كتابة المحتوى من المواضيع اللي قٌتلت بحث في المحتوى العربي، ولكن بالرغم من أهمية الموضوع إلا أن المقالات أو المصادر التعليمية اللي بتغطي الموضوع ده قليلة اوى، وتقريبا كلهم مصادر ضعيفة ماعدا كام مصدر كده!

كتابة المحتوى من  أهم المهارات الواجب توافرها عند اي حد شغال في التسويق، ومفيش شركة دلوقتي بتطلب ناس تشتغل في السوشيال ميديا أو في الـ SEO أو في التسويق بالمحتوى أو الإعلانات عبر الإنترنت إلا وتشترط وجود مهارة كتابة المحتوى!

عشان كده في المقال ده، هشرح من واقع خبرتي ازاى تكتب محتوى بطريقة مناسبة للجمهور المستهدف، وفي الوقت ذاته مناسب لطبيعة مجال البيزنس.

في البداية احب اجاوب على كام سؤال ممكن يكونوا بيدوروا فى دماغك!

1- هو المحتوى ده لأنهي مستوى و لأنهي ناس بالظبط؟

أولا المحتوى ده موجه لكل واحد شغال في مجالات التسويق الالكتروني.

بتوع الـ SMM (اختصارا لـ Social Media Marketing) بيكتبوا محتوى، وبتوع الـ SEO بيكتبوا محتوى، وبتوع الـ eMail Marketing بيكتبوا محتوى، بتوع الـ Affiliate بيعلموا محتوى.

ثانيا المحتوى ده موجه للمسوقين من جميع المستويات ماعدا المستوى المتقدم، يعني من المبتدئين وانت طالع!

2- كتابة المحتوى هتكون كتابة انهي نوع بالظبط؟

بص يا سيدي، إحنا اتفقنا قبل كده في كورس كتابة المحتوى إن أصل أي محتوى هو مكتوب!

وقولنا أن أنواع المحتوى أصلا تلاتة بس، وهما المكتوب والمسموع و المرئي.

وبيتشكل كل نوع من المحتوى عشان يديني مثلا المقال والقائمة والفيديو والانفوجرافيك الخ.

في المقال ده هتكلم على كتابة المحتوى المكتوب، وهقول بعض الملاحظات السريعة في النوعين التانيين.

3- كتابة المحتوى لانهي  قناة تسويقية بالظبط؟

أكيد انت بتسال دلوقتي، طيب يا عم أسامة اللي هتشرحه ده هيكون كتابة المحتوى للفيسبوك ولا لـ لينكدإن ولا كتابة المحتوى للمواقع ولا لمحركات البحث ولا ايه بالظبط؟

بصفة أساسية هنتكلم عن كتابة المحتوى لـ المدونات ومحركات البحث وللفيسبوك.

لو عندك اي سؤال تاني، سيب تعليق وهرد عليك في الحال.

يلا بينا نبدأ في شرح كتابة المحتوى خطوة بخطوة …

ما قبل كتابة المحتوى

فيه 7 أمور أساسية لازم تكون حاططهم في بالك قبل ما تكتب المحتوى، وهما:

1- الجمهور المستهدف

بص من غير الدخول في تفاصيل كتيرة، انت دلوقتي المفروض شغال في شركة، وعندك استراتيجية تسويق فيها صفحة أو اكتر عن الجمهور المستهدف.

المطلوب منك تحدد شريحة واحدة بس عشان توجه لهم قطعة المحتوى اللي هتعملها باذن الله.

طب لو انت اصلا مش عارف الجمهور المستهدف يكون مين، تعمل ايه؟

موضوع تحديد وفهم الجمهور المستهدف ده يتعمل فيه كتاب وانا ناوي اعمله وانزله مجانا باذن الله، لو مهتم قولي في كومنت انت مهتم بالكتاب ده.

2- صوت البراند

من أهم الغلطات اللي بيقع فيها اي حد بيعمل محتوى، إنه بيكتب بأسلوبه الشخصي!

وده مش مشكلة لان كده كده أسلوبه وفكره لازم هيظهر في المحتوى غصب عنه، ولكن اللي اقصده إن المحتوى مش المفروض يوصل فكر واحاسيس كاتبه، إنما يوصل رسالة وإحساس البراند.

بصوا يا معلمين …

البراند زي الإنسان بالظبط، الإنسان أما بيتكلم الإنسان الآخر بيعرف عنه شوية حاجات.

وهنا مربط الفرس، كل إناء ينضح بما فيه!

إذن لازم تكون – كمتخصص في كتابة المحتوى – عارف ومتقمص شخصية البراند اللي منها طالع صوت البراند وبكده المحتوى بتاعك يطلع يجيب جون على طول.

بس فيه مشكلة كبيرة بقي، وهي أن معظم الشركات في السوق المصري مش بيكون عندها أصلا صوت محدد تتكلم بيه!

ولكن ده مش عذر للناس اللي بتكتب بصوتها مش بصوت البراند.

عشان تحدد صوت البراند بطريقة بسيطة جاوب على الاسئلة دى:

انت بتقول ايه؟ وبتقوله ازاى؟ وبتقوله ليه؟

مثلا انا بتكلم عن التسويق بالمحتوى، بأسلوب علمي منمق ودود، عشان أعلم و أؤثر في حياة الناس العملية والشخصية.

السطرين اللي فوق دول عبارة عن صوت البراند الشخصي بتاعي.

دي طريقة سريعة لإيجاد صوت البراند، وطبعا فيه طرق تانية كتيرة وكلهم صح، المهم تتكلم من خلال صوت معروف وواضح.

3- هدف المحتوى

تاني أكبر غلطة بيقع فيها كتير من صانعي المحتوى هي هدم تحديد ووضع هدف يتسم بالوضوح.

هدف البيزنس ← هدف التسويق ← هدف المحتوى

هدف البيزنس زيادة الإيرادات، التسويق يقول نزود المبيعات، التسويق بالمحتوى يقول نزود عدد الـ Leads.

هدف البيزنس زيادة الإيرادات، التسويق يقول تقلل تكلفة الإعلانات، التسويق بالمحتوى يقول نعمل محتوى بهدف Brand Awareness أو نعمل Viral Content، فهمت الفكرة؟

لازم تكون واضح جدا من اللي انت عايزه من قطعة المحتوى، يعني عايز الناس تدخل على لينك معين عشان يبقوا Leads؟ عايز الناس تتفاعل؟ عايز الناس تشير؟ عايز الناس بس تقرا؟ عايز ايه؟

خد بالك إن الهدف يؤثر بطريقة كبيرة في طريقة كتابة المحتوى، فضلا عن أن المحتوى نفسه بيكون مختلف.

4- نوع وشكل المحتوى

هل المحتوى مكتوب أو مسموع أو مرئي؟ وهل هو مقال أو انفوجرافيك ولا ايه؟

في إنتاج المحتوى، غالبا بيكون فيه شخصين، الشخص اللي بيكتب المحتوى، والشخص اللي بيكمل عملية إنتاجه، يعني مثلا لو نوع المحتوى صوتي، فانت هتكتب المحتوى، وفيه حد هيسجل الكلام زي ما انت كاتبه بالظبط!

من 7 سنين تقريبا، أما كنت في School of Marketing عملت قطعة محتوى صوتية عن الـ Call to Action، وكان فيها غلطات كتيرة ظهرت في الصوت!

من ضمن الغلطات كان الـ Call to Action نفسه، واللى ماينفعش يتقال لواحد بيسمع!

هو مناسب جدا لو واحد كان بيقرا، شفت بقى ازاى تفصيلة صغيرة قلبت الدنيا.

عشان كده لازم تحدد نوع وشكل المحتوى اللي هيطلع قبل ما تكتب اي حرف.

كان نفسي تكون قطعة المحتوى الأصلية موجودة، ولكنها اتمسحت من على موقع اقرألي لأسباب تقنية لا يعلمها إلا الله.

5- القناة التسويقية الأساسية

البيت الأساسي بتاع المحتوى بتاعك فين؟ على الفيسبوك؟ على لينكدان؟ على الموقع؟ في كتاب إلكتروني؟ فين بالظبط؟

طبعا ممكن تحط المحتوى بتاعك في حتت تانية كتوزيع وترويج ليه، إنما انا اقصد المكان الاساسي بتاعه لان ده هيفرق في كتابة المحتوى.

6- الرسالة التسويقية والعرض

المحتوى لازم يعمل تسويق، وتسويق يعني خلق الطلب على منتج معين، إذن فيه حاجتين لازم نكون عاملين حسابهم قبل ما نكتب المحتوى.

أول حاجة هي الرسالة التسويقية للمحتوى …

الرسالة التسويقية للمحتوى اللي انت بتقراه دلوقتي هي ” كتابة المحتوى حاجة أساسية لكل مسوق، ومفيش شركة أو شخص اتكلم عن الموضوع ده بشكل عملي، المقال اللي بين ايدك بيقوم بالمهمة دى “.

والكلام ده تقدر تلاحظه في أول فقرتين في المقال، والرسالة العامة نفسها هتلاقيها في العنوان.

عشان تعمل رسالة تسويقية، شوف انت عايز تتواصل مع مين (المسوقين المبتدئين)، وهتقول لهم ايه (كتابة المحتوى)، وليه هما المفروض يهتموا (خطوة بخطوة).

فهمت يا ريس؟

تاني حاجة هي العرض أو الـ Offer …

بصوا بقى عشان الحتة دى معرقبة شوية، بس احسن حاجة تشرح بيها حاجة معرقبة هي المثال!

لو دخلت على مدونة Hubspot مستحيل تلاقي مقال عندهم من غير عرض.

ادخل أي مقال عندهم وانت هتلاقي في اخره Ebook ليه علاقة بالموضوع، عشان ينقلوك لمرحلة تانية في الـ Marketing Funnel  بتاعهم لحد ما تشتري.

بس مش كل محتوى بيكون شايل عرض، ممكن جدا المحتوى مايكونش فيه عرض، ولكن يكون فيه Sales Pitch في اخره.

وطبعا ممكن جدا يكون المحتوى مفيهوش عرض، براحتك!

7- هيكل المحتوى

كل أشكال المحتوى اللي في الدنيا، بيتم هيكلتها حسب هيكل واحد أساسي وهو:

العنوان (Headlines)

المقدمة (Introduction)

الجسم (Body)

الملخص (Summary)

الطلب (Call to Action)

مهما اختلف شكل المحتوى، هتلاقي بيمشي حسب الهيكل ده، وهو ده اللي هنشرحه بالتفصيل دلوقتي في جزئية كتابة المحتوى.

كتابة المحتوى

انت كده بقيت عارف ايه اللي المفروض تكون عارفه قبل ما تكتب المحتوى، ودلوقتي هندخل في تفاصيل كتابة المحتوى نفسه.

كتابة عنوان المحتوى

العنوان هو أول حاجة المفروض تكتبها في قطعة المحتوى كلها، ومسموح لك تصرف عليها وقت قد اللي هتصرفه على المحتوى كله.

وده طبعا نظرا لأهميته القصوى اللي بتتلخص في إنه العامل الجذاب رقم #1 بالنسبة للجمهور المستهدف واللى على أساسه بياخدوا قرار يشوفوا المحتوى بتاعك ولا ينفضوا.

اعتبر العنوان هو الجملة اللي لو قلتها دام العميل المحتمل هيقرر فورا يقولك أنا مهتم وعايز اعرف التفاصيل!

زي عنوان المقال ده: كتابة المحتوى خطوة بخطوة (بالتفصيل) …

العنوان هنا كان كفيل انه يخليك تكمل قراءة وتقرأ أول فقرة، وأول فقرة سلمت لتاني فقرة وهكذا لحد ما وصلت للجملة اللي انت بتقراها دلوقتي!

وضحت؟

كتابة مقدمة المحتوى

المقدمة هي تاني حاجة بتشجع الجمهور المستهدف انه يكمل المحتوى بعد العنوان.

المقدمة تعتبر المشهد الافتتاحي من اي فيلم، فيه ناس بتبدأ المشهد بتعريف الأبطال والحدوتة، وفيه ناس بتبدأ بحاجات غير متوقعة، وفيه ناس بتجيب مشهد  النهاية وبعدين تشرح ايه اللي وصلنا للنقطة دى.

كل دى طرق لكتابة مقدمة المحتوى، المقياس الوحيد لجودة المقدمة هي انها تشد انتباه الجمهور المستهدف وتخليه يكمل المحتوى للأخر.

نيل باتل بيقول أن فيه 3 عناصر لأي مقدمة، وهما:

1- السنارة (The Hook)

ممكن يكون جملة أو كلمة أو فقرة أو سؤال، وظيفتها إنها تخطف أو تصطاد الجمهور المستهدف للمحتوى.

2- الناقل (Transition)

دي الجملة اللي بتربط ما بين السنارة واللى هيقدمه المحتوى بتاعك.

3- الأطروحة (Thesis)

في الجزء ده بتقول ايه اللي هتقدمه في المحتوى، واللى هيشجع الجمهور المستهدف انه يكمل.

مثال من مقال عملته لشركة في مجال الفوركس أو مجال بورصة العملات الأجنبية.

طب في سؤال، انا بتكتب بوست على الفيسبوك، اعمل ده ازاى؟

بص يا صاحب ويا صاحبة السؤال، على حسب حجم المحتوى، وإبداعك الشخصي.

ملحوظة، لو المحتوى عبارة عن كابشن بسيط يبقى هو اصلا مش محتوى بالمعنى المتعارف عليه، إنما Copy، والـ Copy ليه قوانين ودنيا تانية.

طبعا فيه مدارس كتير في كتابة المقدمات زي ما قولنا، ولكن انا بحب مدرسة تقديم المشكلة، وسعات الحل، والمحتوى نفسه بيكون بيوضح الطريق الكامل للوصول للحل.

زي مقدمة المقال ده.

كتابة جسم المحتوى

جسم المحتوى هو المحتوى نفسه، العنوان والمقدمة كان مهمتهم جذب إنتباه الجمهور للجزء ده.

الجزء اللي بتوفي بيه بالوعود اللي قطعتها على نفسك في أول جزئين، يعني هنا إما البطيخة تطلع قرعة أما تطلع حمرا.

في جسم المحتوى، أسلوبك وفكرك وصوتك بيظهر.

مقدرش اقولك ازاى تكتب جسم المحتوى، لان ده متوقف على الموضوع نفسه، ولكن اقدر افيدك بكام Trick كده يخلوا جسم المحتوى بتاعك ممتاز.

• قسم المحتوى لفقرات، وكل فقرة خليها سطرين أو تلاتة، وبين كل فقرة والتانية مسافة بيضة (دوستين مش دوسة واحدة الله يخليك) زي اللي انت شايفها في المحتوى ده.

• بسط الكلام، بس ماتبقاش سطحي، بسط الكلام بطريقة تخلي الناس فاهمة من غير ما تضيع معنى وجوهر الكلام.

• اوعي تحشر، ماتحطش كلمة أو جملة إلا وليها معني، ودليلك في عمل الموضوع ده، إنك تشيل الجملة أو الكلمة اللي انت شاكك انها محشورة، لو المعني استقام يبقي كانت حشر، لو لا يبقي في مكانها.

• لو فيه نقاط، إما ترقمهم أو تعملهم زي ما انا عامل النقط دى بالظبط، يعني تخليهم في شكل Bullets.

• حسس الجمهور المستهدف أنك فاهمه كويس اوي، وان الكلام ده موجه ليه، وده عن طريق انك تتخيل انه قاعد جنبك وإنت بتكتب المحتوى، وتبتدى تتكلم معاه.

لو اخدت بالك من الكام نقطة دول، هتلاقي جسم المحتوى مرة بعد مرة بقي أحسن.

كتابة ملخص أو خاتمة المحتوى

انا بحب جزئية الملخص في المحتوى، لإنها فرصة عظيمة لتوصيل الرسالة التسويقية بشكل واضح.

وكمان فرصة لمعرفة فيد باك لحظي عن المحتوى، وده عن طريق إنك تقول للناس اللي هما المفروض يكونوا فاهمينه بعد ما خلصوا المحتوى بتاعك

كتابة الـ Call to Action 

ايه هو الـ CTA ( اختصارا لـ Call to Action)؟

 الـ CTA عبارة عن الطلب اللي انت بتطلبه من الجمهور المستهدف بعد الانتهاء من قراءة أو مشاهدة أو سماع المحتوى!

الطلب ده هو الفعل المنطقي اللي انت عايز الجمهور المستهدف تعمله بعد ما خلص استهلاك المحتوى بتاعك.

طب ازاى تكتب CTA؟

1- ركز على هدف واحد وحيد.

2- استخدم أفعال وليس كلمات لدفع الناس القيام بالفعل.

3- قول للناس ايه اللي هيعود عليهم أما يقوموا بالفعل اللي انت طالبه منهم.

طبعا لو فيه عرض مصاحب للمحتوى أو موجود هدف واضح، الـ CTA هيكون اتكتب من قبل ما تكتب حرف في المحتوى اصلا.

وبكده تكون انتهت مرحلة كتابة المحتوى …

ماذا بعد؟

ما بعد كتابة المحتوى

قبل كتابة المحتوى، قولنا على 7 حاجات لازم تعمل حسابها وتحطها في دماغك قبل ما تكتب المحتوى!

وده عشان تقدر تكتب المحتوى المناسب للجمهور المستهدف وفى الوقت ذاته مناسب للبيزنس اللي انت شغال لحسابه.

وفى مرحلة كتابة المحتوى قولنا ازاى تكتب قطعة محتوى متكاملة الأركان.

أما دلوقتى هنقول 3 حاجات المفروض تعملها بعد ما تخلص كتابة المحتوى.

1- ارتاح عشان تعمل Edit

في مرحلة الكتابة، غالبا انت كنت عامل كده …

بس جه الوقت اللي تعمل فيه كده …

لازم تفصل، وتاخد استراحة من اللي كنت بتعمله، عشان تقدر تراجع وتعدل على المحتوى عشان يخرج في أبهى صورة.

طب يا عم اسامة انا معنديش وقت اخد راحة بعد ما اعمل المحتوى ولازم انشره بسرعه؟

يبقى ادخل المطبخ اعمل كوباية نسكافيه أو شاي، أو ادخل اغسل وشك أو العب ماتش بلاي ستيشن أو اعمل أي فعل بعيد كل البعد عن كتابة المحتوى حتى لو لمدة قصيرة.

ملحوظة: طبعا المفروض ماتوصلش لمرحلة ان بتكتب المحتوى قبل ميعاد نشره بكام دقيقة يعني، عيب انت كبير!

طب بعد ما خدت الاستراحة بتاعتك، المفروض تفتح المحتوى مرة تانية عشان تعمل Edit، بس ازاى؟

اقرأ المحتوى للمرة الأولى بحثا عن وجود علامات الترقيم  في أماكنها، وعلى وجود المسافات صح، وطبعا الأخطاء الإملائية.

اقرأ المحتوى مرة تانية عشان تتأكد أن كل جملة مترابطة مع اختها، وكل فقرة مترابطة مع اختها، والمحتوى كله مترابط و حتة واحدة بيناقش موضوع واحد مهما كثرت التفرعات.

اقرأ المحتوى للمرة الثالثة عشان تتأكد ان كل حاجة ماشية صح.

طبعا موضوع الـ Edit ده مهارة، هتتحسن بالتدريج، بس نصيحتى ليك، قطع نفسك قبل ما حد يجي ويقطعك.

2- انشر واستنى ربع ساعة

انت عملت  مجهود كبير اوي في كتابة المحتوى، فبلاش تبوظ الطبخة عشان بشلن ملح زي ما بيقولوا!

يعني ايه؟

المحتوى بتاعك تم نشره في القناة الأساسية وليكن الموقع الالكتروني، ده مش كفاية، هنا يجي دور توزيع المحتوى.

انشر المحتوى بتاعك في الفيسبوك، تويتر، لينكد ان، الإيميل، في كل مكان موجود فيه العملاء بتوعك.

وفى كل مكان بتنشره فيه، خليك مركز لمدة ربع ساعة على الأقل، لأن أول ربع ساعة أمر حرج لنجاح المحتوى بالذات على السوشيال ميديا.

3- اوعي تنسي تحليل المحتوى

تحليل المحتوى بيكون ليه شقين:

تحليل فني متمثل في هل المحتوى مناسب للجمهور المستهدف ولا لا؟ وهل انت قدرت تشد انتباه واهتمام العميل المحتمل ولا لا؟

والتحليل الرقمي وده متمثل في الارقام اللي حققها المحتوى.

المهم تحلل أداء المحتوى على القناة اللي نزل فيها، وعلى القنوات اللي تم توزيعه فيها برضو.

وبكده نكون خلصنا المقال اللذيذ ده، واتمنى اكون ساعدتك بجد في إثراء معرفتك وتحسين أدائك في كتابة المحتوى ^^

الخاتمة

كتابة المحتوى من المهارات اللي عمرها ما بتجي من مرة واحدة، لازم تكتب كتير اوى، وتسمح لنفسك بكتابة حاجات زي الزفت، لإن هي دي اللي هتوصلك لمرحلة الإتقان.