التسويق بالمحتوى: استراتجية التسويق الأفضل للشركات الصغيرة!

التسويق بالمحتوى من المواضيع المهمة جدا اللي تهم صاحب أي بيزنس، وده لان المحتوى هي الوسيلة الأفضل فى جذب وإقناع أي عميل بشراء أي خدمة أو منتج في 2023.

 

في المقال ده هنتكلم عن اللي المفروض تعرفه وتعمله عشان تبتدي في تطبيق التسويق بالمحتوى.

 

ما هو التسويق بالمحتوى؟

 

التسويق بالمحتوى (Content Marketing) عبارة عن استراتيجية تسويقية الغرض منها زيادة عدد الزبائن/العملاء بتكلفة أقل من تكلفة الإعلانات.

 

التسويق بالمحتوى يقوم على 3 عواميد أساسية:

 

1- كتابة ونشر محتوى مفيد وذات صلة بمجال عملك، وذات صلة باهتمامات العملاء المحتملين باستمرار على الانترنت (المواقع الإلكترونية، اليوتيوب، وسائل التواصل الإجتماعي …).

 

2- بناء علاقات ذات معنى – علاقات حقيقية فعلا مش لغرض التجارة – وطويلة الأمد مع العملاء المحتملين.

 

3- تقديم حلول عملية/تطبيقية مش نظرية عشوائية للمشاكل اللي العملاء المحتملين بتواجهها يوميا – مجانا وقبل طلب أي صورة من صور التعامل التجاري.

 

فهمت؟

 

أهمية التسويق بالمحتوى الحقيقية

 

ليه التسويق بالمحتوى مهم؟

 

اسأل أي حد السؤال ده هيقولك ان التسويق بالمحتوى يساعد الشركات في جذب انتباه العميل المحتمل، في زيادة عدد الـ Leads، زيادة المبيعات، اكتساب عملاء جديدة والمحافظة على العملاء القديمة وغيرها من الأهداف …

 

كل الكلام ده صح ومفيهوش مشكلة، ولكن من وجهة نظري ان قيمة التسويق بالمحتوى الحقيقية تتلخص في 3 حاجات، وهما:

 

1- بناء Marketing Asset أو أصول تسويقية تعتمد عليها في عمل تسويق بشكل مستمر بدون الاضطرار لدفع فلوس (كل شوية) في الإعلانات.

 

2- الحصول على مرتبة انك تكون Online Authority يعني كلمتك تكون مسموعة، اما تنشر محتوى أو تقول معلومة كل الناس تاخدها كمرجع أساسي لحياتها وشغلها.

 

3- التواصل الدائم مع عملاء عالية الجودة، عملاء جاية وهي عارفة هتاخد ايه من قبل ما حتى تتناقش معاهم في تفاصيل الخدمة أو المنتج اللي انت بتقدمه.

 

4- الاستهداف الدقيق لنوعية العملاء اللي تحب تشتغل معاها، العملاء اللي ماتستهلكش طاقتك عشان مش فاهمة انت مين وبتقدم ايه وبتقدمه ازاى!

 

5- تحقيق مبيعات بشكل مستمر على المدى البعيد (يعني بعد 6 شهور من الاستمرارية بتلاقي مصدر جديد للمبيعات بدون أي تكلفة ولا مجهود زيادة).

 

ركز معايا لو لو انت بتقدم خدمة سواء كنت شركة او Freelancer أو مدرب أو Coach أو دكتور أو بتقدم أي نوع من الخدمات …

 

التسويق بالمحتوى هيساعدك تحقق الـ 5 حاجات دول، وأنت وأي بيزنس مش محتاج أي حاجة غيرهم اصلا!

 

تعالي اشرحلك …

 

ازاى التسويق بالمحتوى يساعدك في بناء Marketing Assets؟

 

التسويق بالمحتوى بيبني Marketing Assets تعيش العمر كله، مش بس مدة الحملة التسويقية زي الاعلانات، ومن غير ما تضطر تدفع فلوس كل شوية.

 

 Marketing Assets يعني أصول تسويقية.

 

Assets يعني أصول يعني حاجات ملكك.

 

وعشان نقول ان الشئ الفلاني Asset لازم يتوفر فيه صفة مهمة أوي وهي انك تقدر تتحكم فيه 100%.

 

طب هو ايه تعريف Asset أصلا؟

 

“مورد له فائدة إقتصادية تملكه أو تتحكم فيه الشركة وتستطيع توليد منه الربح مستقبلا”.

 

إذن الاتجاه بتاع أي شركة لازم يتحول من كونه بيروح يستخدم موارد الغير في التسويق، لبناء الموارد الخاصة بتاعته.

 

تخيل معايا إنك عملت مثلا فيديو أو مقال عملت فيه مقارنة بين كل الحلول والمنتجات المناسبة ليك، وحطيته على الموقع بتاعك وروحت نمت، ايه اللي هيحصل؟

 

اللي هيحصل إن الفيديو ده هيفضل يعملك تسويق حتى وإنت نايم – بشرط تظبيط شوية حاجات بسيطة -، فهمت؟

 

من الأفضل انك تبص على الإعلانات على أنها Promotional Tool الغرض منها نشر رسالتك على نطاق أوسع.

 

انت عايز تقول إن التسويق بالمحتوى بديل الإعلانات؟

 

اه طبعا.

 

بس ثواني ازاى المحتوى هيساعدني في تحقيق الأهداف اللي الإعلانات كانت بتساعدني في تحقيقها؟

 

بسيطة أوي!

 

 ابني الـ Asset بتاعك.

 

التسويق بالمحتوى بيساعدك تبني Marketing Asset قيمته مابتقلش مع طول الاستخدام بالعكس دى بتزيد …

 

أكبر مثال على كده، كورس كتابة المحتوى اللي انا عملته على الايميل، واللى هو بمثابة شرطة تسويق الكتروني شغالة عندى ليل نهار من غير ما ادفع مليم واحد.

 

إذن ماينفعش تبص للمحتوى اللي أنت بتعمله على انه مقال ولا اتنين!

 

الموضوع كأنك بتبني عمارة هتسكن فيها 100 سنة!

 

يعني لازم تكون الأساسات قوية والعمدان مسلحة كويس، ولازم طبعا تكون أكتر من دور عشان تعيش فيها أنت وأولادك.

 

فهمت عايز اقولك ايه؟

 

طبعا في ضوء فهمك إنك بتعمل Marketing Asset، هتلاقي الأفكار والمحتوى اللي طالع منك ليه نكهة مختلفة وفعلا وفعلا محتوى يعيش سنين لقدام.

 

الخلاصة: 

 

في جملة واحدة فرق الاستاذ Robert Rose بين الإعلانات والمحتوى وقال:

 

التسويق التقليدي والإعلانات بيقولوا للناس إنك جامد، بس التسويق بالمحتوى بيوري للناس إنك فعلا جامد.

 

ازاى التسويق بالمحتوى يساعدك تبني Online Authority؟

 

قلنا إن التسويق بالمحتوى بيساعد أي شركة يكون كلمتها مسموعة، اما تنشر محتوى أو تقول معلومة كل الناس تاخدها كمرجع أساسي.

 

طب ازاى تعمل ده؟

 

أولا حدد شريحة واحدة، شوف ايه المشاكل اللي هي عايزاها او الحاجات اللي عايز تقرا وتتعلم عنها.

 

ثانيا اكتب أو سجل أو صور محتوى مفيد ومنظم وصعب الشريحة بتاعتك تلاقيه عند اي حد تاني.

 

واهم حاجة انك تعمل ده باستمرار.

 

ازاى التسويق بالمحتوى يساعدك في اختيار العملاء اللي انت عايزها؟

 

في التمانينات، سيث جودين كان واحد من الـ Brand Managers فى شركة Spinnaker Software …

 

وكان وظيفته الأساسية – حسب تعبير سيث نفسه – إنفاق ملايين الدولارات لتسويق منتجات الشركة بالاعلانات.

 

وهناك شاف إن الاعلانات مش مفيدة للشركات على المدى البعيد!

 

سيث كان بيدور على طريقة يقدر يبني بيها قاعدة جماهير، طريقة تسمح له بتسويق المنتجات الجديدة من غير ما يدفع فلوس اضافية في الإعلانات.

 

وخلال شغله في Spinnaker ومن بعدها في مجال صناعة وتأليف الكتب ومن قبلها في شركة ياهو، شاف إن الاعلانات مش بتشتغل بالطريقة اللي الشركات بتتعامل معاها بيها.

 

ايه هي الطريقة دى؟

 

ادفع اكتر، تظهر للناس اكتر، أي ناس مش مهم، المهم كل الدولة تسمع عنك.

 

سيث بعد ما صرف ملايين الدولارات في الاعلانات لتسويق منتجات شركة Spinnaker، قال الإعلانات خلت المتاجر الكبيرة تختار توزع لنا المنتجات بتاعتنا، والمنافسين يخافوا مننا لأننا صرفنا كتير.

 

ملحوظة: الإعلانات بمفهومها الأوسع فهي أي مادة تسويقية تطلع من الشركة سواء كانت طرق توزيع ونشر المادة التسويقية دى بفلوس أو مجانا.

 

نكمل حكايتنا …

 

وبعد دراسة لمدة 6 سنين عن ازاى الشركات بتتعامل وبتصرف على الاعلانات، سيث جودين قال فيه طريقة تخلي الإعلانات تشتغل بفعالية أعلى.

 

الطريقة دى هي الـ Permission Marketing أو التسويق بالاذن.

 

الـ Permission Marketing هو امتياز انت اخدته من الجمهور المستهدف عشان تبعتلهم رسائل مفيدة وذات صلة بيهم، وهما متوقعين إنك هتعمل كده.

 

أبسط مثال هو أما اكتر من 12,000 شخص سجل في الكورس المجاني اللي انا كنت عملته.

 

اللي سجل سجل وهو عارف اني هبعتله على الايميل حاجات تسويقية وهابيع له منتجات عالية الجودة وتستاهل فلوسه ووقته.

 

الفرق بين الطريقة اللي انا عملتها، وطريقة أي حد تاني بيعمل كورسات مشابهة هي:

 

انا اخترت الناس اللي عايز ابيع لهم المنتجات بتاعتي، وتواصلت معاهم بشكل شخصي، واخدت منهم الاذن قبل ما ابيع لهم أي حاجة.

 

الاذن كان الكورس المجاني اللي عملته.

 

انا معملتش اعلانات في الشارع ولا في التلفزيون ولا في الفيسبوك حتى عشان اقول للناس تعالوا اشتروا ده حلو …

 

إنما اخدت منهم الاذن انى ابيع لهم الاول، والاذن كان اني اقدم لهم منتج مجاني افضل من كورسات مدفوعة كتيرة في السوق.

 

فهمت المبدأ؟

 

بدل ما تطارد الزبائن المحتملين في كل مكان بمحتوى هما مش مهتمين بيه، خليهم هما يجروا وراك ويطلبوا منك تقول لهم وتعلمهم عن المنتجات والخدمات اللي بتقدمها.

 

بس الموضوع مش قلبة وقومة، الموضوع علاقة ذات معنى بتتطور يوم بعد يوم مع الجمهور المستهدف.

 

وطريقة قياس قوة الـ Permission إنك لو اختفيت أو بطلت تتكلم، الجمهور المستهدف يجي ويتطمن عليك ويقولك ارجع ارجوك.

 

خد بالك، الـ Permission ممكن يتسحب منك في أي وقت، الموضوع مش مرة وخلاص، انت بتبني علاقة ذات معنى طويلة الأمد مع الزبائن/العملاء المحتملة.

 

تمام؟

 

 ايه الفرق الجوهري بين التسويق بالمحتوى والتسويق بالاعلانات؟

 

الإعلانات وسيلة مهمة لتوصيل رسالة المنتج/الخدمة للجمهور المستهدف بهدف التأثير على قراراهم الشرائي.

 

ولكن بمجرد ما الحملة الإعلانية بتخلص، التسويق بيقف، وعشان يكمل لازم تدفع تاني وتالت.

 

إنما التسويق بالمحتوى أداة هتساعدك تعمل تسويق مستمر، ومع الوقت التكلفة بتقل، والفايدة بتزيد.

 

التسويق بالمحتوى يعني ترافيك، Leads، مبيعات كل يوم وبتكلفة مادية أقل بكتير من الإعلانات، بس محتاجة مجهود وذكاء وخطة استراتيجية.

 

طب ازاى ده يحصل؟

 

ركز معايا …

 

أساسيات التسويق بالمحتوى

 

التسويق بالمحتوى علم صعب ومتشابك، ولكن فيه 3 مفاتيح لو قدر اي حد يتعلمها صح، الموضوع بالنسبة له هيكون سهل جدا …

 

1- كتابة المحتوى

 

عمود التسويق بالمحتوى هو كتابة المحتوى وده لأن كتابة المحتوى هي اداة تنفيذ كل كلمة اتقالت في المقال ده لحد دلوقتي.

 

طب ازاى تتعلمه؟

 

فيه كورسات كتير في السوق، ولكن انا بقدملك كورس – حسب رأي 99.5% من الناس اللي اخدته – أحسن من كورسات كتير بفلوس كتيرة في السوق، وببلاش.

 

ليه انا بعمل كده؟

 

لسببين، واحد شخصي، والتاني بيزنس بحت!

 

السبب الشخصي اني بفرح أما اساعد حد، بحقق ذاتي وبكون مبسوط وانا شايف إن اللي بعمله ليه فايدة وتاثير حقيقي في الناس.

 

والسبب اللي يخص البيزنس، اني بقدملك محتوى قيمته عالية وببلاش، عشان تجرب، ولو عجبك، هتشتري المنتجات اللي بعملها بفلوس وانت مقتنع ومجرب قبل كده.

 

مثلا اسلام شايف إن الكورس تمنه 2000 جنيه …

 

 

منة شايفة إن المعلومات اللي شافتها في الكورس محدش قالها ولا هيقولها عليها …

 

 

في الكورس انا مش مجرد بقدملك معلومات واسيبك، لا فيه متابعة عشان اتاكد من انك نفذت وطبقت المعلومة صح …

 

 

محمد جمال شايف إن الكورس ده 10/10 …

 

 

هشام عمر بيتكلم عن مدى احترافية ومستوى الكورس …

 

 

وفيه أكتر من 300 شهادة وتعليق على الكورس يوضحوا ازاى الكورس كان مفيد جدا، وازاى قيمته عالية سواء على مستوى المادة العلمية أو القيمة المادية.

 

دوس هنا عشان تاخد كورس كتابة المحتوى مجانا

 

الكورس هيكون مجانا من خلال الايميل، كل يوم الساعة 10 بالليل هيوصل الانبوكس بتاعك ايميل فيه درس أو شرح أو حدوتة عن خطوة من الخطوات اللي لازم تمشي عليها لو عايز تعمل محتوى عالي الجودة.

 

2- استراتيجية التسويق بالمحتوى

 

هل ينفع تشتغل من غير استراتيجية تقولك تعمل ايه وماتعملش ايه؟

 

أكيد لا.

 

مفيش حاجة أسوا من إنك تكون بتشتغل وانت ماعندكش فكرة اللي بتعمله ده صح ولا غلط.

 

عشان كده عملت لك دليل مجاني دسم من خلاله هتقدر تعمل استراتيجية كامل للتسويق بالمحتوى.

 

دوس هنا لقراءة الدليل اللي هتطلع منه بـ استراتيجية التسويق بالمحتوى اللي تنفع للبيزنس بتاعك

 

3- أفكار مختلفة تخدمك في الاستفادة من التسويق بالمحتوى

 

زي ما قلنا كل رسالة تسويقية تطلع منك هي بمثابة إعلان تجاري سواء دفعت فيه أو مادفعتش فيه، وده معناه ان ممكن اعلان يزود المبيعات واعلان يقللها!

 

عشان كدة نقطة الأفكار مهمة جدا في التسويق بالمحتوى.

 

طب ازاى تجيب أفكار مختلفة تساعدك تبيع من غير ما تقصد انك تبيع ولا حتى تقول للناس اشتروا كذا؟

 

ببساطة التسويق عبارة عن خط متصل بيوصل من العميل للخدمة أو المنتج.

 

يعني العميل في طرف بالحاجات اللي هو مهتم بيها ومشاكله واهتماماته وخلافه!

 

والخدمة أو المنتج في الطرف التاني بالحاجات اللي هو بيقدمها وخلافه.

 

المطلوب منك تختار مشكلة واحدة أو اهتمام من اهتمامات العميل، وتربطه باجة من الحاجات اللي موجودة في الخدمة أو المنتج بتاعك.

 

وبالطريقة دى هتضمن ان كل محتوى يطلع منك مناسب للعملاء والبيزنس وبيبيع من غير ما تقول تعالي اشتري.

 

فهمت؟

 

التسويق بالمحتوى فعلا حل عبقري لتحديات كتير بتواجه الشركات الصغيرة والمتوسطة واي Freelancer أيا كان مجال تخصصه.

 

لحد هنا والمقال خلص.

 

لو عندك أي استفسار أو سؤال يخص التسويق بالمحتوى اكتبه في التعليقات تحت وانا هرد عليك!

 

ودلوقتي ركز معايا فى الكلمتين دول …

 

من 10 سنين لما قررت ادخل مجال التسويق بالمحتوى ماكانش فيه منهج اقدر امشي عليه عشان اقدر اطبق المفاهيم والاستراتيجيات الخاصة بالتسويق بالمحتوى على أي بيزنس من اللي اشتغلت فيها!

 

والموضوع ده كان مضايقنى جدا نظرا لان شخص بيحب يشتغل بنظام وبعلم مش يشتغل وزى ما تيجى تيجى!

 

فقررت فى أواخر 2017 انى ابدا اجمع واوثق علم التسويق بالمحتوى سواء من اللي جربته أو من اللي سمعت وشوفت ناس تانية جربته.

 

وقد كان، وبدأت في إطلاق كتاب ورا كتاب …

 

انهاردة انا بقدملك الكتب دى كلها بدل ما تقعد بالساعات في جوجل وماتوصلش لحاجة واضحة تقدر تمشي عليها!

 

(دوس على المربع الأخضر اللى قدامك لتفاصيل الكتب)

28 thoughts on “التسويق بالمحتوى: استراتجية التسويق الأفضل للشركات الصغيرة!”

  1. مشكور على الجهد الطيب
    عندي استفسار الكورس للمحتوى هينفع لو انا عايزة ادخل مجال التدوين ببلوجر ؟

    Reply
  2. المقال حلو جداً ومفيد بس انا مش عارف ابعت الايميل بتاعي علشان كورس المحتوى
    دايماً بيظهرلي error

    Reply
  3. والله محتوى قيم جددددا وأسلوب ممتاز وسهل للفهم بس في مشكله انا سجلت في الكورس كوبي.رايتر ومجاليش حاجه من امبارح
    Mahmoudabusaleh9@gmail.com

    Reply
    • طالما سجلت وعملت تاكيد يبقي 100% جالك، بص على الاسبام او البروميشين فولدر فى الايميل.

      Reply
  4. شكرا جزيلا لك على مجهوداتك لنا
    الحقيقه حضرتك مشجع جدا
    دي اول مره اعمل تعليق واسأل
    عايزه اعمل تسويق صح واعمل leads وافهم الإعلانات المموله بطريقه صحيحه وأهم حاجه التطبيق مش ببقى عارفه انا كدا صح ولا لا

    Reply
    • على الرحب والسعة يا ندي ^^

      طب كويس، ايه الخطوات اللى اخدتيها عشان تعملي اللى قلتي عليه؟!

      Reply
  5. مفيش خصومات قريبا علي كتاب المحتوى بما اننا لسة بادئين حياتنا فى المجال

    Reply
  6. ماشاء كمية المعلومات كبيرة جدا، وأعظم حاجة أن حضرتك كل نقطة أتكلمت عنها شرحتها بالتفصيل .

    Reply
  7. شرح مبسط للمقال
    وبتتكلم بسلاسة ويسر ..كتر خيرك على تعبك ومجهودك ..احسنت

    Reply
  8. اسلوب سلس وشيق بقالي حوالي 4 ساعات متواصلة بقرأ في المقالات ومش حاسس بأي ملل

    Reply
  9. اسلوبك شيق جدا يا استاذ أسامة وبتشرف اني بتواصل مع حضرتك وبتشوف شغلي وبتديني نصايح

    Reply

Leave a Comment