هيقدر يعمل محتوى وافي بالشكل ده!

وبكده رفعت الموقع في جوجل للصفحة الأولي بعد ما كان في الصفحة الرابعة والخامسة، بالإضافة إني خليت صورة الشركة في السوق أحسن بكتير.

ودى الأفكار الرئيسية اللي عبرت عنها في قطعة المحتوى دى …

سهلة الطريقة؟

روح جربها دلوقتي.

2- استراتيجية ويكيبيديا في كتابة المحتوى

ويكيبيديا من المصادر العظيمة لأي صانع محتوى، وخصوصا في الخطوة دى.

وده لأن أي محتوى بتقدمه ويكيبيديا بيكون ليه Outline واضح.

مثلا لو دخلت على صفحة التسويق في ويكيبيديا هتلاقي الفهرس ده …

ده فهرس جاهز تقدر تبني عليه أو تطور فيه وتعمل الفهرس المناسب ليك.

مش بس كده، على الشمال هتلاقى عمود زي ده بالظبط …

تقدر تاخد الخطوط العريضة دى وتطور بيها الـ Outline بتاعك.

وطبعا تقدر تستخدم ويكيبيديا كأداة لبحث الكلمات المفتاحية أو الخروج بأفكار جديدة لمحتوى كل شهر.

3- استراتيجية كتب أمازون في كتابة المحتوى

تالت طريقة لبناء Outline المحتوى هو النظر في الكتب سواء المراجع أو الكتب الموجودة في مجال موضوع المحتوى اللي بتتكلم عنه.

طب يا عم أسامة هروح اشتري كل الكتب، ولا حتى أقرأ كل الكتب دي؟

لا يا عم انا ماقولتش كده.

انت لا هتشتري الكتب، ولا هتقراها، إلا لو انت عايز طبعا.

كل اللي عليك إنك تكتب في جوجل “موضوع المحتوى” وجمبه كلمة “كتب” أو طبعا تدور بالإنجليزي عشان تلاقي نتائج عالية الجودة.

وبعدين تمسك أسماء الكتب دي، وتدخل تشوفها في موقع أمازون.

وبعدين تدوس على صورة الكتاب في صفحته في امازون، هيظهر لك أول صفحات الكتاب، وفهرس المحتوى.

خد فهرس المحتوى كـ Outline أساسي وطور عليه.

تعالي نشوف الموضوع ده بشكل عملي …

تخيل انك شغال في شركة عقارات، وعايز تعمل محتوى عن الاستثمار العقاري.

لو كتبت في جوجل كتب في الاستثمار العقاري مش هتوصل لحاجة مفيدة، إنما لو دورت بالإنجليزي وكتبت Real Estate Investment Books هتلاقي نتائج كتيرة مهمة.

ادخل على أمازون و تحديدا صفحة الكتب الأكثر مبيعا في المجال ده.

واختار كتاب منهم، أو امسك كتاب كتاب وشوف محتواه.

انا مثلا دخلت على أول كتاب على الشمال ودوست على صورته، فظهر لى الكلام ده …

اتفرج على باقي المحتوى، هتلاقي Outline محتوى تقدر تبني عليه أفكار لمحتوى فعلا محدش من المنافسين يقدر يعمل أحسن منها.

4- استراتيجية كورا للاسئلة والاجوبة في كتابة المحتوى

واحدة من أسرع الطرق لكتابة محتوى مفيد يساعدك فى الظهور قدام جمهورك المستهدف بشكل جميل، ويخليهم يحبوك بسرعة هو الإجابة على أهم الأسئلة اللى بتدور فى بالهم!

ازاى؟

1- ادخل موقع Quora بالنسخة العربي والانجليزي

2- دور على أكتر 3 أقسام ليهم علاقة بمجال تخصصك

3- افتح ملف وورد، واكتب أهم 10 أسئلة هتشوفها بالاجابات المتاحة

4- اختار أهم 5 أسئلة وافضل 5 إجابات، وروح دور على إجابة كل سؤال فى جوجل!

5- اكتب الـ 5 اسئلة في مقال أو بوست او فيديو وانشر!

6- كرر الخطوات دى مرة تانية!

وبس كده …

سواء هتكتب بوست على الفيسبوك أو مقال على الويب سايت أو حتى كتاب كامل كبير لازم تبدأ مراحل كتابة المحتوى بخطوة الـ Outline.

معاك اسبوع لكتابة المحتوى أو ماعندكش غير ساعة ابدأ بخطوة الـ Outline.

خطوة الـ Outline هى اسرع طريقة لكتابة المحتوى، والـ 4 طرق اللي قلت عليها هما أفضل طرق لتنفيذ الخطوة دى.

لو حسيت ان المقال فرق معاك يبقى ماتبخلش بالمعلومات دى لنفسك!

تعمل ايه؟

شير يا برنس.

Bonus: ازاى تكتشف لنفسك طرق تانية لتطبيق خطوة الـ Outline؟

1- ذاكر كل يوم ساعة واحدة بس!

أنا بطلب منك ساعة كل يوم، ساعة واحدة بس، عايز تركيزك يكون 100% في الساعة دي.

ادخل على المواقع التعليمية فى مجال التسويق بالمحتوى، اقعد فى كل موقع من 3 لـ 10 دقايق، شوف المقالات اللى تم كتابتها، اعمل لها Scan سريع، ولو حاجة جديدة أو متقدمة بطريقة جديدة تحل مشكلة قديمة، اقراها بتعمن.

لو ماعندكش خُلق للمواقع، اختار لك كتاب بعينه يكون منظم وممنهج ومقدم حل أو حلول لمشكلة أو أكتر من اللى عندك، أو كتاب يساعدك تكون أحسن، أسرع، أشطر، أكثر فهما وعمقا …

واقرا فيه كل يوم ساعة واحدة بس، لحد ما يخلص، وادخل على اللى بعده وهكذا.

لو برضو الطريقة دى مش ظابطة معاك، ولا يهمك، ادخل هات لك كورس أو مجموعة فيديوهات عن موضوع معين، بس هات فيديو بيتكلم عن حاجة بالتفصيل بلاش الفيديوهات اللى مجرد بتعمل لك وعي بأهمية أو ضرورة الحاجة دي!

واقعد اسمع 60 دقيقة من كل الفيديوهات أو الكورسات دي، وحاول وانت بتسمع الفيديو تجري الفيديو لان سعات كتير ممكن تختصر نص الفيديو، وانت بتاع تسويق بالمحتوى وفاهم انا اقصد ايه.

لو الطريقة دى مش مناسبة معاك برضو، فيه حل تاني، وهو:

وانت شغال خلال الاسبوع كله، كل ما يطلع قدامك مشكلة أو تحدي أو تيجي حاجة فى بالك، اكتبها فى ورقة، ويوم الجمعة (او اليوم اللى بتسميه اخر الاسبوع) دور على الاجابات فى جوجل وفى كورا وفى امازون، أو اسال الناس اللى حواليك سواء كانوا أعلى منك أو أقل منك أو معاك فى نفس المستوي.

اللى عايز اقوله، ان مش مهم الطريقة، المهم إن يكون  فيه ساعة يوميا لتطوير نفسك، اعمل اللى  يناسبك ويناسب ظروفك، المهم تعمل.

2- تابع الناس اللى بتقدم معلومة – مظبوطة – عملية/علمية تم تجربتها حتى لو على نطاق صغير

مجالنا مليان معلومات بالهبل، مصادر كتير ووجهات نظر متضاربة وليلة سودة اوى سعاتك!

كل المطلوب منك إنك تحدد كام مصدر تحس وتشوف فيهم إنهم بيقدموا معلومات مظبوطة، معلومات منطقية، ومجربة، مش معلومات نظرية أو فلسفة مبنية على أفكار لم يتم تجربتها مطلقا.

مفيش مشكلة تبص على الأفكار النظرية والفلسفية اللى بتتخيل الوضع هيكون عامل ازاى لو حصل كذا وكذا وكذا!

بص عليها عشان يمكن يكون عندك طريقة لتطبيقها وتنفيذها، ولكن ماتفنيش عمرك وانت بتبص عليها، حطها فى حجمها الطبيعى.

وبس كدة يا صديقي …