fbpx

ازاى تكتب محتوى يتقرا من أول سطر لحد أخر سطر [خطوة بخطوة]؟

خلينا الأول نتفق إن لما نيجي نتكلم عن كيفية كتابة المحتوى لا شئ يعلو فوق صوت “الجودة العالية”.

 

مش مهم الكمية بقدر ما يهم الكيفية.

 

مايهمنيش تكتب 100 مقالة، يهمني تكتب 100 مقالة كويسة وعالية الجودة.

 

جوجل مبيهتمش بعدد المحتوى زي ما فيه “خبراء” كتير بيقولوا، جوجل بيهتم بجودة المحتوى.

 

العميل مايهموش إنه يقرأ محتوى منك كل يوم، بقدر ما يهمه جودة وأهمية اللي هيقراه.

 

طب ازاى تكتب محتوى عالي الجودة يتقرا من أول سطر لحد أخر سطر؟

 

امشي على خطوات ممنهجة.

 

في كورس كتابة المحتوى انت عرفت إن فيه 13 خطوة لازم تمشي عليها، دلوقتى هاختصرها لك في 6 خطوات بس.

 

وهشارك معاك أسلوبي الخاص لكتابة محتوى يتقرا من أول سطر لحد أخر سطر من غير ما اللي بيقرا يحس بملل.

 

وهقولك على 6 طرق لكتابة محتوى يشد الانتباه ويثير الاهتمام.

 

بس قبل ما اقولك على الخطوات والطرق دى، لازم تفرق بين المحتوى اللي هتعمله بغرض البيع، والمحتوى اللي هتعمله بغرض التسويق!

 

المحتوى اللي هتعمله بغرض التسويق هيكون هدفه الاول والاخير كسب ثقة الزبون/العميل المحتمل وإثبات إن المنتج/الخدمة اللي انت بتقدمها أحسن حل ليه.

 

أما المحتوى اللي هتعمله بغرض البيع هيكون هدفه الأول والأخير هو البيع طبعا.

 

المحتوى التسويقي بتتكلم فيه عن المشاكل اللي الزبون/العميل المحتمل بيقع فيها

الزبون/العميل المحتمل – والحلول المختلفة اللي انت جربتها أو فكرت فيها أو لاقتها للمشاكل دي.

 

المحتوى البيعي بتتكلم فيه عن المنتج بتاعك، وعن اللي يقدر يعمله ويحققه للزبون، وعن الفرق بينه وبين منتجات وخدمات المنافسين أو الحلول التانية الموجودة في السوق.

 

انا هنا مش هتكلم عن المحتوى البيعي، في الايام اللي جاية هيجي لك محتوى تفصيلي عن ازاى تعمل ده (بس الأول لازم تأخد أساسيات المحتوى البيعي، اللينك اهو).

 

انا هنا هتكلم عن المحتوى التسويقي، يعنى محتوى يخلي الناس تثق فى المنتجات/الخدمات من غير ما تشوفها أو تجربها، محتوى يبني لك الاساسات اللي تساعدك تبيع بعد كده بسهولة.

 

اتفقنا؟

 

6 خطوات لكتابة محتوى يتقرأ من أول سطر لحد أخر سطر 

 

1- حدد الزبون/العميل المستهدف + حدد من 1 لـ 5 مشاكل بيعاني منها.

 

ازاى؟

 

هقولك دلوقتي على المعادلة اللي بستخدمها عشان احدد الزبون/العميل المستهدف:

 

اسم الفئة + 1 لـ 3 محددات + السبب الرئيسي اللي هيخليهم يشتروا المنتج أو اللي المنتج ممكن يساعدهم فيه.

 

مثال عملي من بيزنس بيقدم كورسات في صناعة وتزيين الكيك:

 

ربات المنزل اللي عندهم طفل واحد بس وعايزين يبنوا كيان ناجح على الانترنت من البيت.

 

مثال تاني من بيزنس استثمار عقاري:

 

أصحاب المصانع والشركات اللي دخلهم الشهري أكبر من 50 ألف جنيه وعايزين يضاعفوا فلوسهم خلال 5 سنين.

 

فهمت؟

 

امسك الفئة المستهدفة وشوف ايه المشاكل أو العوائق أو المعلومات اللي لازم يعرفوها عشان يوصلوا للى هما عايزينه.

 

مثلا ربات المنزل ممكن يكون عندها مشكلة في إزاى تبدأ؟ ازاى تسوق؟ ازاى تشتري المواد الخام بأسعار كويسة؟ ايه الادوات اللي نحتاجها في الاول؟ الخ.

 

مثلا أصحاب المصانع ممكن يكون عندهم مشكلة في ازاى يختار العقار اللي يستثمر فيه؟ وامتي يفكر في البيع أو وامتي يستنى شوية؟ الخ.

 

فهمت؟

 

الموضوع ده مش هياخد منك أكتر من ساعتين، ومش هتضطر تعمله في كل قطعة محتوى، بتعمله مرة واحدة كل أول شهر.

 

يعني أول يوم في الشهر بتجيب أفكار المحتوى بتاعت الشهر كله.

 

2- اعمل Research + اكتب الـ Outline

 

فلنفترض انك عايز تكتب عن طرق الاستثمار في العقارات، تعمل ايه؟

 

1- اكتب كل اللي انت تعرفه عن الموضوع في صورة عناوين رئيسية.

 

2- امسك كل عنوان كتبته، واعمل عليه بحث في جوجل (بالعربي وبالانجليزي)، وادخل لحد على الاقل الصفحة رقم #5.

 

3- المحتوى اللي تحسه مفيد وفى صميم الموضوع اللي انت هتكتب فيه، اقراه بالتفصيل وخد منه العناوين الرئيسية والأفكار والمعلومات المفيدة اللى تحسها مظبوطة.

 

4- نظم الأفكار والعناوين اللي جبتها بشكل منطقي متتابع، وده تعمله ازاى؟

 

ادخل على ويكيبيديا بالانجليزي وهات الموضوع اللي هتعمل عنه محتوى وشوف الفهرس الموجود …

 

ازاى تكتب محتوى 

 

من الفهرس تقدر تجيب أفكار محتوى تانية، تقدر تكتب قطعة محتوى كبيرة فيها كل التفاصيل تخلي الجمهور يتعامل معاك على انك المصدر الأول للمعلومات في مجالك (يعني Authority يعني يسمعوا كلامك وتؤثر في قرارهم الشرائي).

 

طب يا أسامة أنا مش لاقي الموضوع اللي هعمل عليه المحتوى في ويكيبيديا؟

 

الأول دور بالانجليزي عليه كويس اوى، ولو مش لاقيه، ادخل على أي موقع من مواقع الكورسات الاونلاين زي كورسيرا ويودمي وهتلاقي قطعا كورس بيتكلم عن موضوع المحتوى بتاعك!

 

كتبت الـ Outline؟

 

مبروك انت خلصت كتابة المحتوى من قبل ما تبدأ اصلا!

 

واللى جاي هو عرض المحتوى ده ليس الا.

 

3- اكتب عنوان المحتوى ومقدمة المحتوى

 

كتابة عنوان المحتوى من أهم العناصر اللي ماينفعش أي قطعة محتوى تخلو منها.

 

طب ازاى تكتب عنوان جامد ويشد القارئ في وقت قليل؟

 

قولي في العنوان انا هستفيد ايه؟ وليه لازم اهتم واقرأ دلوقتي؟

 

وبعدين اكتب المقدمة اللي هي عبارة عن فقرة واحدة، والفقرة دي 3 سطور او 4 بالكتير، وبيكون فيها شرح وتقديم المشكلة اللي انت هتعالجها مع تقديم وعد بالحل أثناء المحتوى.

 

4- اكتب المحتوى نفسه + خدلك راحة على الاقل يوم

 

قواعد عامة:

 

قسم المحتوى لفقرات، كل فقرة عبارة عن 3 سطور، بين كل فقرة وفقرة لازم يكون فيه مسافة بيضا، يعني تدوس على المسطرة مرتين مش مرة واحدة وماتشغلش بالك بمسألة المحتوى هيكون طويل ولا قصير.

 

لكل فقرة يُفضل يكون فيه عنوان فرعي ومكتوب في سطر لوحده، وبرضو فيه مسافة بين وبين الفقرة نفسه، مسافة تدوس مرتين على المسطرة مش مرة واحدة.

 

المحتوى طويل أو قصير مش مهم، المهم إنك تشرح كل المعلومات اللي الزبون/العميل المحتمل لازم يعرفها عن المشكلة وعن الحل اللي انت بتقدمه.

 

بعد ما تكتب المحتوى لازم تقفله، وماتبصش عليه غير تاني يوم، وده عشان تقدر تكتشف الاخطاء اللي فيه.

 

5- اكتب الملخص + الـ Call to Action

 

من أكتر الأخطاء الشائعة فى  كتابة المحتوى هي إن معظم اللي بيكتبوا محتوى مش بيكتبوا لا الملخص ولا الـ Call to Action!

 

واللى فيهم بيكتب واحدة بيسيب التانية، ونادرا ما تلاقي حد كتب الاتنين!

 

الملخص عبارة عن سطر أو سطرين في نهاية قطعة المحتوى بيوضحوا للقارئ خلاصة المحتوى.

 

المطلوب منك إنك تكتب السطر أو السطرين دول، بس خليهم تمهيد للـ CTA.

 

الـ Call to Action عبارة عن طلب انت بتطلبه من القارئ في آخر قطعة المحتوى، زي إنه يعمل شير، كومنت، ينزل الكتاب، يقوله راي، يجاوب على سؤال، يقرأ المقال الفلاني، يعمل منشن لحد، يشتري المنتج الخ …

 

ماينفعش بأي حال من الأحوال تنساه لانك لو عملت كده، المحتوى فقد كتير من قيمته!

 

وده لانك قدمت قيمة كبيرة بشكل مجاني، فطبيعي تكون عايز حاجة، الحاجة دي في سياق المحتوى التسويقي غالبا ما هتكون إنه يقرأ أكتر عشان يثق فيك أكتر ويكون جاهز للشراء وقت ما انت تقرر تبيع ويكون العميل جاهز يشترى.

 

نفذ الخطوة دى، وبعدين ارتاح عشان تقدر تعمل Edit.

 

6- اعمل Edit ثم تأكد إن كل حاجة مظبوطة وبعدين انشر المحتوى

 

في خطوة الـ Edit زي ما انت عارف بتتأكد إن تنسيق المحتوى سليم، مفيش اخطاء املائية، الجمل بسيطة ومؤثرة، الأفكار مترابطة الخ.

 

بعد ما بتتاكد إن كله مظبوط، تنشر المحتوى في القناة اللي هينزل فيها.

 

وبس كده.

 

دى Checklist سريعة لكتابة محتوى يتقرا من أول سطر لحد اخر سطر عشان لو نسيت تنفذ أي خطوة.

 

ازاى تكتب محتوى

 

طبق وكرر الخطوات دي في كل مرة تكتب فيها محتوى، ودوام عليها واوعدك إن مع الوقت بدل ما كنت بتاخد 10 ساعات في كتابة قطعة محتوى، ممكن تاخد ساعة أو ساعتين بس.

 

انت وشطارتك.

 

ملحوظة: انا بقدملك معلومات متعوب فيها ومتجربة وصعب تلاقيها حتى في كورسات مدفوعة في السوق، مش عشان الا انك تجربها وتطبق وتنجح بيها، فأرجو انك تطبق ولو قابلتك مشاكل، ابعت لى وانا هرد عليك.



أسلوبي الخاص لكتابة محتوى يتقرا من أول سطر لحد أخر سطر

 

ايه هدف كل سطر في المحتوى؟

 

هدف كل سطر في المحتوى إنه يخلي الناس تكمل السطر اللي بعده، وده تعمله ازاى؟

 

اعتمد على الأسلوب التقدمي/التسلسلي في كتابة المحتوى.

 

يعني ايه؟

 

يعني اشرح السبب وقول النتيجة، أو قول النتيجة وفسر السبب.

 

ممكن مثال؟

 

اتفضل …

 

ازاى تكتب محتوى

خدت بالك من اللي حصل!

 

أولا قولت حاجة تشد الانتباه، وتثير الاهتمام عند الجمهور، وخليت عنده فضول، وفى الاخر قولت له على الحاجة اللي هو بيدور عليها.

 

كل ده حصل في سطرين.

 

وبعد ما عملت كده كررت اللي عملته تاني عشان يفضل مكمل قراءة، بس المرة دى سالت سؤال بحيث اخلق الفضول عند اللي بيقرا.

 

فهمت؟

 

طب ازاى تطبق الكلام ده بشكل عملي؟

 

فيه 3 صفات لو تحققوا في المحتوى بتاعك، هيخلي أي حد يكمله من أول سطر لحد أخر سطر، وكمان يثق في المنتج/الخدمة ويشتري.

 

الصفات دي هي:

 

1- يشد الانتباه

2- يثير الاهتمام

3- يولع الفضول

 

 

 6 طرق لكتابة محتوى يشد الانتباه ويثير الاهتمام ويولع الفضول

 

1- قدم معلومات جديدة أول مرة يسمعوها، أو قدم لهم المعلومات في شكل جديد أول مرة يشوفه.

 

2- قدم أرقام أو احصائية ملفتة للنظر أو غير متوقعة.

 

3- ابدأ المحتوى بكلمة “تخيل لو”، واشرح اللي هيحصل لو اللي نفذ اللي انت هتقوله أو اشتري المنتج/الخدمة بتاعتك.

 

 

4- اسأل سؤال في البداية وجاوب عليه في المحتوى.

 

5- احكي قصة.

 

6- قدم وعود باللى الجمهور هيحصل عليها لو قرأ المحتوى لحد الاخر.

 

استخدم أي طريقة من الـ 6 دول أو ادمج ما بين اتنين زى ما تحب.

 

تمام؟

 

لحظة من فضلك:

 

كل الطرق دى هتخليك تستحوذ على انتباه الجمهور وتخليه وهو راضي ومبسوط وعايز يكمل المحتوى لحد الاخر، ولكن لو كمل للاخر والوعود والتوقعات كانت مخيبة للآمال يبقى انت عملت تسويق بالسلب.

 

طب تعمل ايه في الموقف ده؟

 

اللي تقول عليه تعمله، ماتوعدش بحاجة مش هتحققها.

 

حاجة كمان، من الضروري جدا إن المحتوى يكون سهل فى فهمه واستيعابه، لان لو المحتوى كان صعب ومش بسيط محدش هيكمله للاخر حتى لو فيه كنز.

 

فهمت؟

 

انك تعمل محتوى عالي الجودة يخلي الناس تقراه لحد الاخر ضمان ليك بنسبة تتعدي الـ 75% إن الناس تعمل شير أو تتفاعل أو تشتري أو تسيب رقمها أو تدخل على اللينك أو ايا كان الـ Call to Action اللي انت عامله …

 

طب ازاى تكتب محتوى من اوله لاخره يبيع منتج أو خدمة من غير ما اللي بيقرا يحس إنك عايز تبيع له أي حاجة؟

 

ده اللي هنشرحه في الأيام اللي جاية.

 

لا انا لسه ماخلصتش!

 

ركز معايا …

 

تخيل معايا انك مسكت بين اييدك كل خيوط كتابة والتسويق بالمحتوى وكل الأمور المتعلقة بيهم زي تكوين الاستراتجيات وكتاية محتوى يبيع وكتابة محتوى متوافق مع السيو وكل حاجة انت محتاجها عشان تحترف التسويق بالمحتوى بشكل كامل …

 

تخيلت؟

 

ده موجود.

 

من 8 سنين لما قررت ادخل مجال التسويق بالمحتوى ماكانش فيه منهج اقدر امشي عليه عشان اقدر اطبق المفاهيم والاستراتيجيات الخاصة بالتسويق بالمحتوى على أي بيزنس من اللي اشتغلت فيها!

 

والموضوع ده كان مضايقنى جدا نظرا لان شخص بيحب يشتغل بنظام وبعلم مش يشتغل وزى ما تيجى تيجى!

 

فقررت فى أواخر 2017 انى ابدا اجمع واوثق علم التسويق بالمحتوى سواء من اللي جربته أو من اللي سمعت وشوفت ناس تانية جربته.

 

وقد كان، وبدات في إطلاق كتاب ورا كتاب …

 

انهاردة انا بقدملك الكتب دى كلها بدل ما تقعد بالساعات في جوجل وماتوصلش لحاجة واضحة تقدر تمشي عليها!

 

 

أضمن لك ان تقريبا مفيش مصدر مجاني على الانترنت انا ماشوفتوش، واضمن لك برضو ان اللي هتلاقيه جوه الكتب هيغنيك عن كل المصادر دى، وهتقلل حالة التوهان المتعلقة بسؤال “ابدا منين، ابدا ازاى”!

 

4 رأي حول “ازاى تكتب محتوى يتقرا من أول سطر لحد أخر سطر [خطوة بخطوة]؟”

  1. الحمد لله انا كل يوم بستفاد من حضرتك من الكورس المجاني لحد المقالات دي بجد حضرتك بتقول معلومات علميه بتطبيق وتنفيذ علطول محتوى قوي انا بشكر حضرتك جداً والله.

    رد

أضف تعليق