كتابة المحتوى للسيو من أصعب التاسكات في التسويق بالمحتوى وده عشان تاسك محتاج ذكاء وصبر!
ممكن تاخد ساعات عشان تجيب فكرة محتوى، وتاخد ساعات أكتر عشان تعمل عليها بحث، وتاخد ساعات أكتر وأكتر عشان تكتبها!
لو حظك حلو عملية كتابة المحتوى للسيو كلها هتمشي بسلاسة، إنما لو حظك وحش هتقابل مشاكل كتيرة زي:
الـ Writer’s Block، ودى عبارة عن حالة نفسية/عقلية بتصيب اللي بيكتب محتوى، وبتخليه غير قادر على إنتاج حرف جديد، ورقة بيضا وانت بتتفرج عليها أو كل ما تكتب حاجة تمسحها.
الـ Unfinished Work، يعني إنك تبدأ في حاجة، وماتخلصهاش للآخر، تسيبها في نصها أو في أولها أو قبل الاخر بشوية، المهم بتبدأ ومبتخلصش!
رمي الاسهم في الظلام أو زي ما يسميها الأجانب “Throwing Darts in the Dark”، ودي حالة بتصيب معظم المبتدئين وكتير من اللي شغالين في المجال من زمان، وملخصها إن الشخص مش بيكون عارف اللي بيعمله ده صح ولا غلط، ولو صح صح ليه، ولو غلط غلط ليه؟
ومشاكل تانية كتير.
ازاى تتفادي المشاكل دي اثناء كتابة المحتوى للسيو؟
امشي على خطوات منظمة مرتبة.
طب ايه هي الخطوات دي؟
في المقال ده هقولك ايه هي خطوات كتابة المحتوى للسيو، و هقولك سر بسيط ساعدني اكتب محتوى طلع في الصفحة رقم #1 في جوجل.
خطوات كتابة المحتوى للسيو
1- تحديد الجمهور المستهدف بدقة
2- اختيار موضوع وأفكار المحتوى بعناية
3- عمل بحث الكلمات المفتاحية باحترافية
4- كتابة المحتوى للجمهور المستهدف بشكل طبيعي
5- تحسين وتهيئة المحتوى لمحركات البحث بشكل صحيح
6- تسويق وترويج المحتوى خارج الموقع بشكل مظبوط بدون سبام
دول الـ 6 خطوات أساسية اللى انا عن نفسي استخدمتها في كتابة محتوى للسيو.
الموضوع بسيط ولكن مش سهل!
انا في المقال ده مش هشرح طريقة تنفيذ الخطوات دى، إنما هاقولك على السر اللي هيساعدك تكتب محتوى يتصدر نتائج البحث!
سر كتابة المحتوى للسيو
إخلاء مسؤولية: الـ 6 خطوات اللي قلنا عليهم كلهم مهمين، ونسيان أو إهمال أي عنصر بيخلي المحتوى اللي هيخرج في النهاية محتوى وحش مش بس مش هيظهر في جوجل!
عشان تكتب محتوى يظهر في الصفحة رقم #1 في جوجل، الخبراء الأجانب والعرب في الموضوع ده هيقولولك روح ذاكر العوامل اللي جوجل بيرتب بيها المواقع ( أكتر من 200 عامل).
وطبعا انت قصاد النصيحة العامة دي بتحس إن الموضوع صعب ومعقد.
ولكن الحقيقة عكس كده تماما.
هل فعلا عشان تعمل محتوى يطلع في الصفحة رقم #1 في جوجل، لازم تعمل حساب عوامل كتيرة من الـ 200 عامل؟
الإجابة لا.
فيه عامل واحد بس لازم تعمل حسابه، وهو يغنيك عن العوامل الـ 200 الباقية.
العامل هو المحتوى.
بس مش اي محتوى!
فيه 5 مواصفات للمحتوى المتوافق مع قواعد السيو:
1- محتوى عالي الجودة.
2- محتوى أصلي غير منسوخ.
3- محتوى أحسن من محتوى جميع المنافسين.
4- محتوى معمول صح من أول الكلمات المفتاحية والفكرة، لحد التنفيذ والنشر.
5- محتوى فعلا بيقدم للناس قيمة حقيقية يستفيدوا بيها وحياتهم تكون أحسن بيه.
طب ازاى تعمل المحتوى ده؟
دلوقتي هقولك على السر البسيط اللي هيخليك تكتب محتوى مناسب للسيو ومناسب للجمهور وكمان يظهر في الصفحة الاولى في جوجل حتى لو المنافسة كبيرة!
السر في حاجة اسمها Content Gap Analysis.
يعني ايه؟
الـ Content Gap Analysis عبارة عن عملية لتقييم المحتوى المنشور بالفعل في موضوع ما، واكتشاف الفجوات في المحتوى ده لتحسين وبناء المحتوى بتاعنا عليه.
تاخد مثال عملي؟
يوم 19 يناير 2018 كتبت مقال عن “كتابة المحتوى”، بس قبل ما اكتب حرف واحد، كتبت في جوجل جملة “كتابة المحتوى” وقريت كل المقالات اللي اتعملت عن الموضوع ده!
وقدرت اعرف ايه هي الفجوات اللي محدش قدر يغطيها لحد الوقت ده!
والفجوات دى كانت:
1- محدش كتب محتوى طويل تفصيلي.
2- مفيش محتوي عن كتابة المحتوى خطوة بخطوة.
3- محدش كتب محتوى اصلي/حصرى، الغالبية كانوا مترجمين.
4- تقريبا مفيش حد بسط الموضوع بطريقة تخلي أي حد يفهم ويطبق، كله كلام نظري.
بناء عليه، كتبت قطعة محتوى طويلة وعميقة فيها كل التفاصيل اللازمة لكتابة محتوى، ومنظمة ومرتبة بشكل ممنهج وخطوة بخطوة.
والاهم إنها كانت حصرية أو أصلية، يعني من خلال خبراتي التراكمية في المجال لأكتر من 4 سنين وقتها.
وفعلا كتبت المحتوى، ونشرته، واحتل النتيجة رقم #1 في ترتيب جوجل للكلمة المفتاحية “كتابة المحتوى”.
وبقي كل يوم بيجيلى ترافيك مجاني من جوجل من غير ما اصرف اعلانات، ولا ابذل مجهود إضافي.
الموضوع ماوقفش لحد هنا!
كل يوم بقى يجيلى Leads مهتمين جدا باللى انا ببيعه، وده لانى فى اخر المقال كنت حاطط كورس مجانى كنت عامله لكتابة المحتوى بالتفصيل (اكتر من 13000 شخص).
كل ده بسبب قطعة محتوى واحدة، صحيح ممكن الارقام ماتكونش كبيرة جدا، ولكنها بكل تأكيد مناسبة لحجم الشغل اللي بيتعمل!
انا مابكتبش محتوى جديد كل يوم، ولا كنت بصرف آلاف كل شهر في الإعلانات (انا اصلا مش بعمل اعلانات).
طب ازاى تعمل Content Gap Analysis؟
اكتب في بحث جوجل اسم موضوع المحتوى، ثم ادخل على كل قطعة محتوى موجودة في الصفحة الأولى.
وبعدين هات ورقة بيضا وقلم رصاص، وابدأ اكتب اجابة الاسئلة اللي هقولك عليها حالا.
1- هل المحتوى مغطي كافة جوانب الموضوع، ولا فيه جوانب ماجاش جمبها؟
2- هل المحتوى تفصيلي ولا مجرد معلومات عامة عن الموضوع؟
3- هل المحتوى منظم ومرتب ولا مجرد شوية معلومات مرصوصة جنب بعض وخلاص؟!
4- هل المحتوى اصلي، ولا مترجم ولا مُعاد الصياغة؟
5- وجهة نظرك ليه المحتوى ده تصدر النتائج وازاى يكون احسن؟
بالاسئلة دى هتقدر تحدد قيمة كل قطعة محتوى وتعرف المناطق اللي لازم تلعب عليها في المحتوى بتاعك عشان تكسب المحتوى اللي هما عاملينه، وتطلع في جوجل قبلهم.
الخطوات دي رغم بساطتها إلا اني عملتها وجابت معايا نتائج محترمة، وغيري جربها وجابت معاه نتائج.
جربها انت كمان.
وبس كده …